Ni Wangu! - Sehemu Ya 23.

Palipoanza kupambazuka tu, usingizi ulimwisha Nanaa. Bado ilikuwa mapema sana. Asijue kama ni furaha au la. Ni kweli alishazoea kuamka mapema, lakini akashangaa asubuhi hii akawahi zaidi. Akafikiria kidogo pale kitandani, akakumbuka mabusu aliyoyapata usiku uliopita. Akacheka huku akishika midomo yake. “Kama ndoto vile!” Nanaa akacheka akiwa peke yake pale kitandani. Akawaza hili na lile mwishoe akakumbuka inabidi aende kazini kufidia siku aliyokosa ya jana yake ijumaa.

          Akaelekea jikoni kuanza kutengeneza kifungua kinywa. Siku ya jumamosi huwa wanachelewa kuamka. Kwa hiyo Nanaa akaamua awatengenezee ‘brunch’ ya nguvu. Kulikuwa na maini kwenye friji ambayo hayakuwa yamepikwa. Akayatoa. Baada ya kuyakatia kitunguu swaumu na kitunguu maji, akayabandika jikoni na kuacha yakijipika. Akaanza kutengeneza chapati haraka haraka huku akifikiria kitu gani kingine chakupika. Akatengeneza na njegere. Alikuwa na mchanganyiko wa nyama ya kusaga aliokuwa amebakisha siku chache wakati anapika sambusa. Akafunga sambusa kama 20 tu kwa haraka. Kwa kuwa alijua Fili na baba yake wanapenda sana sambusa. Akaziacha baada ya kufunga ili zikauke kwa nje kidogo. Akatengeneza unga wa dengu. Kidogo tu kwenye kibakuli. Akajua atapata bajia zakutosha, kwa kuwa bajia zina mtindo wa kuumuka. Mpaka inafika saa tatu asubuhi, Nanaa alikuwa amejaza meza kwa vyakula vidogo vidogo tena vya hamu. 

Akarudi chumbani kwake kuoga. Akawa amekaa tu kitandani akisubiria. Saa 4 asubuhi kila mtu akawa ameamka. Vilijaa vicheko pale mezani. Danny akishangilia vitafunio. Akapiga picha kila kitu pale mezani, akatuma kwenye kundi lao la Whatsapp. Watu wakaanza kutuma jumbe zao kwenye kundi hilo. ‘Mko hotel gani, kaka?’ ‘Mbona mapema kaka?’ ‘Sherehe kama hizo huwa hatuachani Danny.’ Grace alikuwa anasoma zile jumbe huku wanacheka wote, kwani na yeye alikuwa kwenye hilo kundi. ‘Tupo nyumbani kwetu. Nanaa kapageuza hotel. Na hatutaki wageni.’ ‘Tumetoka mbali sana bwana Danny.’  Danny akawajibu. ‘Kuleni makwenu jamani! Leo jumamosi nataka kupumzika na mke wangu. Msitujalie huku kwetu. Tulieni.’ ‘Lazima mama atatoa exception kwa bwana harusi. Kwanza nina shida naye.’  Malii aliendelea. ‘Mama hayupo. Nipo mimi na Grace tu.’ Simu zikaanza kwa mama G. Aliposema tu yupo nyumbani. Kila mtu alitaka kufika hapo nyumbani. Mama G akawakaribisha. 

