Ni Wangu! - Sehemu Ya 20.

Aliamka jioni, akatoka pale chumbani. Alikuta kila mtu amekaa upande wa sebuleni. Yeye akaenda kukaa  sehemu yakulia chakula. Geb akamwangalia. “Vipi uchovu umeisha?” Nanaa akatingisha kichwa kukubali huku akitabasamu. “Njoo ukae hapa.” Alimuonyeshea pembeni yake. Nanaa akasita kidogo. Akaangalia watu wote waliokuwa wamekaa pale, akaogopa. “Hapa panatosha.” “Basi ngoja mimi nikufuate.” Nanaa akasimama kwa haraka akaenda kukaa naye kabla yeye Geb hajasimama kumfuata. Geb akatabasamu.

“Mbona unajisugua kidole?” Nanaa akamuuliza kwa sauti ya chini. “Nahisi nilichomwa na mwiba muda mrefu. Pameanza kuwasha.” “Tuone.” Nanaa akamvuta mkono taratibu. Akaangalia. “Naona kuna kitu cheusi kwa ndani. Itakuwa mwiba. Upo ndani kidogo. Utavumilia nikutoe?” “Nitashukuru. Unanikera kweli!” Nanaa akaenda kuchukua pini chumbani kwake, akarudi kukaa pembeni yake. Akaanza kumtoa ule mwiba taratibu. “Nikikuumiza uniambie.” Geb akacheka. “Unavyoshika kwa woga! Sijui kama huo mwimba utatoka.” “Naogopa kukuumiza!” Akaendelea kumtoa huku wengine wakiendelea kuangalia tv palepale sebuleni. Alijua wazi wanawasikiliza.

~~~~~~~~~~~

 “Nasikia Nanaa leo umepelekwa Bagamoyo?” Grace alitupia swali, Nanaa akacheka. “Lakini wala hatukukaa sana. Tulikuta ndio wanamalizia kupakia.” Nanaa akajibu. “Na mimi nilijaribu kuwa na kwenda kuangalia upakizwaji wa mazao, lakini nikashindwa.” Nanaa akashangaa kuona wote wanaanza kucheka. “Kwa nini!?” Nanaa akauliza. “Yaani Nanaa, si unaaga hapa. Unasema unapokwenda na pengine muda utakao rudi kama watamaliza mapema. Unakubaliwa vizuri. Unasindikizwa mpaka kwenye gari, hata mkanda unaweza kufungwa, na maneno mazuri ya kutakiwa safari njema, ‘Mungu akurudishe salama mke wangu. Tukumbuke mimi na Fili, tunakupenda na tunakuhitaji.’ Na maneno mengi mazuri, mengi tu. Haya, unafungiwa mlango wa gari vizuri, unawasha gari unaondoka.” Grace akacheka yeye mwenyewe.

“Nini?” Nanaa akauliza huku na yeye ameanza kucheka. “Danny nyie! Acheni tu. Yaani wakati unatoka tu hapo getini, unamuona kwa kutumia vioo vya gari, simu zinaanza. ‘Unarudi saa ngapi?’ Unarudia tena maelezo yote uliyoyatoa jana yake na muda mfupi wakati mnaagana. Haya. Ukifika tu kwenye hayo mataa ya kwanza hapo barabarani, simu nyingine. ‘Umefikia wapi?’ Swali la kwanza na la pili huwa halina shida, ila hayo yanayofuata kuanzia hapo, lazima ukereke tu. Utasikia, ‘mbona kama hapo ulipo pako kimya?’ Unajibu labda nimesimama kwenye mataa. Utasikia tena, ‘mbona hata sisikii mlio wa gari?’ Ujue hapo kazi ndio imeanza.” Watu walizidi kucheka. 

“Yaani hapo nimeondoka nyumbani hata dakika kumi hazijaisha, tayari kelele zimeanza. Mpaka uje ufike huko, njia nzima ni maneno. Unafika umenuna, huwezi kuongea na wafanyakazi. Na ukikaa hapo shamba, nusu saa nyingi, na yeye anakuwa amefika.” Nanaa alikuwa anacheka sana, ila akatulia na kushangaa. “Haiwezekani Grace! Sasa anatumia njia gani kufika mpaka Bagamoyo? Kulivyo mbali hivyo!” “Wewe humjui Danny na kichwa chake. Yaani ile simu ya 3 kuwa mbona hasikii mlio hata wa gari, ujue hapo na yeye anavaa nguo, ananifuata.” Wote walikuwa wakicheka. 

