Ni Wangu! - Sehemu Ya 21.

“Huyo ndio Danny. Pale kwenye ile nyumba, wapangaji wote walikuwa wanatujua. Mpaka mtaani pale uswahilini mimi na Danny tulikuwa gumzo. Walikuwa wanasema ukimuona Danny yupo nje ya mlango wa bafuni, ujue Grace anaoga ndani na ukimuona Grace anapita, ujue Danny yupo nyuma au pembeni yake. Inategemea siku hiyo tunarudije. Akiwa ameniudhi huko nilipotoka, tunarudi nyumbani kwa Mama G, mimi nalia nipo mbele, yeye ananibembeleza yupo nyuma ananifuata. Hapo amenitoa kwa mwanaume, kafanya fujo, au kapigana, ndio tunarudi sasa nyumbani kushitakiana kwa mama.” Wakacheka.

“Basi, siku ya nne Danny hajarudi nyumbani, nikaanza kuchanganyikiwa. Danny hayupo na hatujui yuko wapi. Yule kijana hata akija kunisalimia, sitaki tena. Kila nikimfananisha na Danny, ni kama Mungu na shetani. Hawafanani hata kidogo. Gafla pakawa hamna tena mwanaume kama Danny hapa duniani. Nahangaika sasa. Si unajua tabia ya mama? Kimya mwenyewe ananiangalia ninavyohangaika.” Wakacheka kidogo.

“Sijui pakumpata Danny, chuo kilishaisha, wenzake wote walisharudi makwao. Najaribu sasa kuvuta kumbukumbu kujua kama Danny alishawahi kuniambia kama ana ndugu hapa Dar. Kumbukumbu hazinijii hata kama anawazazi au la, sijui. Kwa kuwa nilikuwa nampuuza. Simchukulii maanani. Hata akiongea tukiwa wawili, mawazo yalikuwa sio pale na yeye, nawaza mambo yangu. Kwa hiyo nikajikuta simfahamu Danny, mwanaume aliyekuwa kwenye maisha yangu zaidi ya miaka miwili. Tena kwa karibu.” Grace akatulia.

“Endelea!” “Nanaa kwa kupenda stori!” Danny akaingilia. “Ndio kazi yake hiyo. Basi anakazi ya kudodosa tu. Wewe uongee, yeye acheke au alie. Na hataki umfupishie stori.” Mama G akaongeza, wote wakacheka. “Basi, hali yangu ikazidi kuwa mbaya. Niliamka siku hiyo siwezi hata kutoka kitandani, nalia kama ninaumwa. Sitaki tena kwenda bafuni, Danny wakunibebea maji hayupo. Mama naye anajifanya hajui kinachoniliza, eti ananiambia nikupeleke hospitali? Nashindwa kujibu, nalia tu.” Wakacheka tena. 

“Kazini siwezi kwenda tena, kitandani siwezi kutoka. Nilishazoea nikiamka namkuta Danny kwenye makochi ananipeleka kuoga, halafu ananisindikiza kituoni, anasubiri mpaka nipande daladala ndio anaondoka. Na jioni siku za mvua, nilizoea nikimaliza kazi namkuta ananisubiri nje na mwamvuli na koti la mvua, ananivalisha koti, ananishikia mwamvuli nisilowe. Danny ndiye anajua kama sina dawa ya mswaki. Danny ndiye anajua natakiwa kubadili mswaki, ananinunulia. Danny ndiye anajua sabuni yangu ya kuogea kama imeisha anunue nyingine au la. Yaani nikajikuta Danny ndio anajua kila kitu changu. Vile vitu vidogo vidogo mwanadamu yeyote anavyohitaji, vya msingi kabisa kwenye maisha, ndio Danny alikuwa ananifanyia.” Grace akaendelea. 

“Si unajua hata kama unamamilioni ya pesa, nyumba na gari, lakini lazima utahitaji kuoga na maji, sabuni na lazima taulo. Kusafisha kinywa. Kwa hiyo pia ni lazima utahitaji mswaki na dawa ya mswaki. Na lazima uwe na malapa kwa sisi tuliokulia uswahilini. Bafu la watu wote. Lazima kuvaa malapa.” “Usisahau mashuka.” Mama G akaongeza. “Ehee, mama. Na mashuka. Vyote hivyo Danny ndio alikuwa mnunuaji. Akiona chochote kimekaa muda mrefu, akipata pesa tu, anaenda kubadilisha. Tena kama ni shuka, akinunua jipya, anakuja kututandikia kabisa. Hata kama mliamka mkatandika kitanda. Akinunua shuka lake, mtakuta limetandikwa kitandani. Sasa mtu wa hivyo huwezi kumlinganisha na mwenye ahadi ya gari hata siku moja. Danny hajui kuahidi kama vile alivyokuwa akikwambia Zinda. Yeye huwa ananiletea tu. Tena hata sikumbuki kama nilikuwa nikimwambia asante. Eti Danny?” Grace akauliza.

