“Sasa nisikilize Pius. Maadamu uliamua kumpitishia
mtoto wako kwenye familia yangu, ataishi kutokana na SISI.” “Huo ni ukorofi
na kiburi kisicho na sababu. Kwani mimi kumpa Mina gari nzuri kwa ajili
ya matumizi yake ya kila siku, kuna ubaya gani?” Kabla hajajibu
Andy, Mina akaenda kumshika mkono Pius pale alipokuwa karibu kwenye kitanda cha
mtoto, akamvuta kumtoa nje..PNG)
“Mbona unanitoa tu mimi peke yangu wakati tulikuwa tukizungumza
na Andy ambaye wakati wote ni mkorofi?” “Na wewe Andy nifuate
hapa nje.” Mina akaamuru. Akafuata bila kubisha. Kisha akafunga mlango
nyuma yake.
~~~~~~~~~~~~~~~~~
“Kwa akili zako wewe, hapa sasahivi,
kuna mwenye shida ya gari?” Wakamsikia Mina akimuuliza Pius nje ya
mlango. “Mimi ninachozungumzia ni mtakapotoka. Mtoto atapona Mina,
usikate tamaa.” Wakamsikia Pius akijibu kwa unyenyekevu. “Ujue Pius wewe
unataka kuniudhi bila sababu!” “Ni kutaka kukusaidia!” “Yaani SASAHIVI
mtoto wangu akiwa mgonjwa. Sijamuona hata akiwa amefungua macho, nikajua
kama ni mzima ua la, ndio unataka kuzungumzia maswala ya gari!?” Akaendelea
kabla hajajibu.
“Huyo mtoto amelala hapo nyinyi wote hamumfahamu.
Ayvin ni mtoto mzuri sana. Amezaliwa kwenye amani na utulivu.
Amekutana na mazingira ya utulivu sana tuliyomuwekea mimi
na Ayan. Akakuta akisubiriwa kwa upendo na yeye akaleta furaha
katikati yetu. Hajui malumbano, hajui fujo zenu hizi.
Hajui huu ubaya huu. Kutwa tupo MWANZO wa TATIZO. Hatusogei
popote! Tokea mimba yake, mpaka leo, mambo ni hayohayo!”
“Sasa hivi ni mgonjwa. Tuna taarifa zile
za daktari. Hata sijamsika mtoto wangu nikajua yukoje! Kama walichofanya
kimesaidia kurudisha furaha yake au la, nyinyi ndio mnaona huu ndio
wakati wa kugombania gari? Kweli?!”
“Pius ndio mkorofi.” “Sasa kati yangu mimi na
wewe nani ni mkorofi hapa? Wewe ndio umeng’ang’ania kutosamehe.”
“Nisamehe kwani ulifanya kwa bahati mbaya au kusudi tu kuniharibia
familia? Na mbaya zaidi, umepanga kuharibu zaidi!” “Jambo
limeshatokea. Kwa nini…” “Sasa nisikilizeni nyinyi wawili. Zaidi wewe
Pius, humu ndani msiingie tena, mpaka mmalizane hapahapa nje.
Anayeingia humu ndani, ni amani aliyozoea Ayvin.” “Tafadhali muite
jina nililoomba mimi.” “Pius wewe!” Mina akashangaa sana.
“Kwani jina langu lina ugumu gani? Basi muite
hata PJ.” “Kwamba WEWE unataka akiamka na maumivu, ajikute na jina jipya,
sehemu ngeni, na watu wapya wamemzunguka!?” “Taratibu atazoea.” Pius
akamjibu Mina kwa unyenyekevu kabisa bila kubadili msimamo wake.
“Unapenyeza jina lako, kwenye familia yangu,
makusudi tu. Unaona akiitwa Ayvin, akajichanganya na kaka yake,
roho yako haitatulia maana patakuwa na amani! Yaani kukiwa na
Pius ndani ya familia ya Andy, kukawa na mchanganyiko ndio raha
yako!” “Sasa mchanganyiko
utatoka wapi hapo? Maana nataka akue akijitambua mimi ni baba yake
na ninampenda. Na yeye si mtoto wa bahati mbaya.” “Wewe
umechanganyikiwa Pius.” “Na…” kabla hajajibu Pius, Mina akawahi.