Geb na yeye alikuwa mmoja kwenye hilo kundi. Alipoona wote wanakaribishana nyumbani kwake, akamwambia Nanaa waondoke haraka kabla hawajawakuta pale. Lasivyo hawataweza tena kutoka. Nanaa akachukua pochi yake. Geb akachukua uji wake wakatoka. Baada ya lisaa limoja, tayari nyumba ya Geb ikawa imejaa. Kila mmoja ananjaa. Anataka chakula kwa mama G.

~~~~~~~~~~~~~~~~

“Naomba nikupe kazi moja. Lakini kuna masharti.” Geb alianzisha hayo mazungumzo wakati wanaelekea kazini siku hiyo ya jumamosi. Nanaa akacheka kidogo akamwangalia. “Mmh!” “Nataka ufikirie na uandike chini, kitu chochote. Namaanisha kitu chochote, ambacho unatamani kuwa nacho. Nikimaanisha mahitaji yako binafsi. Kuanzia asubuhi unapotoka kitandani mpaka unapoenda kulala. Kila kitu. Nataka ufikirie sasa hivi. Halafu tukifika kazini uandike wakati mimi nafanya kazi za jana. Andika kila kitu. Iwe mswaki, nguo za ndani, nguo za kuvaa kazini, nguo za kulalia, pochi, hereni, chochote. Sio lazima ukanionyesha. Labda utake mwenyewe. Lakini naomba andika kila kitu. Usiache kitu chochote. Mimi nitakuwa dereva wako leo. Unaweza kuvigawa kwenye mafungu. Ukasema kama leo ni nguo za ndani tu. Nitakupeleka kwenye hayo maduka. Ukanunue vile utakavyo, mimi nitalipia. Kama muda hautatosha, kesho tutaenda kwengine. Hivyo hivyo mpaka tumalize.” Nanaa akainama akifikiria.

Geb akamuona amekosa raha badala yakufurahia. “Umenielewa lakini?” “Sina kitu ninachotaka uninunulie Geb.” “Unanidanganya Nanaa. Mimi mwenyewe nina vitu nataka kununua. Sema naona uvivu kuzunguka madukani au sijipi muda. Na ninakumbuka uliniambia James anakuwa na majukumu mengi. Wakati mwingine unakuwa na shida, unashindwa hata kumwambia matatizo yako. Sasa nataka uniambie mimi.” Nanaa akakumbuka ni kweli alimwambia wakati wa safari ya Bagamoyo.

“Kwa hiyo naomba usinidanganye Nanaa. Labda uniambie hutaki.” “Sio kuwa sitaki. Ila sitaki tena nigeuke kuwa mzigo kwako. Yaani uone ni kama una mradi fulani wa kuufanyia kazi. Nakushukuru kwa hilo, lakini nimechoka kusaidiwa. Acha nitajinunulia tu mwenyewe.” “Kwa hiyo unayo mahitaji?” Nanaa akanyamaza. 

“Labda niulize hivi. Ni lini unampango wa kuyatimiza hayo mahitaji yako?” “Sijui Geb. Nikipata pesa. Sasa hivi kipaumbele ni kukusanya pesa kwa kadiri ya uwezo wangu. Ili niweze kujikimu baadaye. Najua navaa nguo za kawaida sana. Tena nanunua kwenye ile mitumba ya bei ya chini sana. Sinaga nguo za kulalia. Sio kwamba sijui kama kuna nguo maalumu za kulalia! Najua zipo. Naweza kuvaa nguo za ndani miaka na miaka. Sio kwamba sijui natakiwa kubadilisha kila baada ya muda mfupi. Nafahamu Geb. Najua kama kuna aina nzuri za nguo za ndani. Najua watu wanavaa za ma ‘designer’. Na ninawafahamu. Lakini mimi sijafika huko. Naogopa hata kuwaza huko kwa sasa. Sitaki kujiwekea mahitaji yakuja kuniumiza mimi mwenyewe baadaye. Nina mahitaji ya msingi kuliko kufikiria kununua nguo za kulalia wakati naweza kununua tisheti ninayoweza kuvaa darasani na pia nikalalia usiku. Sijui umenielewa? Naomba huko tusiende Geb. Ni papana, na parefu mno. Naogopa hata mimi mwenyewe kupaangalia.” Geb akamtizama na kunyamaza.