“Hivi nilikuwa hata nasema asante kweli?” “Mimi nilikuwa naangalia upande wangu tu. Nilikuwa najiambia lazima nikufanyie hiki. Nikikitimiza ndio ilikuwa furaha yangu, wala sikuwahi kuzingatia upande wako.” “Jamani! Lazima ulichanganyikiwa Grace. Huwezi kumpoteza mtu kama huyo hata iweje.” Nanaa akaongeza.

“Kwani nilichanganyikiwa kidogo? Nilikuwa nimechanganyikiwa haswa. Kumbukumbu zilikuwa zikinijia kwa kila kitu alichokuwa akinifanyia. Nikawa ninakazi ya kulia tu. Nakumbuka nilikuwa nimelala pale kitandani nalia. Sijaoga, sijala, wala mswaki sijapiga. Ilipofika  jioni hali yangu ikazidi kuwa mbaya, ikabidi kumuuliza mama kama katika mazungumzo yake na Danny, alimwambia kwao ni wapi. Mama akaharibu zaidi aliponiambia Danny ni yatima. Sijui alilelewa na mapadri, na hakumbuki ni wapi. Nilikaribia kuchanganyikiwa. Kumbe Danny ni yatima! Mimi nimemfukuza, basi nilizidi kulia.” Grace akaendelea.

“Siku inayofuata, nikaenda kuchukua likizo kazini. Nikawaambia naumwa, sitaweza kufanya kazi. Nikarudi nyumbani. Nililala siku tatu. Sitaki kula wala kunywa maji, nalia nalala, nalia nalala huku nikitegemea labda Danny atarudi, lakini wapi. Mama alivyo na tabia mbaya, eti akawa ananiacha kitandani, anaenda zake kwenye shuguli zake, akirudi anajinyamazia zake kimyaa. Akijitahidi sana, atanishika kichwa, eti anaangalia homa. Halafu utamsikia ananiambia, ‘lakini huna joto, itakuwa ni kuchoka tu’.” Wakajikuta wote wanacheka mpaka Mama G, mwenyewe.

“Sasa mama kwa nini hukuwa unamtuliza?” Nanaa akauliza. “Wewe hukumuona wakati ule namwambia amkubali Danny, halafu ukayasikia majibu yake. Basi na macho hayo kama ya baba yake, anasimama ananiambia, ‘niangalie vizuri mama. Nitazame juu mpaka chini, nilinganishe na Danny. Mimi sio mtu wakuolewa na mtu kama Danny bwana. Naliliwa na watu wamaana! Danny suruali moja!’ Basi maneno yalikuwa hayamwishi.” Mama G akaendelea huku wengine wanacheka.

“Nikawa namwambia, mimi nazijua pesa. Zikiwa mahali hazihitaji zisemewe, zinaongea zenyewe. Tena huwa zinakelele kweli. Hazihitaji mdomo wa mwanadamu. Haya nikawa namuona vile mwenzie anavyohangaika naye, namwambia Grace mwanangu, mimi nayajua maisha, wanaume kama Danny hawapo. Danny anakujali wewe. Basi majibu yake huyo Grace utasikia, ‘Wewe mama unayajua maisha, lakini hujayaishi bwana. Acha mimi niyaishi maisha.’ Basi ananitajia mahoteli anayopelekwa. Ahadi anazopewa. Nikasema basi ngoja nimwache mwenzangu ayaishi hayo maisha. Eti leo Danny kaondoka, anataka anitie matatizoni! Nikasema nimuache kwanza atie akili. Bwana Grace alikuwa analia kama kafiwa na mama yake mzazi! Basi mimi nilikuwa najifanya sijui. Naenda, namshika kichwa najidai nampima homa, huku moyoni namcheka na kumwambia akome.” Wote walicheka mpaka Danny.

“Lakini tokea mwanzoni, nilijua hatafika mbali. Nikajua hao wanaume wote wanahangaika naye tu. Wala hatawaweza.” “Kwa nini mama?” Nanaa akauliza tena. “Grace ni mwanangu. Namjua sana. Anapenda sana kupendwa na kufuatilizwa kwenye vitu vidogo vidogo. Hana tamaa ya maisha, labda akutane na mtu, amtie wazimu. Lakini hasumbuliwi na magari au nyumba. Ukimsikia anaongelea hayo mambo, ujue sio yeye anayeongea, kuna anayeongea huko akilini mwake. Yeye anataka akumbatiwe, ashikwe shikwe, abembelezwe basi.” Nanaa akacheka sana.