“Sasa nakuonya Pius. Hicho unachotaka
kukianzisha sasahivi, kiishie hapahapa nje, usikiingize ndani. Lasivyo nabeba
mwanangu, naondoka hapa. Hakika safari hii hamtakaa mkatuona
tena. Sasa endelea kuleta ukorofi, ukidhania watoto wanalelewa na
magari.”
“Huwezi kuondoka tena Mina?” “Nabaki kwa sababu
ipi? Niambie Pius. Nabakia kwa sababu ipi? Mnataka kuja kuchanganya
watoto wangu, wajione ni watoto wa ajabu wakati kwangu ni baraka!”
“Sababu ya utulivu, amani na furaha waliyokuwa nayo
huko, si mazingira ya kitajiri kama haya yenu, Ayan amejikuta mbali sana kiakili.
Anajifunza yeye mwenyewe kusoma. Japokuwa ni mkimya vile, na hajaanza hata
shule, ile tu amani ya pale kwetu, mtoto unamfundisha jambo
anaelewa kwa haraka sana. Ayan anasoma mpaka kitabu! Hana table ukamuuliza akashindwa. Akiwa kwenye utulivu,
muulize namba yeyote, kuanzia table ya
kwanza mpaka 12, mwambie azidishe uone jinsi atakavyokujibu.”
“Ayvin na jina lake hilohilo, amejawa na
furaha ambayo kila mtu anatamani kuwa naye. Mpaka mama mwenye nyumba
akiwa amechoka, anatufuata kwetu anaomba amshike kidogo, acheke
naye, ampunguzie stress za
maisha. WEWE unataka kunijazia magari, kisha unipotezee amani kwa
watoto wangu! Hakika SIKURUHUSU. Endeleeni kugombana hapa nje, mkiingiza
tu fujo zenu ndani, ndio MWISHO wenu.” Akaingia ndani na kufunga mlango.
Kimya. Ndani na nje.
Kisha, wakamsikia Andy akilalamika kwa uchungu.
“Nilipomleta Mina nyumbani kwa mara ya kwanza, wote mlimuona hafai,
MKAMKATAA.” “Mimi nilimpenda Mina tokea mwanzo. Uongo Mina?” Wakamsikia mtoto
wa Pius akidakia ndani.
“Mkamkashifu
mpenzi wangu, kwa maneno mengi machafu, mpaka akaondoka. Mlipoona anazaa
watoto wa kiume, mkaanza kujisogeza. Akajiongeza mwenyewe kwenda shule,
mkajaa kwenye maisha yetu mkinitafuta mimi ubaya ili wewe Pius
uwe karibu yake, upenyeze mtoto wako kwa hila.” “Huna shukurani
Andy wewe! Ulitelekeza mkeo hapa mjini, ukawa unahangaikia MALI kama
wengine sisi hatutaki mali! Tukakusaidia, yaani hii ndio shukurani
yako?”
“Na wewe ukajilipa kwa kumzalisha mke
wangu kwa HILA!? Ulikuwa wapi siku zile za Mina niliyemtambulisha kwenu, mkamkajeli
na kumcheka mkimuona hafai? Si na wewe ulikuwepo, tena ukanyamaza
kimya akidhihakiwa na mpaka watoto wadogo kina Paul? Eti gafla unasema unampenda
mke wangu! Hakika Mungu aamue
kati yetu Pius.
Uharibifu huu unaotaka kuendeleza kwenye familia niliyoanzisha mimi na
Mina kwa mapenzi tu, bila kutaka viwango vyenu vya watoto wa jinsia fulani na mtu aliyesoma,
Mungu atuamue kwa haki. Unajisogeza baada ya kuona vinang’aa!”
“Mimi sikuwahi kumdharau Mina tokea siku ya
kwanza. Na kama utakumbuka nilimtetea mpaka mama akataka kunibadilikia,
ndio baba akanunua ugomvi. Mimi
sijawahi mdharau Mina hata siku moja.” Pius akajitetea.
Mina akachukua mizigo aliyoletewa na Andy na kuingia
bafuni. Pakazuka ukimya. Lakini kwa hakika Andy alimkumbusha Mina mbali
sana. Enzi zake hajui hata kula kwa kisu na uma!