Walifika kazini. Geb akaegesha gari yake. Wakashuka. Walinzi walikuja kumsalimia. Nanaa akataka kuondoka kama kuwapisha, Geb akamuwahi kwa kumshika mkono. “Nisubiri twende wote.” Kisha akamvuta karibu yake na kuanza kumbusu, mbele ya wale walinzi! Nanaa alifurahia sana japo aliogopa. Geb ni mmiliki wa lile eneo. Na nikijana anayeheshimika sana pale. Inakuaje leo kumbusu hadharani mbele ya wafanyakazi wake! Hakuwahi hata kumuona akimbusu Liz kwa muda mrefu vile mbele za watu. Kwanza hakuwahi kumuona akimfanyia Liz vile mbele ya wafanyakazi wake. Alimuona akipewa busu na Liz, tena juu ya mdomo tu. Lakini yeye alimshika kiuno na kumvutia karibu yake na kumbusu bila haraka. Akamuachia, na kumwangalia kidogo. Akaendelea kuzungumza na wale walinzi. Akaagana nao.

“Twende nikaangalie huko stoo. Nataka kuzungumza na yule kiongozi wa mambo ya stoo.” “Leo jumamosi Geb.” Nanaa akamkumbusha. “Nilimwambia aje leo. Kuna uzembe mwingi unafanyika na yeye akionekana yupo kwenye payroll ya wafanyakazi. Sasa nataka kujua kama huwa anakuwepo kwenye majukumu yake! Na ni mlalamishi sana. Grace huwa hamuwezi.” Wakaongozana mpaka stoo ndogo tu waliyokuwa nayo ya hapo hapo ofisini, akiwa amemshika mkono Nanaa. 

Walimkuta akiwasubiri. Alikuwa mtu mzima kidogo. Mkubwa hata kwa Geb mwenyewe. Alikuwa na kijana mwengine anayefanya kazi hizo hizo za stoo, wote wawili walikuwa wakimsubiria Geb. Wakakaa naye chini. Yule kiongozi alikuwa na maneno mengi sana. Wote pale kazini walimjua ni mbishi na jeuri. Lakini Nanaa alishangaa vile Geb alivyokuwa akizungumza naye kwa kumuuliza maswali ya papo hapo mpaka akaishiwa maneno. Akakubali kosa. 

Kulikuwa na uwizi unaendelea kati yao. Na yeye ndiye aliyekuwa akituma madereva kudanganya. Anakuwa akikubaliana na madereva pindi wanaposhusha mzigo kuandikisha hata robo ya lori kuwa mazao hasa matunda yalifika yameharibika, yeye anayapakia kwenye gari yake aina ya pickup ndogo na kwenda kuwauzia wateja haohao wa Geb, lakini sehemu nyingine.

Geb aliambiwa na wateja wake kuwa meneja wake anawauzia mzigo kwa siri. Ndipo akazungumza naye. Baada ya kuzungumza naye kwa muda mrefu akibisha. Geb alimpigia simu mmoja wa wateja wake, akakiri kuuziwa naye matikiti jana yake usiku. Nanaa akashangaa sana. “Ni yale ya jana tuliyoyapakia Bagamoyo!?” Nanaa akauliza kwa mshangao. Geb akacheka. “Ona hasara mliyoandika tuliyoingia kwenye yale matikiti. Lakini huyu dereva mpya alinipigia simu jana jioni kuniambia mnaniibia sana. Yeye hawezi kukubali kosa la kuharibu mzigo njiani wakati anasema alifikisha mzigo wote salama. Tena aliwaonya na kuwaambia msidanganye kwa kuwa mimi mwenyewe nilihusika katika upakiaji. Na tukahakikisha yamekaa vizuri hakuna yatakayoharibika. Mkamwambia yeye anakazi ya kuyafikisha tu hapa.  Basi. Mambo mengine awaachie nyinyi.” Wakanyamaza.

Nanaa aliumia sana. Akamuhurumia Geb. Alimuona vile alivyoteseka jana yake kule mjini Bagamoyo. Kwanza alimka alfajiri. Akajinyima usingizi wake. Akaenda kufanya kazi, si kusimamia. Alifanya kazi kwa makini mpaka mwisho. “Wanawezaje kuiba kirahisi hivyo?” Nanaa akajiuliza. “Naomba tusifikishane mbali ndugu yangu. Mimi nitakwenda kukusanya pesa yote huko nilikouza hayo matunda. Nitakurudishia. Tamaa ndiyo iliniingia. Haitatokea tena.” Yule kiongozi wa stoo akakiri mwishoni. “Basi, pesa yote naomba mumkabidhi muhasibu.” Geb akasimama. “Twende Nanaa.” Wakaondoka.