“Akiumwa na kichwa, asikwambie. Yaani unatakiwa wewe ujue tu kama kichwa chake kinamuuma. Akikasirika, ujue kilichomuudhi bila yeye kukwambia. Sasa kazi hiyo niliiona ni Danny peke yake ndiye anayeiweza kama sio mimi. Maana mimi niliwalea hawa wawili kwa pamoja. Tena kwa karibu sana ni kama sikusaidiwa hata na msichana wa kazi.” Mama G, akaendelea.

“Geb yeye anataka akuone wakati wote. Anaweza akawa na shida yake, asikwambie au hata asitake ujue, lakini atataka akitaka yeye kukuona akuone tu. Huyu dada mtu yeye, umfuatilize. Tena Grace anadeka kuliko hata Geb. Lakini watu wanasema Geb ndio mdekaji, lakini Grace ndio amezidi. Nilikuwa namwambia baba yake, sifikirii hata kuongeza mtoto mwingine sababu ya Grace. Nakuwa kama nina watoto wawili kwa wakati mmoja. Kuongea hawezi, basi wewe unakuwa na kazi yakumfuatiliza nyuma. Ujue kila kitu kinachoendelea kwenye maisha yake na umsaidie. Ukiona analia, ujue kuna ulipompuuza tu. Lakini si Geb.”

“Sasa alipokuja Danny, nikasema asante Mungu wangu. Nikajua huyu ndiye mume wa Grace. Maana kabla Grace hajalia shida, Danny ataitimiza. Hata kama hana pesa. Kwa kadiri ya Mungu atakachomjalia, atamsaidia. Na anamjua mkewe kwa kumwangalia tu. Tokea wapo chuoni. Sasa walipokuwa wanakuja wanaume hapa wanataka kumuoa Grace, na ahadi za magari na nyumba, nilikuwa nawajua kabisa hao sio. Nikawa nazidi kuthibitisha kuwa Danny ndio mumewe. Sasa uzuri mwingine Danny akawa ananisaidia, yeye hajui. Kila analoliona kwa Grace, anakuja kuniambia. Ikawa ni kama Mungu amenipunguzia mzigo, akampa hiyo kazi Danny.” Walizidi kucheka.

“Endelea Grace.” Nanaa alitaka Grace aendelee. Grace akacheka tena kidogo. “Yaani nyie mama ni mchokozi! Eti mwenzie nalia, yeye ananiuliza, ‘Ni lini sasa tunahamishwa kwenye hiyo nyumba ya mchumba wako?’ Basi ndio nazidi kulia, sitaki hata mama amtaje. Kwanza yeye ndio kasababisha Danny wangu aondoke. Sitaki hata kuiona sura yake.” Walizidi kucheka. 

“Nilipoona yananifika shingoni nikamwambia mama nahisi nisipomuona tena Danny, nitakufa. Eti mama anazidi kunichokoza ananikumbusha maneno yangu. Ananiambia, ‘Mimi naona uachane na Danny tu. Kwanza Danny masikini. Danny suruali moja! Achana naye. Twende hospitalini, ukaangaliwe afya yako, upone tuanze kujiandaa na kuhama hapa. Tufikirie maisha mapya tukiwa na nyumba na gari.’ Basi ndio ananikera zaidi nazidi kulia.” Watu wakazidi kucheka.

“Mama wewe!” Nanaa akashangaa huku anacheka. “Kumbe!” Mama G akajibu. “Na usifikiri anaongea hayo kwa kifupi. Anaongea mwenyewe huku anafanya shuguli zake hapo ndani wakati mwenzie nimelala, nalia. Eti ‘huu ndio wakati wa kuyaishi maisha bwana!’  Anajiongelesha huku anaingia na kutoka. Akaenda kuoga, akala, akapanda pale kitandani nilipolala. Akanishika tena kichwa, hapo nimeanza kupandisha homa kwa kulia. Eti ananiambia nimpe namba ya simu ya yule mchumba amuombe alete gari, anipeleke hospitalini.” Nanaa alizidi kucheka. 

“Yaani mama wewe!” Nanaa akaongeza. “Nilitaka nimwache mpaka akiri ujinga wake. Nikajidai kama sijui kinacho mliza.” “Ndio nikamwambia mama, mimi siumwi. Namlilia Danny. Namtaka Danny. Eti mama akajifanya kama gafla hamjui tena Danny. Eti ananiuliza Danny yupi? Eti yeye anakumbuka jina la yule mchumba niliyemletea haitwi Danny. Tena akaanza kunishauri, eti niwe makini sana na ninavyowataja majina yao. Nisije kuwachanganya, nikaachwa. Eti kupata wanaume wanaohonga magari na nyumba ni shida sana. Mimi nimebahatika, niwe makini, nisije kuishia kama yeye, nikashindwa kuyaishi maisha.” Walizidi kucheka.