Elimu yake ndogo kabisa, ya chini! Alivyompokea kwa upendo bila kujali
tofauti zao za kiuchumi! Akajisikia kupoa kabisa rohoni. Akakumbuka mapenzi ya dhati
yasiyo hila wala masharti ya Andy, ya zamani.
~~~~~~~~~~~~~~
Akatoka akiwa amebadilisha nguo akiwa ameshaoga
kabisa. Akawakuta wote wapo hapo. Mara daktari wa watoto akaingia. “Huyo
hataamka mpaka kesho. Tumefanya makusudi ili apumzike. Kwanza alikuwa na homa,
pili sikutaka ajitoneshe vidonda vibichi, kwa hiyo kama mlikuwa mkimsubiria
aamke, sio leo. Na msiwe na wasiwasi. Kila maji
atakayoongezewa ni yakumpa nguvu na yatakuwa na dawa. Atakuwa sawa.”
Akamsogelea. Akamuangalia na kumpima vitu kadhaa.
“Vipi unaonaje?” Pius akauliza. “Kila kitu kipo sawa
kabisa. Atakuwa sawa. Na kesho ataamka akiwa na nguvu mpya.” “Akiendelea hivi,
inamaana kesho mtaturuhusu?” Mina akauliza. “Kabisa. Hamna sababu ya
kuendelea kuwa hapa. Operation
aliyofanyiwa mtoto wako ni ya hali ya juu sana. Baada ya muda hata kitundu
alichotobolewa ili kuingizwa mashine ya kurekebishia ndani palipo
athirika, kovu litapotea kabisa. Mkija kumsimulia baadaye, itamuia ngumu
kuamini.”
“Ila kwa kuwa ni mtoto na ndio anaanza kujitegemea
mwenyewe, kutambaa, kukaa na mengineyo, ni muhimu kuwa makini naye asijitoneshe.”
Akawapa maelezo yakutosha. Pius akauliza maswali yake mpaka akamaliza.
“Hataamka kwa usiku huu. Nashauri mkapumzike tu. Hapa yupo kwenye mikono
salama. Manesi watapita kila wakati kumuangalia na kumshugulikia.” Wakina
Ruhinda wakashukuru, akaondoka.
Bado Mina Kashika
Makali.
“Mina binti yangu, nakuandalia chumba chako na
wanao kabisa. Mkiruhusiwa tu, ukapumzike.” “Nashukuru sana mama kwa moyo
wako wa kila wakati kutaka kunikarimu mimi na wanangu, lakini naona si
sawa mimi na wanangu kuishi pale.” “Kwa nini?!” Pius akahamaki.
Mina akamtizama, wakaona anapoa.
“Najua nawajibika kujieleza na kwako pamoja na
baba, mbali na Andy, kwa nini niliondoka bila ya kuaga.” “Na mimi
Mina!” “Basi sababu ni wewe Pius.” Paul akaanza kucheka kimyakimya.
“Tafadhali usicheke Paul.” “Sawa baba.” Akatulia.
“Mimi nimefanyaje?!” “Mbali yako wewe
mwenyewe, ambaye ni tatizo mpaka sasa, pale si aina ya mazingira
nataka wanangu wakulie.” Wote wakashangaa sana. Kwa Mzee Ruhinda kulivyo
matawi!
“Unamaanisha nini Mina, binti yangu?” Mzee Ruhinda
akauliza taratibu tu. “Najua nyinyi mnauelewa tofauti na wangu juu ya mazingira.
Najua kwenu ni mazingira yaliyo staarabika. Lakini mimi nataka kuelea
wanangu kwenye mazingira ya amani na utulivu. Sitaki hata
mmoja wao ajione ni kama amezaliwa kwenye mazingira ambayo anaingilia
ratiba za watu.”
“Yaani mtoto anakua kwenye mazingira akijihisi HATAKIWI,
sababu wazazi wote wanaratiba zao muhimu, yeye ni kama anaingilia
tu, kisha anajikuta si wa muhimu.” Andy akajua ni yeye. “Au mtoto
anazaliwa kwenye mazingira kama hivi Ayvin. Anakuwa kwenye mazingira
aliozungukwa na watu na nyadhifa zao. Pesa. Elimu. Walioweza kuongoza
watu wengine, lakini wote wameshindwa kutulia, na kujipanga
jinsi ya kumlea mtoto wa aina yake!” Hapo kimya.