~~~~~~~~~~~~~~~~

Geb alikuwa na godown kubwa tu alilokuwa akikodisha kutoka kwa tajiri mmoja wa kihindi, maeneo ya  Temeke, Kurasini. Hapo hapo jijini. Ndipo alipokuwa akihifadhia bidhaa zake zote. Lakini ofisi ambazo zilikuwa zikiendesha biashara hizo ambazo Grace ndio alikuwa akisimamia, zilikuwa maeneo ya Fire kama ukielekea Kariakoo. Walipata na stoo kubwa tu, iliyokuwa kama na cold room ili kufanya mazao yasiharibike. Hasa matunda. Waliweka baadhi ya mazao waliyokuwa wakiuza kwa wateja wao wadogo wadogo pale pale mjini. Kwa kuangalia uwekezaji wake tu, utajua ni kweli ni kijana mwenye kufikiria. Hakurupuki.

~~~~~~~~~~~~~~~~

Nanaa hakuamini. Akabaki akimtizama Geb. “Ndio basi!?” Geb akacheka. “Yaani huwafukuzi kazi! Unawasamehe!?” “Watu waaminifu ni wachache sana Nanaa. Wengi wakiwa kwenye hizo nafasi, ni rahisi kushawishika. Ataingia mwaminifu, baada ya muda huwa wanabadilika. Heri huyu nimeshajua ni mwizi, na nimeshajua jinsi ya kumdhibiti. Kuliko kuanza na mwingine mpya. Nitampunguzia majukumu. Na kuweka kamera hapo wanaposhusha mizigo. Screen yake itakuwa ofisini kwa Grace tu. Kila mzigo utakapokuwa ukishushwa, Grace atapata rikodi yake hata kesho yake. Kuanzia mazungumzo mpaka picha zenyewe. Nitaweka hapa na kule kwenye godown ya kurasini. Basi.” Nanaa akamshangaa sana Geb.  “Una akili wewe! Hongera Geb.” Geb akafungua mlango wa ofisini ya muhasibu.

Akamvutia Nanaa ndani. Akamkumbatia kwa nguvu kabisa. Karibu naye, kisha akaanza kumbusu tena. Alimbusu taratibu kisha akaacha kumbusu, akamwangalia akiwa bado mikononi mwake, tena karibu yake. Nanaa akacheka kwa aibu. “Nimefurahi umenibusu pale nje. Mbele ya walinzi! Nimeona raha.” Geb akacheka.

“Naomba usijifikirie kama wewe ni mzigo kwangu Nanaa. Najua unahistoria ngumu sana ya maisha. Naomba fungua moyo wako kupokea vitu vipya. Nilikwambia lazima ufungue moyo wako na ukubali kutambua na kupokea upendo mpya. Usifananishe watu na matukio ya nyuma. Sikuchukulii na ninakuahidi, sitakuchukulia wewe kama mradi wangu. Na mimi nitakuwa muwazi kwako. Nitakapochoka, au nitakapoona jambo litakuwa gumu kwangu, naahidi kukwambia.” Geb aligusa hisia za Nanaa. 

“Kweli?” Nanaa akauliza huku akilia baada ya kukumbuka masimango kwenye maisha yake. Ni James tu ndiye aliyembeba bila kuchoka. Lakini sasa hivi mama yake ameanza kumsimangia misaada anayopewa na James pia. “Nakuahidi hivyo, Nanaa. Chochote nitakachofanya kwako, ujue kipo ndani ya uwezo wangu. Kwa hiyo usiogope. Sawa?” “Sawa. Nakushukuru Geb.” Geb akambusu tena.

“Basi naomba tuangalie pamoja kule ‘kurefu na kupana sana’. Kule unakoogopa wewe kupaangalia, ukiwa peke yako.” Nanaa akaanza kutokwa tena na machozi, akiwa palepale mikononi mwa Geb. “Naomba uandike kila kitu. Hata kile unachoona ni cha kijinga sana. Hata kile unachoona ni cha garama sana. Naomba uandike tafadhali.” “Ni vingi Geb!” “Basi naomba uanze sasa hivi.” “Sawa.” Geb akambusu tena kwa muda huku amemkumbatia kwa kumvutia kwenye mwili wake. Kisha akamwachia. “Asante.” Nanaa akashukuru akiwa ameshatulia na tabasamu usoni. “Karibu” Akamvutia kiti pembeni ya kompyuta ya muhasibu alipojua atakuwa akifanya kazi. Wakakaa. Nanaa akaanza kuandika.

Akamuona ameinama anaandika huku anacheka. “Unacheka nini?” “Leo naenda kutupa vitu vingi sana vilivyokuwa vinanikera.” Geb akacheka. Akakumbuka ni muda mrefu umepita hakuwa amebadilisha nguo zake za ndani. Sidiria alizokuwa amenunua mtumbani alikuwa nazo zaidi ya miaka miwili. Tena tatu tu. Na zote zilikuwa nyeusi. Alijitahidi kuzitunza kwa kadiri ya uwezo wake. Chupi zilikuwa nyingi kidogo. Alizotenga kwa ajili ya kuvaa kipindi cha hedhi, na siku za kawaida. Alikuwa nazo tatu alizotenga za kutokea. Nazo zilikuwa ni za muda mrefu sana.