“Nikajua ananikejeli tu. Nikawambia namtaka Danny huyu tuliyekuwa tukiishi naye. Akaniuliza sasa nyumba na gari? Hapo anazidi kuniliza. Nalia kweli. Nikamwambia mimi sitaki nyumba wala gari, namtaka Danny wangu. Mama akazidi kunikera sasa, si nilimwambia hajayaishi maisha? Sasa akaamua kunikomoa. Eti ananiambia nafanya maamuzi mabaya sana kwa kumchagua Danny. Sitayaishi maisha. Jamani nikaangua kilio zaidi. Namwambia hamna maisha bila Danny mama. Namtaka Danny. Lasivyo nitakufa. Nikawa nalia kwa kwikwi sinyamazi. Hapo ndio akanionea huruma,  akashauri niwatafute marafiki zake. Namba za simu sina. Mama akaongea na Geb, Geb akamtumia namba zote za marafiki zake Danny.” “Kwani yeye mwenyewe hakuwa na simu?” Nanaa akauliza.

“Hela ya simu atoe wapi wakati pesa yote anampa Grace?” Mama G akajibu nakufanya wote wacheke. “Hakuwa na simu. Basi mama akaanza kazi yakumpigia mmoja baada ya mwingine. Ndio akaambiwa Danny yupo kwa kina Zinda, Tabora. Anafanya biashara na baba yake Zinda. Anakusanya pesa, ili aje arudi chuoni asome sasa shahada yake ya pili. Nikaanza kukusanya mizigo yangu.” “Unaenda wapi sasa?” Nanaa akauliza. 

“Tabora kumfuata Danny! Nilikuwa siwezi tena kusubiri, na sikutaka aambiwe kuwa naenda, asije kunikimbia. Mama akamuomba Zinda, anisubiri kituo cha mabasi, nakwenda kesho yake. Basi, nikaamka asubuhi, nikawahi mabasi mpaka Tabora. Zinda akanipokea kituo cha mabasi. Ilishakuwa jioni, akaniambia Danny huwa anarudi usiku kutoka kwenye biashara zake na baba yake. Mama yake Zinda akanitayarishia chakula, sikuweza hata kula, nilikuwa nalia tu. Nikabaki namsuburia Danny. Hapo nalia kama nimefiwa, hakuna aliyekuwa ananielewa. Ikafika kama saa tatu usiku, ndio Danny akarudi.” Nanaa akamuhurumia.

“Nakumbuka alikuwa amechoka mwenyewe, halafu amekondaa gafla. Hakuamini aliponiona pale. Akaniambia nimsubiri aoge, halafu tuzungumze. Akaoga, akaniambia tuzungumze nje. Nilishindwa hata kuongea kwa furaha. Nililia mpaka basi. Akanichukua akaenda kunitafutia chumba, kwenye nyumba ya kulala wageni. Maana pale kwa kina Zinda kulikuwa kumejaa, hakuna hata pakukanyaga. Zinda akikwambia anakwenda kufuata wadogo zake kwao awalete mjini, usifikiri anakutania. Ni kweli anampango wakuwahamishia ndugu zake mjini. Kwa hiyo Nanaa ujiandae.” Nanaa alicheka mpaka machozi.

“Unacheka nini? Ndio ujiandae.” Mama G, akamchokoza. “Zinda hawezi kuwa mume wangu. Nilishamwambia, tokea tupo Marangu.” “Ndio maana alikuwa amepooza! Basi kila nikimuuliza Zinda vipi mwanangu, ananiambia maisha tu mama.” “Alituambia usiku uleule mimi na James. Kuwa Nanaa amemkataa. Amesema hayupo tayari kuolewa. Nikamuuliza kwa nini hakuomba hata wawe kwenye mahusiano? Akaniambia alimuomba, lakini Nanaa amemkataa katakata. Huku akisema mpaka amalize shule, ajiweke sawa kwenye maisha. Wakati huo bado hajatulia. Ndio James akajaribu kumuelezea wakati mgumu anaopitia Nanaa wakati huo, akaomba Nanaa aachwe kabisa. Lakini Zinda akanifuata baadaye akasema anahisi James anamkatalia tu kwa dada yake, kwani kama angetaka James, angeweza kuzungumza na Nanaa, akamkubalia. Akaniambia hata siku tuliyokuwa tukimnunulia vitu Nanaa, James hakuonekana kufurahia.” Danny aliongeza na kumshangaza Nanaa.