“Mtoto anakua kwenye mazingira ya kelele.
Ugomvi. Kutoelewana. Halafu yeye ambaye hakuchagua
kuzaliwa kwenye mazingira hayo, ndio anakua MUHANGA
mkubwa. Anakuwa na majina makubwa.
Anasoma kwenye mashule yenu
hayo. Anavaa kama hivyo nyinyi, lakini anakuwa ni mtoto tuliyemchanganya,
anaye nyanyasika kihisia, ndani ni mbovu
kuliko anavyoonekana nje akiwa nadhifu! Hivyo mimi SITAKI.”
“Mimi SITALEA watoto wakuja kuongoza watu wengine
wa nje, kimataifa wakati wakishindwa kuongoza familia zao au hata
ndugu zao.” Bwana walinywea.
Maana hapo ni watu wazima na nyadhifa nzito. Ila wanagombana
kama waswahili wa kwa Mfuga Mbwa.
“Najiona mimi kama mama nitakuwa nimeshindwa endapo
nitawaacha wanangu wanakua kwenye mazingira kama hayo. Siwezi. Sitaki.
Na sitafanya hivyo.” Akaendelea akiwa ametulia tu, ila Mina ni msema
moyo wake. Wote walimjua.
“Kingine, kikubwa na cha msingi pia kilichonifanya niondoke ni Raza.” Wote
wakaelewa kwa upande fulani. “Raza asikutishe Mina.” Pius akadakia akimuhakikishia.
“Yeye bado si ni Raza Ruhinda?” Akamuuliza huyo mumewe. Kimya.
“We Pius?” “Ndiyo lakini nishazungumza naye.”
“Kwa kumpiga! Hapana Pius. Cha
kwanza, na hiki hata mama nilimwambia. Na Andy nilimwambia mwanzoni
kabisa alipoonyesha nia ya kutaka kunioa. Nilijieleza ukweli kwake.
Akanielewa na nilimuahidi nimebadilika, tukaoana. Maneno aliyokuwa
akisambaza Raza, si uongo. Na mama nilimwambia siku ile. Anaweza kuwa anaongeza
kwa hasira lakini kwa asilimia fulani, hakuongopa. Mimi nilikuwa mtoto mbaya. Ila mama akanipeleka kuombewa, nikatulia
kabisa mpaka nikaja kukutana na Andy. Yakatokea yakutokea. Nikapotea tena
lakini Mungu akanirudisha tena kwake. Nimetubu. Mpaka leo Mungu
ananisaidia, mambo niliyokuwa nikifanya zamani, ameyaondoa kabisa.”
“Lakini kinacho nishinda kurudi pale si
maneno, ila ni heshima yangu kwa Raza. Naona si sawa kwake. Siku
ya kwanza kabisa Andy amenileta pale kwenu, mbali na Andy, Raza alinipokea
jamani! Sitasahau. Nilifika jikoni sijui chakufanya, lakini yeye alinikarimu
mpaka kunipa mchele wa kuchambua. Alipoona nimenyimwa kila kitu chakufanya huku
nikichekwa pale kwenu, Raza alinifuata chooni maana nilikuwa nalia
peke yangu sitaki Andy anione.”
“Nyinyi hamkujua maana ni kama alijiiba kunifuata. Aliniambia hivi akinituliza,
kuwa mwanzo huwa ni mgumu. Mkishanifahamu vizuri, mtanipokea
tu. Akasema kabisa, nyinyi ni binadamu wa kawaida tu. Mapungufu ya kawaida mnayo, lakini sitashindwa kuishi na
nyinyi. Raza aliniambia kwa upendo kabisa. Halafu akasema katika Ruhinda, nilipatia
kuolewa na Andy. Ni mwanaume mwaminifu sana, na anahitaji kujenga
familia. Nikitulia, nitakuwa na familia nzuri, kwa sababu ndicho kitu anahitaji
Andy kwa wakati huo. Hana dharau na mengine mengi akiwasema nyinyi wote vizuri.”