~~~~~~~~~~~~~~~~

Kwa asili yake hakuwa akichagua wanaume wenye pesa sana. Na alikuwa muoga kuonyesha anatanguliza pesa. Alijitahidi kuwaonyesha wanaume wote kuwa yeye ni mwanamke anayejua kubana matumizi. Na anafaa kuolewa na kuwekwa ndani. Kwa hiyo hata wao walipata aghueni wakawa hawajisumbui hata kumpa pesa za kujikimu. Zaidi ni pesa ndogo ndogo kama zakupandia daladala baada ya kulala nae. Hakuna aliyekuwa akimfikiria yeye kama Nanaa. Walitumia mwili huo mzuri, na kumuacha aende zake. Leo Geb anataka kubadili historia! Ilikuwa ngeni na mpya kabisa kwa Nanaa.

~~~~~~~~~~~~~~~~

Akainua macho akamwangalia Geb. “Vipi?” Geb akamgeukia. “Hata kama nataka kubadili mswaki niliokaa nao kwa muda mrefu, pia niandike?” Nanaa akauliza akiwa hana uhakika. “Andika kila kitu unachotaka.” Nanaa akacheka, akaendelea kuandika. Geb alimtizama kwa kumuhurumia. Akamuona ametulia kama amesita. Anang’ata kalamu. “Hata hicho unachosita kuandika, pia kiandike.” “Naona kama nimeandika vitu vingi sana! Inatosha Geb.” Nanaa akaonyesha wasiwasi. “Naomba andika Nanaa. Andika tu.” Nanaa akavuta pumzi kwa nguvu. Akabaki akifikiria.

“Unajua body spay?” Akamuuliza Geb. Geb akacheka. “Lakini haina ulazima.” Nanaa akainama. “Naomba uandike Nanaa.” “Nahisi ni tamaa tu. Nilimuona rafiki yangu Tia, aliletewa na Evan mpenzi wake. Nikapenda. Ila nitamaa tu. Nimeshaandika deodorant, inatosha. ” Geb akavuta kile kijitabu alichokuwa akiandika Nanaa, akaanza kuandika na yeye.

‘Body spry, perfume, nguo za kutokea usiku, pochi zake na viatu, Accessories, pochi ya kazini, pochi ya kanisani, pochi ya kawaida, sandals, viatu vya kanisani, nguo za kanisani, nguo za kushindia, na..” Geb akamkabidhi tena kile kijitabu kidogo na karatasi. “Vyote hivi!?” Nanaa akashangaa. “Sasa kwani wewe ulikuwa ukiandika nini hapo?” Nanaa akacheka. “Unataka nikusomee?” “Nisomee.” “Haya. Mswaki, dawa ya mswaki, sabuni ya kuogea, malapa,..” Akamuona Geb anaanza kucheka. “Bwana usinicheke Geb!” “Nimekwambia andika Nanaa. Kwa nini unanipa mahitaji ya vitu unavyoweza kupata dukani kwa Mangi?” “Naona itakuwa garama sana!” Geb akamgeuza kwenye kile kiti chakuzunguka.

“Niangalie mimi Nanaa na unisikilize kwa makini. Ninafanya kazi na nina biashara. Kwa sasa sina ndugu wala mtu anayenitegemea isipokuwa wewe tu. Mama anabiashara zake, zinamwingizia pesa nzuri tu yakumtosha mwenyewe. Grace na mume wake hivyo hivyo. Mimi sio kama James. Sina majukumu mazito. Nataka wewe uwe na kila kitu unachokitaka. Kila kitu. Kwa mfano kuna kipindi nilisoma kwenye kundi letu, James alituma ujumbe akiuliza kama kuna mtu anayo laptop anayotaka kuuza. Nikasoma majibu na maswali ya watu wengine na vile James alivyokuwa akijibu kuwa anatafuta laptop kwa bei nafuu, kwa ajili yako.” Nanaa akainama.

“Aliweza kukupatia laptop?” “Nilimwambia aache, nikawa natumia ya Zena. Majuzi akaniazima ya kwake ili nianze kuandikia ripoti.” “Sasa mbona hapo kwenye kidaftari chako sioni?” “Laptop!?” Nanaa akashangaa kwa sauti. “Ndiyo. Si unahitaji? Unafikiri utapataje sasa?” “Naona itaku..” Akanyamaza. Akainama na kuandika huku anang’ata meno. “Nimeandika.” “Naomba uandike kila kitu Nanaa. Acha woga.” Nanaa akainama nakuendelea kuandika tena mpaka akamaliza.

“Mimi nimeandika kila kitu. Haina maana nilazima uninunulie au..” “Nanaa! Mimi ndio nimetaka mahitaji yako. Acha mimi ndio niamue. Sasa unataka kunionyesha au unajua wapi pakuvipata nikusindikize?” “Naomba nikuonyeshe ili unishauri.” Geb akavuta kile kitabu. Akasoma mwanzo mpaka mwisho. Akamuona Geb anavigawa kwa makundi mpaka akamaliza.

“Sasa hapa na mimi nimeshamaliza. Nilikuwa napitia pitia tu kuona kazi za watu wengine. Kuna maduka maalumu unataka ukanunue hivi vitu?” “Mwezio nguo zangu mpaka sidiria huwa nanunua mtumbani. Nikitaka nguo nzuri yakutokea ndio naenda pale Magomeni kuna kaka mmoja namfahamu ndio ananiuzia magauni mazuri ya mtumba, kwa bei nafuuu.” “Naomba leo tusiende huko.” Geb aliongea kiustarabu kidogo.

          “Wanauza vitu kwa bei ya chini sana.” “Naelewa. Lakini nitakupeleka sehemu nyingine. Tuanzie kwenye hili duka, nalifahamu. Linauza nguo za ndani nzuri. Hata kama hufahamu saize yako, watakusaidia. Nina uhakika mpaka utoke hapo, utakuwa umepata chupi, sidiria na nguo za kulalia za kutosha. Lakini naomba nikuombe kitu kimoja Nanaa.” “Nini?” “Tafadhali usiangalie bei. Halafu ukachukua kitu kimoja kimoja sababu ya uoga wa bei. Wewe chagua vitu vya kutosha na utakavyopenda, halafu muachie yule muhudumu. Toka nje, mimi nitaingia kulipia. Tafadhali sana. Sitaki tena tuje turudi huko kila baada ya siku tatu. Mimi ni mvivu sana wa shopping. Nikinunua vitu huwa nanunua hata vya miezi, ili nisirudi tena madukani. Ukifanya hivyo itanisaidia sana. Sawa?” “Sawa.” Wakakubaliana na kutoka.

Mpaka inafika jioni wanarudi nyumbani, Nanaa alikuwa na robo tatu ya mahitaji yake. Wote walirudi wakiwa wamechoka. Lakini Nanaa alikuwa na furaha yakupitiliza. Alinunuliwa vitu vya thamani vitupu ambavyo hata hakuwa amevifikiria.