“Zinda alininunulia mimi vitu!?” Nanaa akauliza kwa mshangao sana. Geb akamtizama. Nanaa akajishitukia. Akamtizama Geb. “Sio kwamba navitaka jamani! Nauliza tu.” Nanaa akajitetea kwa sauti ya chini, akainama kuendelea kuangalia kidole cha Geb. “Unafikiri alikuwa akikudanganya alivyosema atakununulia viatu na magauni?” Danny akauliza, wote wakacheka kasoro Nanaa. “Mwenzio alikuwa hatanii. Sema tu hajui kutongoza. Pale walikuwa wakiendesha gari yake, kwa kusudi kwa kuwa ilibeba mizigo yako. Vyote alivyokutajia siku ile alinunua kweli. Ila akaongeza na maua. Mpaka nguo yakuvaa kwenye ile Sendoff ya mke wa Malii, alikununulia.” Danny akaongeza.

“Kukimbia kimbia kumekufanya ukose zawadi.” “Nisingepokea mama. Nisingeweza kumfanyia hivyo wakati nilijua wazi nisingemkubalia. Na yeye nilimwambia ukweli. Zinda ni mtu mzuri. Sikutaka kuja kumuumiza baadaye.” “Hukumpenda?” “Mama na wewe! Hayo ni maswali yetu tukiwa mimi na wewe tu? Mpaka watu wajue siri zetu?” Wakacheka sana.

“Si utuambie tu Nanaa! Na sisi tunataka kujua bwana. Kwa nini ulimkataa Zinda?” “Bwana Grace achana na mambo hayo. Tuendelee na stori ya Danny na wewe. Ndio nzuri, kwanza inafundisha.” “Anapenda stori huyu! Hapo mbona umemfikisha. Na hataki umalize. Ukimuendekeza Nanaa, mtalala hapa.” “Bwana mama! Usimfanye Grace agairi. Endelea mwaya Grace. Uliishia alikukodishia chumba.” Watu wote walicheka kwa pamoja.

“Si niliwaambia? Huyo kwa stori hamtamuweza. Anakumbuka neno kwa neno.” Mama G, akaongeza. “Mimi ndio msikilizaji mzuri. Si eti Grace? Naonyesha nakusikiliza kwa makini. Mwenzio najifunza. Endelea.” “Mmmh!” Mama G, akaguna. “Nini mama jamani? Endelea Grace.” Grace akacheka.

          “Basi. Nakumbuka Danny alitaka aondoke, aniache pale kwenye nyumba za kulala wageni, akaniambia atarudi asubuhi yake, lakini nilishindwa kumuachia. Nilikuwa nalia sana. Basi akapanda kitandani, tukalala akawa ananimbembeleza. Ndio kwa mara ya kwanza tokea aondoke, usiku huo nikalala.” “Si niliwaambia anapenda kubembelezwa? Basi hata umuudhi vipi Grace. Wewe mbembeleze tu. Tena usichoke. Akikufukuza ukaondoka, ndio umeharibu kabisa. Wewe hata akikufukuza, wewe endelea kubaki hapo mbembeleze kama Danny anavyomfanyiaga. Ndio anajua unamjali.” Wote wakacheka. 

“Na Danny anajua kubembeleza. Anaweza kukuudhi mpaka ukasema leo ndio mwisho wetu. Lakini akianza kukubembeleza, mwenyewe unasamehe.” “Mmmh!” Mama yake akaguna. “Sasa nini mama?” “Wewe endelea na stori, Nanaa asijekuniona mimi ndio mbaya. Maana usipomaliza, mimi leo sitalala. Atanifuata mimi mpaka kitandani kwangu nimalizie hiyo stori.” Wakacheka.

          Grace akaendelea. “Basi, asubuhi nikaamka nikamuona mwenyewe alishaamka kama kawaida yake, ameenda kuniombea maji ya moto ya kuoga. Ananisubiria niamke nikaoge. Akanipeleka bafuni, nikaoga. Tukarudi chumbani. Ndio nikamwambia nimemfuata. Nikamwambia sirudi Dar bila yeye. Kwa hiyo kama hataki kurudi nyumbani, basi atafute sehemu yakuishi na mimi palepale Tabora. Danny hakuamini. Basi tulikaa pale kama siku nne, akikusanya pesa yake na kuanza kumfahamu sasa. Kujua yeye ni nani. Kwao ni wapi, kabila gani na mambo yote, ndio tukarudi Dar. Hatukukaa sana, tukaamua kufunga ndoa kabla hata hajarudi tena chuoni. Basi, tukafunga ndoa. Harusi ilikuwa ndogo tu, ya pilau na soda, tena palepale kanisani. Tukarudi zetu nyumbani. Ndio tupo mpaka leo na Danny wangu tunazungushana.” “Daah! Hongereni sana. Kumbe mmetoka mbali!? Basi mtu akiwaona, ni kama mmeoana jana. Pale kazini hawaishi kusimulia habari zenu.” Wote wakacheka. 