“Sasa na yeye kazini inakuwaje?” Nanaa akauliza. “Kazi gani tena? Wewe unafanya kazi wakati unaibiwa mkeo? Kazi itasubiri kwanza.” Danny akajibu. “Huna utakalomwambia Danny kwa mkewe mkaelewana.” Mama yao akaongeza. “Mimi na Geb tulishajua. Grace akitoka tu, ujue Danny atafuata nyuma. Yaani umtume mkewe Bagamoyo! Humtakii mema Danny.” Nanaa alizidi kucheka huku akishangaa.

“Alivumilia mara ya kwanza na ya pili. Ya tatu, akamfuata Geb. Eti aache kumvunjia ndoa yake.” Walikuwa wakicheka sana. “Na usifikiri anatania? Yaani hapo kanifuata amenikasirikia kweli kweli. Eti kama shida yangu aachwe, yeye ahangaike na mtoto hapa mjini, basi niendelee kumtuma mkewe mashambani. Nakuwa kama namuuza mkewe kwa watu. Eti nashindwa kufikiria swala la usalama wa mkewe, namtuma kwa wanaume. Kama ni pesa, eti basi. Hapo Danny kawaka kweli kweli. Unajua alinitoa kazini akanituma nikamfuate mkewe nimrudishe nyumbani?” “Haiwezekani! Sasa ulienda?” Nanaa hakuwa akiamini, akamuuliza Geb kwa mshangao. 

“Unacheza na Danny wewe? Hivyo hapo ni kwa kuwa hakuwa akipafahamu alipo mkewe, lasivyo angeenda mwenyewe. Ikabidi niage ofisini nimfuate Grace. Kwanza alinipa dakika kumi ya kuondoka pale nikamfuate mkewe, lasivyo angewasha moto majengo yote yale ya BOT.” “Haiwezekani!” “Humjui Danny wewe. Hapo kaja na kiberiti, kakishika mkononi.” Danny alikuwa kimya kama sio yeye. 

“Kwanza nilikuwa kwenye kikao, simu nimeacha ofisini. Nilipokuja kuitwa kwenye kikao kuwa Danny anataka kuniona, nikaanza kujipapasa mifukoni kuangalia simu yangu. Nikajua atakuwa amenipigia amenikosa ndio maana yupo pale. Haraka sana nikaanza kujiuliza alipo Grace, nikakumbuka alisema angeenda Bagamoyo. Basi nikatoka pale nikiwa nimeshajiandaa. Nimefika tu pale, akanitupia swali, eti ‘hivi wewe Geb, tatizo lako ni kwamba hujui kutangaza biashara yako au simfikirii yeye na mwanae, Fili?’ Nikatulia kwanza sikujibu kwa haraka, kwa kuwa alikuwa amekasirika sana. Nikabaki kimya.” Geb akaendelea.

“Eti akaniambia kuwa najua wazi kuwa mkewe anavutia. Hakuna mwanaume atakayemuona Grace asimtamani. Eti akiwa amekaa tu huyo mkewe anavutia usoni, akisimama ndio kabisaa. Hakuna mwanaume atakayeacha kumtamani mkewe, hata kipofu akisikia sauti ya mkewe atataka kumshika mkewe.” Wote walikuwa wanacheka.

“Usifikiri maneno hayo Danny anaongea akiwa amekaa, ni amesimama, anawaka kama moto. Sasa hapo najiuliza moyoni, sijui Danny kama hapo alipo wakati huo anaponigombesha najiuliza hakuna kweli wazo hata moja linalopita na kumkumbusha kuwa Grace ni dada yangu, tena pacha!? Sasa zile sifa anazozisema za mkewe, hajui kuwa anamwambia kaka yake? Huku natamani kumjibu kuwa labda huo uzuri wa mkewe anauona yeye tu, wanaume wengine hawauoni, lakini sikuthubutu, nikajua utakuwa ugomvi mkubwa zaidi.” Geb akaendelea.