Wote wakashangaa.
“Raza alinifanya nikatulia, ndio nikaenda
kucheza na watoto japo bado mliendelea kunisema vibaya, mimi mwenyewe nikiwepo.
Nilipanga ninyamaze tu, lakini nilishindwa pale mezani mlipozidisha maneno
mabaya ya dharau ya wazi kabisa huku Paul akitucheka mimi na
Andy, halafu Andy akashindwa kunitetea. Ndio nikaondoka nikasema Raza amenidanganya,
mbona sasa Andy mwenyewe alinyamaza wakati ndugu zake wakitusema
vibaya! Lakini wakati huo nilikuwa sijamjua mume wangu vizuri.”
“Ninachotaka kusema ni hivi, namuheshimu sana
Raza. Najua yeye kama binadamu anamapungufu yake, ila zaidi ukimwangalia
ni sababu analinda kilicho chake. Huwezi hata kumuhukumu. Lakini
binafsi, siwezi kuhamia pale kwenu wazazi wangu, aliponikaribisha
Raza, halafu yeye ikawa kama nimemfukuza! Hapana.”
“Nakumbuka picha niliyowakuta nayo siku ya kwanza pale kwa wazazi. Umoja
ambao na mimi nilipenda niwe mmoja wenu. Lakini mlinikataa.
Mlijaa amani na kuelewana kwa aina ya kupendeza na kuvutia mno.
Watoto wenu walikuwa na furaha. Wanacheza pamoja kwa amani kila mmoja
anajua chakufanya kwenye ile nyumba. Siwezi eti mimi gafla na wanangu
tukaingia na kuvuruga! Hapana kwakweli.”
“Raza na watoto wake niliwakuta pale. Alinikaribisha
niongezeke, lakini si kuchukua nafasi yake.” “Hutachukua nafasi
yake. Tutaweka mazingira ya amani ili wote muwepo, Mina
mwanangu.” “Nakuelewa mama. Na ndivyo nilivyotegemea, lakini mimi na
wewe hata kama tungependa iwe hivyo, LAKINI Pius ndio mvurugaji.”
“Mina!” “Hakika tena. Naomba Poliny akasubirie kwenye gari. Tafadhali.” Wakaona
wazo sio baya japo mwenyewe alitaka kubaki. Mzee Ruhinda akamuomba Devi
aongozane naye. Wakatoka.
~~~~~~~~~~~~~~
Aliporidhika huyo kipenzi, mtoto mkubwa wa Pius ameondoka, Mina akamgeukia Pius
tena. “Wewe ndio mvurugaji MKUBWA Pius. Hutaki amani tokea
mwanzo, na baba alikwambia.” Mina akaendelea. “Jamani mimi nataka ndoa
yangu. Nampenda mume wangu.” Andy alibaki ameinama tu, lakini angalau alifurahia.
“Hata kama kwenu tunaweza onekana hatujafikia
viwango vyenu, lakini ni ndoa yetu mimi na Andy. Tulianza safari
yetu ya ndoa tukiwa hatujui ya mbeleni. Kuna kukosea kwingi sababu ya ndoto tulizoingia nazo kwenye ndoa na matarajio yetu. Nafikiri ndio maana nyinyi wazazi mlikuwa
tayari kutusaidia kutuona tunaendelea mbele na si kuachana.”
“Katika magumu mengi tuliyokuwa nayo, nakumbuka
Andy alipokuwa nje ya nchi masomoni, alinipigia simu akitaka arudi ili
awe na mimi. Aliniambia wazi, haoni faida tena ya kila anachohangaikia kama sisi wawili hatupo pamoja. Andy akasema
ni bora arudi nchini tuishi kwa kile tulichonacho, aache hata kile cheo
kule Dodoma. Mimi nikamtia moyo
aendelee tu, nikimwambia nitaendelea kuvumilia mpaka arudi. Tukaweka mipango
mingi bila kujua kumbe Ayvin ameshaingia
kwenye picha.”
“Mkampa maneno mengi Andy wangu, akaja kuniacha.