 “Tena pale ndio wametuchoka. Akiamua Danny kuja kuwasha moto hapo, utafikiri nini sijui! Wateja wote mbona wanatufahamu! Fujo za Danny kila kukicha. Anaweza kuja pale kazini muda anaotaka yeye, hakwambii, utasikia mlango umefunguliwa. Sasa akukute unaongea na mteja mwanaume, umekaa naye peke yenu pale ofisini, mlango umefungwa. Weeee!” Wote walianza kucheka. 

“Ataanza kufanya fujo hapo, utafikiri amekufumania. Na heri mteja awe mstaarabu. Akifanya fujo, anaanza kurusha ngumi. Akiwa mstaarabu sio kwamba atamuacha, simu inapigwa kwa Geb, anamuuliza kama anamfahamu huyo mteja.” “Haiwezekani!” Nanaa akazidi kushangaa. “Wewe muone Danny katulia hapo hivyo hivyo. Yaani ukimuona Danny katulia kama hivyo, ujue macho yake yanamuona mkewe alipo. Akinyanyuka tu pale alipokaa, na yeye akili imeshavurugika. Iwe anaenda chooni au jikoni, anamuhesabia sekunde. Zikizidi tu sekunde alizomuwekea, na yeye anasimama, anamfuata mkewe popote alipo.” Mama G, akaongeza. 

“Tena anione nimekaa kweli. Sio nimekaa na simu mkononi, hapana. Anataka nikae kabisa nitulie tukae tunaangaliana hapa. Ndio anaweza hata kuangalia taarifa ya habari akaelewa au ukamuuliza swali akakujibu vizuri. La sivyo hii nyumba inakuaga ndogo. Anamtaka mkewe. Na hana yale majina ya sijui honey, sweet, sijui mpenzi, hana huo muda. Anachojua mkewe tu, tena tokea zamani hata hatujaoana.” Grace akaongeza.

          “Na ikifika swala la mkewe, huyo Grace anakuwa hana mama wala kaka. Anambadilikia kila mtu. Na anakuwa mkali kweli kweli. Basi nikiona tu simu yake, hata kama nipo kwenye kikao nilazima niipokee lasivyo utasikia nina mgeni. Na simu zake hazianzi na  salamu, ni swali moja kwa moja. Utasikia, ‘Unamfahamu mteja fulani?’ Hapo najua yupo ofisini kwa Grace, na mafaili yote ya huyo mteja yameshaagizwa aletewe. Kuanzia oda alizowahi kuzitoa, ulipaji wake, yaani kila kitu anataka kiletwe.” “Sasa aletewe wapi?” Nanaa akamuuliza Geb. “Hapo hapo ofisini kwa Grace, tena mbele ya huyo mteja. Ili kuthibitisha kama kweli yeye ni mteja, na kweli anashida na mzigo sio kwamba anamtaka mkewe.” “Sasa mteja anasemaje?” “Huna utakachosema kwa Danny linapofika swala la mkewe. Hapo anawaka kama moto. Kazi zote zinasimama hapo ofisini mpaka mafaili yote yaletwe, yeye mwenyewe ajiridhishe na huyo mteja.” Mama G akajibu yeye.

“Na usifikiri akijiridhisha ndio inaisha. Anapiga tena simu kwangu. Hapo ananibadilikia, utafikiri hatufahamiani, au hatuishi nyumba moja au huyo mkewe sio pacha mwenzangu. Anaanza sasa, ‘Nisikilize vizuri Geb. Kama biashara imekushinda, acha. Tulia kazini. Acha kutumia uzuri wa mke wangu kukuingizia pesa. Utaniona mbaya kabisa.’ Hapo ataniwakia kwenye simu, anakutukana, anakutisha, mpaka ajiridhishe ndio anakata simu.” Nanaa alizidi kucheka wakati Geb anasimulia.

“Sasa Grace anasemaje?” Nanaa akauliza. “Inategemea na mimi siku hiyo amenikutaje. Nikiwa vibaya, nakusanya vitu vyangu pale ofisini wakati anafanya fujo zake, naenda kwa mama. Kama yupo nyumbani narudi nyumbani. Kama yupo kazini kwake, nitaenda. Popote alipo mama ndipo nitakapokwenda. Basi nitalia weee. Utafikiri ndio mwisho wetu. Basi muda haupiti na yeye ananifuata. Hapo anakuwa ameniletea zawadi ya kitu chochote kunituliza.” “Na akiingia hapo Danny, utafikiri wanamsingizia. Anakuwa mpole kweli kwa mkewe. Atamtuliza wee kwa maneno mengi utafikiri kakosewa na mtu mwingine. Yale aliyoyafanya kule hatayasema kabisa. Anaweza kumchagua Geb kuwa ndio mbaya wao, anataka kuwavunjia penzi lao au yeyote yule. Atambembeleza mkewe hapo, huku anamsema Geb. Utasikia, ‘Geb anataka kutuchonganisha mke wangu. Anataka kukuuza kwa wanaume wengine sababu ya kujipatia pesa. Geb anaroho ya wivu, hafurahii kutuona tunavyopendana. Nyamaza mke wangu’ Yaani Grace anaishia kucheka tu.” Mama G akaongezea nakufanya wote wacheke.