~~~~~~~~~~~~~~~~

Akaingia chumbani kwake akaviweka vile vitu kitandani kwake kisha akaenda kumuita mama G akiwa amefurahi sana. “Njoo nikuonyeshe vitu.” “Ulivyofurahi!” “Njoo haraka.” “Geb yuko wapi?” “Nimemuacha kwenye gari anaongea na simu. Njoo.” Akakuta amemwaga kila kitu kitandani. “Ona mavitu yote hayo nimenunuliwa mwenzio.” Mama G akaanza kucheka huku anasogelea kitanda cha Nanaa. 

“Nimepelekwa kwenye maduka ya maana matupu mama. Ona.” Nanaa akaanza kunyanyua kimoja baada ya kingine.“Ujue mwenzio sijawahi kuvaa vitu kama hivi!” Nanaa akaanza kulia. “Sijategemea mama!” “Usilie sasa. Wewe ukoje? Mwenzio amekununulia ufurahi, halafu aje akute unalia tena!?” “Sijawahi pata mtu ananijali hivi mama yangu.” “Kwa kuwa na wewe unamjali ndio maana. Sasa mbona hizi chupi sizielewi!? Au sio chupi?” Nanaa akaanza kucheka. “Bwana mama!” “Aaah! Naona vimikanda tu. Unavaaje sasa!?” Nanaa akazidi kucheka. 

“Huku ndiko kutembea uchi huku! Sasa kwa nini usinunue chupi nzuri, zinazokusitiri vizuri!?” “Angalia huo mfuko mwingine.” Mama G, akafungua. “Sasa hizi ndio chupi. Nguo za kulalia nzuri. Kila kitu kizuri.” “Sasa fungua mfuko huo mwingine. Ni wako.” “Wewe Nanaa vipi bwana!? Umepelekwa wewe, unaanza kununua vitu vya watu wengine!” “Ukiona zawadi yenyewe utaacha kulalamika.” Alimnunulia Mama G nguo nzuri mbili za kulalia. “Njoo kwanza nikukumbatie mwanangu. Nimependa kweli. Kwanza nilikuwa nikiona uvivu tu kwenda madukani. Kila siku Grace ananizungusha. Mara tutaenda kesho, mara leo jioni. Na mimi kuzunguka mwenyewe sipendi. Nakushukuru sana.” Nanaa akacheka. “Umeona sasa? Kama nilijua.” Geb akaingia akakuta Nanaa amekumbatiana na mama yake.  