Tukatengana kwa muda lakini mapenzi yakaturudisha pamoja mpaka mtoto
akaja kujulikana ni wa Pius. Msimsaidie mume wangu aweze kuishi
na mtoto ambaye hakupanga, Pius wewe ndio unaongeza FUJO kila
mkoa, kila mahali, kisha ukishamaliza kutukorofisha, unarudi nyumbani kwako
kwenye amani, unatuacha sisi wanne. Andy, Ayan, mimi na Ayvin tumefarakana.
Andy haoni nafasi yake kwa sababu hakuna anayempa nafasi, kwanza
kujua chakufanya na mtoto wa kaka yake katikati ya familia yake.”
“Mnachofanya ni kuongeza mafuta ya taa
kwenye moto unaowaka ndani yake na familia yake. Mnaondoa
amani kwenye ndoa yangu ambayo hata hatujui tena ni wapi tunasimamia!
Wewe Pius kila siku unakuja na njia mpya ya kuharibu,
wakati baba alikuonya kabisa. Tena kwa kumsikia akirudiarudia kwako.” Kimya.
“Hakika mimi nilidhania WEWE ndio ungekuwa
mstari wa mbele kuleta amani nyumbani kwetu ili Ayvin akue kwenye
mazingira mazuri, lakini umekusudia kuharibu.” “Sio kweli.” “Ni kweli
kabisa Pius. Na hata leo uliponipigia simu kunitaarifu kuwa Mina amekutafuta,
na alijifungua salama ila mtoto ni mgonjwa, wanarudi kwa matibabu.
Sikukwambia maneno kama haya aliyoyasema Mina?” Kimya.
Mzee Ruhinda
Naye.
“Sema tu Pius. Sikukwambia hikihiki
anachokisema hapa Mina?” Kimya. “Jamani, haya anayoongea Mina, nimetoka kumkumbusha
Pius, LEO. Kuwa yeye anahatima ya wapi mtoto wake akue. Akileta AMANI kwenye ndoa ya Andy, mtoto wake atalelewa vizuri
tu. Maana najua Andy na Mina wanapendana. Na hata tabia ya Mina pia
nilimwambia mama yenu. Nilimwambia kama anayosema Raza ni kweli, basi Mina amebadilika
sana. Alikaa hapa mjini hana mwanaume, wakati alikuwa akizunguka jijini
hapa, na mumewe akamuacha mikononi kwa vijana kama yeye pale IFM, lakini
Mina alibaki akimuheshimu mumewe japo Andy alishindwa kurudi
nyumbani kabisa.”
“Nikamwambia mama yenu, inawezekana kuna wawili
hawa waliloongea na kukubaliana, ndio maana wanakopita japokuwa
ni pagumu, lakini hawakati
tamaa.” “Wala hapakuwa na maelewano mazuri baba yangu. Mina
alikuwa akinivumilia tu. Nilikuwa silali. Nina usingizi na njaa wakati
wote. Hata yeye nilikuwa sizungumzi naye vizuri. Ni aliamua kutulia
tu na mimi.” Andy akaongeza.
“Sasa kuja kumsikia Pius anaanzisha maswala ya gari
hapa!” “Tena kwa fujo kabisa kama vile hilo gari linatakiwa usiku
huuhuu!” Mama yake akaongeza. “Kama akaona havitoshi, anataka mtoto
mgonjwa aitwe jina lake!” “Asante baba.” “Kweli Pius? Uharaka huo
unatoa wapi wewe? Tena Mina akakuuliza kabisa na nilidhania ungefikiria.
Mtoto mwenyewe hatujui! Umeshindwa kuweka mazingira ya atufahamu
kwanza. Atuzoee. Kuwe na amani. Mina atulie nyumbani. Ajisikie
utulivu, ndipo mzungumze maswala kama hayo ambayo si ya msingi!” “Kwangu
ni msingi baba.” Akadakia Pius.
“Nyinyi mnaweza msione umuhimu wake,
lakini mimi naona umuhimu. Huyu ni mtoto niliyemtafuta kwa
mamilioni ya pesa nyingi sana, ila nikitaka apitie kwa Raza, na nyinyi ni mashahidi.