“Lazima ucheke. Eti anakubembeleza hasemi ugomvi aliouanzisha yeye kule kazini, au aibu aliyokutia mbele za watu, eti lawama zote anamtupia mtu. Tokea tupo chuo, kazi yake ni hiyo hiyo. Anakutoa hotelini kwa kupigana kama amekufumania, basi aibu kweli, nalia, hana pesa ya taksii, mnaishia kupanda daladala tunarudi chuo au kwa mama kusemeana. Umeenda hotelini na gari, umependeza, unatolewa kwa aibu, kama umefumaniwa! Na hapo anatangaza mimi ni mkewe, sio hata mchumba, mkewe. Halafu heri akukodishie taksii kukurudisha nyumbani, mnapanda naye daladala. Kwenye daladala si ninaendelea kulia, yeye ananiambia, ‘pole mke wangu. Mungu yupo, ipo siku na sisi tutakuwa na gari yetu. Nitakupeleka kwenye mahoteli makubwa, tutakuwa tunakula na kulala huko huko.’ Basi nazidi kulia. Aibu mara mbili. Watu wote kwenye daladala wanajua unalilia kupanda gari, kumbe katoka kunifanyia fujo.” Nanaa alikuwa anacheka mpaka machozi. 

“Basi wakifika hapo nyumbani, Grace akiingia analia, na Danny anafuata nyuma, najua tayari. Kashamtoa mkewe mahali.” “Sasa mama ulikuwa unawaambiaje?” “Ndio unaanza kusikiliza tena kesi, lakini Danny hathubutu kukupa nafasi yakuingilia ugomvi wake. Utafikiri anayesemwa hapo na Grace ni mtu mwingine sio yeye. Yeye ndio yupo mstari wa mbele kumtuliza Grace, tena hapo anamwita mkewe. Wataongea wawili hapo Grace analia huku anagomba, Danny kajishusha kweli kweli. Mpole kama yeye hamna. Kila anachoongea Grace anaitikia, huku anambembeleza, mpaka Grace anaishia kucheka. Asubuhi wanaondoka tena kurudi chuoni. Naweza kutulia siku mbili au tatu, utawasikia tena hao wamerudi, au utasikia mtoto anakuja mlangoni kwako huku anakimbia, utasikia, ‘Mama G! Mama G! Grace na Danny wanakuja.’ Basi tena hapo natafuta mahali pazuri, nakaa. Najua kesi inaanza.” “Kwa hiyo mpaka watoto walikuwa wanawajua!?” Nanaa akauliza. 

“Mpaka vitoto vidogo vilikuwa vinatujua. Wakimuona Danny anapita, wanamuuliza dada Grace yuko wapi, au mimi nikipita, watamuulizia kaka Danny! Kila mtu alikuwa akitujua pale mtaani. Maji yangu ya kuoga anayafuata Danny bombani. Na wakati mwingine anafika amechelewa anakuta watu wapo bombani. Utasikia naombeni mniruhusu nichote ndoo moja tu. Basi watu wanamuuliza, ‘ya Grace?’” Nanaa akacheka. “Yaani walishatujua. Kila siku mimi na Danny ni vituko tu.” Waliendelea kucheka.

“Yaani hata hii kazi kama Geb angekuwa sio ndugu yangu, mbona angeshanifukuza muda mrefu sana! Fujo zikianza pale, kuna wateja wanafukuzwa, kuna wanaojibiwa vibaya, yaani ni fujo mpaka mama akanishauri nisiwe nafunga mlango wa ofisi. Kwa hiyo siku hizi mlango wa ofisi yangu haufungwi. Nikiingia tu naacha mlango wazi kabisa, ili akija awe anaona ninayezungumza naye huko ndani.” Grace akaendelea.