Waliongea watatu hao wakicheka chumbani hapo kwa Nanaa. “Kina Grace wako wapi?” Geb akauliza. “Wameenda kuangalia nyumba yao.” “Sasa kwa nini na wewe hukwenda!?” “Danny anataka kututoa kwenda kuangalia sinema usiku. Kwa hiyo nikamwambia wao waende huko waniache mimi nipumzike mpaka baadaye wakirudi, ndio nitaongozana nao huko sinema.” Mama G akamjibu mwanae. “Lakini mimi na Nanaa tuna ratiba nyingine.” Geb akaongeza. “Mnaenda wapi?” “Namtoa kwa chakula cha usiku.” Nanaa akacheka. “Muone anavyofurahi.” Mama G akamgeukia Nanaa.

Usiku Wa Nanaa Na Geb.

Ilikuwa mida ya saa moja usiku wakati Nanaa na Geb wanatoka. Mpaka Grace akataka kumpiga picha Nanaa. Alipendeza sana. Alikuwa amenunuliwa na Geb, kigauni cha rangi ya damu ya mzee. Kigauni hicho kilikuwa kinafika juu ya magoti kisha kimechanua vyakutosha tu kuanzia chini ya kiuno kilichokuwa kimeshikiliwa na kiungio kama mkanda mweusi kwenye kiuno chembamba cha Nanaa. Juu kilikuwa hakina mikono, ila kilipita kitambaa kimoja kama kola. Kikazunguka shingoni na kuja kufunika matiti yake kwa mbele. Alinunuliwa kiatu cha sandals cha juu kidogo. Rangi nyeusi.

Alivuta nywele zake zote juu kabisa akazizungusha katikati. Alivaa hereni kubwa kidogo kwa kuwa hakuwa amevaa mkufu wowote. Akaweka lipstic nzuri nyekundu aliyokuwa amenunuliwa  mchana huo. Mkono wake wa kushoto alivaa bango kubwa sana la dhahabu iliyofanana na hereni. Nanaa aliwaka. Kila mtu alikuwa akimshangilia pale ndani.

“Kumbe mwanangu na wewe wamo!?” Nanaa akajificha uso. “Utajitoa sasa urembo. Acha kujishika usoni. Muone!” Mama G akamuwahi. Geb alimpitisha sehemu akanunu foundation waliyomjaribisha kwanza. Ikaendana na uso wake. Hakika Nanaa alikuwa amependeza.

Geb akatoka amevaa jinsi nzuri nyeusi na tisheti ya maruni kama Nanaa. Akavaa na blazer nyeusi. Nzuri sana. Akavaa sneakers za rangi ya kijivu, zilizoendana na mkanda aliovaa wa hiyo jinsi. Hakuna aliyemuona Geb huyu. Alikuwa ametulia, lakini usoni alionekana kuna tofauti. Alijawa furaha ya namna yake. Kitu kidogo alicheka mpaka akatoa sauti. Alikuwa akinukia pafyum nzuri sana ya kiume aina ya Creed. Ile harufu tu, ilisikika ni harufu ya pesa nyingi iliyomwagwa pale.

“Yaani mmependeza mpaka raha! Zaidi amani nafuraha usoni mwenu. Hivyo ndio vimeongeza mvuto.” Grace akasifia.  “Asante.” Nanaa akaitikia. “Lakini Nanaa unapungukiwa kitu.” Geb akamtizama akaona yupo vizuri. “Nini tena?” Geb akauliza. “Nyumba zima imejaa harufu nzuri ya Geb, lakini sio wewe.” “Mwenzio sijuagi pafyumu.” Nanaa akanong’ona. Wote wakacheka. 