Hatukufanikiwa mpaka Raza kutolewa kizazi. Kwani sikuona wanawake wengine wa
kuzaa nao? Lakini nilikubali matokeo. Nikatulia. Hata mimi sikuchagua mwanangu
apitie kwenye familia ya Andy.” “Hapo ndipo tunapopishana na Pius. Na
huna jinsi ya kunibadilisha.” Andy akadakia.
“Pius wewe SI mlevi. Si malaya. Hujui
na hujawahi kulala na mwanamke mbali na mkeo. Nakujua. Habari
zako zinajulikana mpaka na mawaziri uliowahi kufanya nao kazi! Wabunge
wanao kufahamu pia wanajua sifa yako hiyo. Wote wanao kufahamu wanasema linapofika
kwenye swala la wanawake, hata kama umeweka pombe kichwani, HUSHAWISHIKI. Leo ulale na mke wangu, useme ni AJALI!” Andy
akasikika na uchungu kabisa.
“Ninachotaka kusema, Mungu amenipa huyu mtoto
kwa njia zake.” Wote wakashangaa sana. “Sasa sitaki akue
katikati ya familia yenu, asijue ni mwanangu.” “Pius wewe?!”
“Hakika mama. Katika hilo itabidi wanielewe tu na watafute
njia ya kuishi naye hivyohivyo. Hawawezi kumuita mtoto wangu,
jina la watoto wao. Eti mwanangu akue akijijua yeye ni
mtoto wa Andy, sio wangu! HAPANA. Nimekataa mama. Mwanangu yeyote
yule. Wakike na wakiume. Najitahidi WAJUE mimi ni baba yao,
na nina wapenda. Ndio maana mnaona hata kwa dada zake sizembei.”
“Mama yao alijaribu kunikorofisha nao, lakini
si mnaona wanangu? Wenyewe wanarudi kunitafuta japokuwa sijawahi
kukata matumizi kwao. Hata kama wakiwekwa mbali na mimi kwa maneno ya UFITINI,
nahakikisha hawaishiwi na wanajua kuwa nawapenda. Na ndio maana kwa ule upendo
niliowaonyesha, hakuna mtoto wangu anaweza ishi bila mimi.”
“Upendo wangu kwao umefunika hata dhambi
hii MOJA niliyofanya. Sasa SIWEZI nikaanzia kwa huyu ambaye nataka aitwe
Pius
Junior Ruhinda. Katika hilo sina
MJADALA Mina. Na sitayumba Andy. Tafuta jinsi ya kuishi na
mwanangu, akijua yeye ni mtoto wa Pius, kama nilivyofanya kwa
Ayan. Wote walijua WEWE ni baba yake, ila haupo, na NIKAMLEA kwa
upendo wote. Nilikusaidia kwa mwanao kwa upendo kabisa,
katikati ya watoto wote.” “Ilikuwa ili umpate mama yake.” Andy akamjibu.
“Ulimuweka mwanangu karibu ili kumfikia
mama yake.” “Najua umekasirika Andy, lakini mkeo hakuwa mwanamke pekee
hapa jijini. Sikuwa na sababu ya kulipa garama ya kulea
mtoto ili kumpata mama yake kama si upendo kwako. Kwanza nikijua unaanza
kujijenga kikazi, huku unafamilia changa na hili hata Mina kama atakumbuka nilimwambia
kabisa nikikutetea. Kuwa wewe ndio unaanza kazi, lazima utachukua muda
mwingi ili uaminike kazini. Abishe Mina.” Kimya.
“Sikuwa na hila mimi! Eti ili kumpata mwanamke,
eti ndio nilee mtoto wake! Wewe vipi Andy?! Au hujui kama unazungumza na
mimi?! Ningeweza au nina uwezo wa kupata mwanamke kama
Mina, muda na wakati wowote, nikalala naye bila garama ya kulea
mtoto wake! Nilisaidia familia yako kwa upendo tu, yaliyotokea ni
ajali.”
Huko Upande Wa
Pili!
Kipindi hicho
cha likizo Shema akajiunga na hiyo timu ya mpira ya miguu aliyotafutiwa na baba
yake. Akawa anakwenda kuchukuliwa na dereva na kurudishwa. Lakini Pam akagundua
yeye Mill huwa anakuwepo huko na mtoto wake kuanzia mwanzo mpaka mwisho wa
mchezo. Akafanya hivyo kwa mwanae kama anayemtenga na maisha ya pale kwao
uswahilini, mpaka tena shule zikawa zinafungua.