“Na akifika tu, hana salamu. Anaenda moja kwa moja kwa mteja, anajitambulisha kuwa yeye ni mume wangu na tumeshazaa mtoto mmoja. Basi wakati mwingine ni aibu. Unakuta upo na mteja wa maana, na heshima zake, Danny naye anaingia. Unatamani kumficha huyo mteja. Mara Geb anapigiwa anaanza kugombeshwa na kuulizwa majukumu yangu.” “Hilo swali nishalizoea. Kila siku naulizwa kwani kazi za Grace pale ni zipi. Naelezea. Mama akaniambia nimwandikie Danny nimpe ili ajue majukumu ya mkewe. Lakini akikasirika hakumbuki. Na usithubutu kumwambia nilikuandikia. Hapo utajuta. Ni heri akikuuliza wewe umtajie tu. Mkewe anaingia nakutoka kazini siku na muda anaotaka yeye Danny, na usimuulize. Ukimuuliza mbona Grace hajafika kazini mpaka sasa hivi, upo naye? Utasikia, ‘kwani wewe wakati unamwajiri, hukujua kama Grace ameolewa? Grace anamajukumu ya muhimu sana kuliko hiyo kazi yako’.” Nanaa akazidi kucheka.

“Basi hapo inabidi kumpigia simu mama, utasikia Grace yupo chumbani analia, mumewe kamkataza kwenda kazini. Labda utaambiwa siku hiyo alitoka na nguo yakumbana. Kwa hiyo amehisi siku hiyo Grace atakuwa kuna anapokwenda au kuna mtu atakwenda pale ofisini kwake, kwa hiyo Grace ameambiwa asitoke humu ndani. Hapo ukute kuna kitu cha muhimu ulitaka Grace afanye siku hiyo, ila mumewe kasema asiende kazini. Na ukizidi kumuuliza anakwambia ukizidi kumkera, mkewe anaacha kazi. Basi inabidi siku hiyo ufanye kazi mara mbili. Nitoke ofisini kwangu, niende tena ofisini kwa Grace kufanya kazi zake. Ukija hapa nyumbani Grace naye analia amemnunia mumewe, mumewe anakulaumu wewe, halafu umechoka! Utajuta kumuajiri Grace. Unatamani kumfukuza kazi, lakini huwezi. Mama anakwambia wavumilie tu.” Waliendelea kuongea hapo huku wakicheka.

~~~~~~~~~~~~~

Nanaa akarudi kwenye kidole cha Geb. “Kinauma?” Nanaa akauliza kwa upendo. “Wala sisikii kitu!” Nanaa akacheka. “Utanifanya nilale hapa hapa kama Fili!” “Mbona natumia nguvu nyingi!” “Ona mikono yako inavyotetemeka! Inatoa jasho kwa woga.” “Naona kama nitakuumiza!” “Huniumizi Nanaa. Acha woga.” “Haya. Lakini nikikuumiza, naomba uniambie.” Geb akacheka. “Usicheke bwana!” “Kila wakati unarudia kusema hivyo hivyo, lakini hunitoi huo mwiba!” “Sasa hivi nakutoa.” Nanaa akajifuta jasho la kwenye viganja vyake, Geb akaanza kucheka. 

“Nakwambia huyo nesi wa Geb anavyohangaika! Yeye ndio ana maumivu kuliko mgonjwa!” Wote wakacheka na kuwageukia. “Naogopa mama!” “Basi hutautoa huo mwiba! Mtakesha hapo.” “Sasa hivi nautoa.” Akasogea karibu akaendelea kumtoa mwiba huku Geb akimwangalia.

Mtu Chake.

Sababu yakucheka na stori nyingi pale, hawakusikia hata geti likifunguliwa. Wakashitukia Liz ameingia. Watu wote wakanyamaza. Nanaa akaachia mkono wa Geb taratibu, akajisogeza pembeni kwa tahadhari. Liz akasimama pale kwa muda akishangaa aina ile ya mkao wa Nanaa na Geb. Nanaa akaingiwa na hofu mpaka Geb akajua.

~~~~~~~~~~~~~

Akiwa na ahadi ya kulindwa asilie, na kama atalia basi atafutwa machozi. Hata siku haijaisha, historia inataka kujirudia. Mwenye mali amerudi. Liz aliyeanza kumtilia mashaka Nanaa, amemkuta amekaa karibu na mpenzi wake. Ilikuwa sweta la Geb, leo ni mkono wake.

Kipi Chakujitetea Tena Juu Ya Mkono Wake Mikononi Mwa Nanaa?

Amani na furaha iliyokuwepo pale, gafla imepotea baada ya mwenye mmpenzi kuingia. Ni kweli wengine wamemzoea na kumfahamu tabia zake. Lakini anamnyima raha Nanaa kitu kinachomfanya Nanaa kutaka kuhama pale. Na amekwisha kumwambia Geb jinsi asivyopenda kumnyima raha mpenzi wake. Ni heri yeye aondoke. Na Geb ameshindwa kuishi mle ndani bila Nanaa.

Ni Nini Geb Atafanya Usiku Huo Katikati Ya Wanawake Hao Wawili?

NANI WA NANI?

 

Usikose Kufuatilia…...