“Geb amenipeleka leo kwenye maduka ya pafyumu. Nikasikia kutapika.” “Walimpulizia harufu nyingi sana mpaka akashindwa kuchagua.” Geb alimtetea. “Basi njoo upulizie ya kwangu. Huwezi kutoka hivihivi.” Grace akanyanyuka kuelekea chumbani kwao. Nanaa akamfuata. Geb akabaki akimsindikiza kwa macho. Kile kigauni kilichanua, lakini hakikuacha kuonyesha umbile la Nanaa. Baaada ya muda wakatoka chumbani. “Nitakuletea zawadi mama.” “Hapana Nanaa. Naomba ukatulize mawazo. Usiku wa leo ukajifikirie wewe tu. Usianze kuwaza huku tutakula nini, au itakuaje! Katulie ufurahie. Na sisi tutatoka sasa hivi. Tunamsubiria Fili aamke, tuondoke. Tutakula, na tutakuwa na wakati mzuri tu.” Nanaa akacheka. “Asante mama yangu.”

Mama G, Amrithisha Mkoba Nanaa, Bila Kujijua.

 “Na mimi kuna kitu nataka kukupa. Ulikataa cha Zinda, mimi mama yako huwezi kunikatalia.” Nanaa akacheka na kuuliza kwa utani. “Unataka kunipa nyumba?” Wote wakacheka sana. “Nanaa wewe mtundu sana!” Grace akadakia. “Nina sheni yangu nzuri sana ya dhahabu. Dhahabu nzuri sana. Nimekaa nayo kwa muda mrefu sana nikiitunza. Inaweza kuwa ina umri wa huyo Geb au zaidi kidogo. Nilikoitoa, nitakuja kukwambia siku nyingine. Ila nataka uitunze sana.” Wakaona Nanaa analia.

“Yaani huyu bwana!” Mama G akadakia. “Usilie sasa Nanaa. Furahia.” Grace akaongeza. “Basi hapo ataondoa urembo wote. Ushamba tu!” Mama G akamfanya Nanaa acheke huku akilia. “Ona ulivyotoa wanja machoni! Ukoje bwana Nanaa!?” Mama G aliendelea kuzungumza naye lakini Nanaa akaendelea kulia. Geb akamsogelea na kumkumbatia palepale mbele ya watu. “Nipe nimvalishe mimi au haiendani na nguo aliyovaa?” Geb akauliza. “Mimi nataka kuvaa sasa hivi. Sijawahi kuvaa dhahabu mwenzio.” Mpaka Danny akacheka. “Basi itabidi tutafute na hereni zake. Usilie sasa.” Geb akajaribu kumtuliza.

Mama G akaingia ndani na kwenda kumtolea hiyo cheni. Ilikuwa imewekwa kwenye kiboksi kizuri sana na cha thamani. Nanaa akaipokea na kuifungua huku Geb amemsimamia nyuma yake, amemkumbatia kiunoni. Ilikuwa nzuri na nzito. Pana na imekerezwa maua mazuri yaliyochanganywa na maua yenye staili ya moyo. Hakika ilikuwa nzuri. Nanaa akainama tena nakulia. “Ningejua wala nisingekupa sasa hivi!” Mama G akaongeza. 

Geb akaichukua na kuiweka shingoni mwa Nanaa. “Umependeza sana.” Geb akamsifia. “Asante mama.” Geb akashukuru mama yake. “Karibu.” Mama yake akajibu. Nanaa akaenda kumkumbatia. “Nanaa wa dhahabu!” Mama G akamchokoza. “Mbona nitalala nayo! Siivui mpaka mwili wangu uzoee dhahabu.” Nanaa akafanya wote wacheke. Akabaki anajiangalia. 

“Haya nendeni sasa. Mungu awajalie muwe na wakati mzuri.” Wakatoka. “Umependeza sana Nanaa.” Walimsikia Geb akimsifia. “Asante. Nakushukuru. Halafu na wewe umependeza. Unaonekana ulipata muda mzuri wa kupumzika.” “Wewe hukulala?” Geb akamuuliza. “Nilikuwa nahangaika kujipamba na kujaribisha vitu vyangu. Sijalala kwa furaha.” Wote wakacheka.

~~~~~~~~~~~~~~~~

Mambo Ya Nanaa Yanazidi Kunoga. Mama G, Ameonekana Kutoa Baraka Zake Zote Kwake. Hakuna Asiyempenda Nanaa Pale Ndani. Yale Aliyoyakataa Kwa Zinda, Anaanza Kuyapata Maradufu. Amani Hiyo Na Furaha Vinadumu Milele?

Usikose Kuwa Naye Kujua Anakopelekwa.

 Na Nini Kitaendelea Huko Kwenye Chakula Cha Usiku!