~~~~~~~~~~~~~~
Siku ya ijumaa
aliporudishwa tu mwanae ikiwa mapema kabla usiku, akamtumia ujumbe. Ndio
ilikuwa siku ya mwisho siku ya jumatatu anarudi shule. ‘Mill, pole kwa
usumbufu. Nilikuwa naulizia ile nafasi ya nyumba kama nayo bado ipo? Nahisi
itampunguzia safari Shema. Atakuwa karibu na shule na mambo yanayo muhusu.’ Baada ya muda akamjibu.
‘Sehemu ya kuishi ipo, ila nimeanza mahusiano.
Bado hayajachukua sura nzuri ya kueleweka kumtambulisha kwa Shema. Ndio tupo
mwanzoni kabisa. Tafadhali nipe muda mpaka nitakapokuwa tayari kumtambulisha
kwa Shema. Sitaki kumchanganya mtoto kwa kitu ambacho sina uhakika
nacho. Nikimaanisha sitaki muhamie hapa aje akutane naye nikiwa
sina majibu ya kueleweka. Naamini haitachukua muda mrefu.’ Pam alishituka. Akarudia tena na tena kusoma huo ujumbe,
akajikuta machozi yakimtoka.
~~~~~~~~~~~~~~
Alienda bafuni
akijidai anaoga ilimradi tu apate faragha ya kufikiria bila mwanae.
Haikusaidia, machozi yalikuwa yakimtoka Pam asiyejua kulia. Wakati wanalala
mwanae akamuhisi analia. Alipomuuliza akamdanganya macho yanamuuma. Kile alichomringia
nacho Mill, anapewa na mwengine!
Na hatimaye maneno
ya kina mama Batuli YAKATIMIA. Ameingia mwanamke mwingine kwenye maisha
ya Mill, hata mwanae kwenda kuishi kwake, pazuri eti ASUBURI! Pam hakuwa
akiamini! Mill anavyompenda mwanae, na alishasema pale wanapoishi ni duni,
eti leo anamsubirisha sababu ya mwanamke! HOFU ikazidi kumtesa akijua
ameshachezea shilingi chooni.
Akajua kwa
hakika HATIMA yake na mtoto wake, ameshamuachia mwanamke mwingine.
Inamaana angekuwepo yeye mwenyewe kwenye mapenzi na Mill, angeamua
wapi awepo. Alilia Pam mpaka
kichwa kikaanza kugonga kama kuna kengele humo ndani. Akameza
dawa na kulala. Ajira amenyimwa na pakuishi alipokuwa
akibembelezewa pia amewekewa pause.
~~~~~~~~~~~~~~
Siku inayofuata
mchana dereva alikuja kumchukua Shema, kupelekwa kwa kinyozi. Akamuacha mama
yake kwa shida kwani alikuwa kama mgonjwa kitandani. Aibu, hawezi kutoka
nje. Macho yamevimba, majirani zake aliokuwa akiwakumbatia na kumtambia
Mill amejitengenezea familia ingine, ndio hao wamemgeuka,
wanamsema vibaya sana. Mtaa ukaanza kukosa raha yake.
Shema alifika
kwa baba yake amepoa. Alipomuuliza kulikoni akamwambia mama yake mgonjwa
wa macho. Yanatoa machozi. Mill akamfanyia mwanae yote. Wakala pamoja. Akapita
duka la madawa, akamnunulia dawa ya macho akampa akampe mama yake. “Mwambie
kama bado hajapata dawa, ajaribu kutumia hizi, zitamsaidia.” Akamfungashia
vyakula alivyojua angependa, Shema akampelekea mama yake.
Pam akashukuru
kwamba haihitaji kutoka nje, kupika. Ni kula tu hapohapo ndani na kwenda
msalani. Alilala siku mbili yupo kitandani. Wivu. Kila akifikiria Mill
na mwanamke mwingine, alizidi kunyong’onyea.
~~~~~~~~~~~~~~
Inaendelea…
0 Comments:
Post a Comment