“Hapo ananitukana na kunigombesha eti kwa kuwa nimeshindwa kufanya biashara zangu, ndio nimeona nitumie uzuri wa mkewe kujipatia wateja. Sasa hapo ni kelele, na amenitoa katikati ya kikao. Nikamuomba kiustarabu, nikamwambia, naomba tukazungumze nyumbani. Wewewewe, ndio niliharibu zaidi. Akaniambia, ananipa dakika kumi, niwe nimetoka pale nikamfuate mkewe popote nilipomtuma. Nimletee mkewe ndipo tutazungumza. Lasivyo hata ikizidi sekunde, anawasha moto lile jengo lote. Hapo katoa kiberiti. Na ananiambia nimebakiza dakika 9, niwe nimetoka pale. Haraka sana anamtaka mkewe.” Walikuwa wanacheka sana. Nanaa ndio alikuwa anafuta machozi.

“Sasa kwa nini usimpigie simu Grace mwenyewe umwambie arudi?” “Hapo Grace mwenyewe kakasirika kweli kweli. Danny kashamchemsha kwa maswali kuanzia anaondoka mpaka anafika huko. Mara amesikia sauti ya mwanaume pembeni yake. Mara kama amesikia sauti kama yupo kwenye chumba kitulivu, ilimradi tu. Sasa Grace hapo na yeye kashakasirika anawazimia simu wote au hapokei simu ya mtu. Hataki kurudi mpaka akamilishe kazi yake, na Danny naye anamtaka mkewe. Basi hapo ni shuguli. Simu zinapigwa kila mahali mpaka kwa mama.” 

“Sasa na mimi huko kazini kwangu shuguli sio ndogo. Grace anapiga simu analia, Geb naye anakwambia Danny amemwambia akamfuate mkewe, na alikuwa kwenye mkutano, sasa bado simu ya mwenye mke. Hapo ndio utachoka. Utasikia ‘mama, si unayajua maumbile ya mke wangu yanavyotamanisha?’” Watu walizidi kucheka.

“Basi mimi namjibu taratibu maana hapo anawaka kweli kweli, namwambia ‘Sijui mwanangu.’ Kidogo ndio anashituka kuwa anaongea na mama yake Grace, anatulia. Lawama zinahamia kwa Geb. Geb anamuuza mkewe kwa wanaume. Geb sio muungwana. Geb anashindwa kumfikiria yeye na Fili. Mkewe akiwaacha yeye ataleaje mtoto peke yake. Yeye ni yatima, hataki maisha aliyoishi yeye ndio Fili ayaishi. Geb anaweka pesa mbele kuliko utu.  Hapo atalalamika mpaka wafike Bagamoyo amuone mkewe ndio anakata simu.” “Bagamoyo tena!?” Nanaa akauliza.

 “Kwani wewe unafikiri  aliponituma kumfuata mkewe Bagamoyo yeye alibaki?  Tuliongozana naye mpaka Bagamoyo akamuone mkewe.” “Haiwezekani!” Nanaa hakuwa akiamini. “Hujamjua Danny. Hapo tena wewe adui. Unamuuza mkewe, hawezi kukuamini tena. Kwanza haamini mtu na mkewe. Hataki umsifie mkewe hata kidogo. Mbona kina James wanajua. Ukitaka ugomvi na Danny, anza kumsifia mkewe. Hapo utamjua yeye ni nani.Wewe utakuja kumuona tu. Si Upo hapa? Utamuona, na hana aibu yeyote linapofika swala la mkewe.”

"Basi huyo Grace anakuwa anarudishwa nyumbani kutoka Bagamoyo na msafara. Yeye Grace mbele, mumewe anafuata, halafu mimi nafuata nyuma nikishamalizana na watu huko shamba. Hapo kashanitukana mbele ya mkewe, kama ni mshahara ninao mlipa mkewe, nisimbambaishe nao. Na yeye pesa anayo, anauwezo wa kumlipa mkewe, tena kwa dola. Niache dharau. Magari matatu au watu watatu tumeenda kufanya kazi ya mtu mmoja! Na sio kwamba wengine hatuna kazi, tumeacha kazi maofisini kwetu, tumemfuata Grace.  Ndio mama akasema niwe naenda mwenyewe, nisimtume tena Grace. Ndio pakatulia.” Walizidi kucheka.

“Lakini niliona hata tulipokuwa safarini kuelekea Marangu. Sikuwa nimeelewa. Grace alijidai kama anatuma ujumbe. Kumbe anataka mumewe ahamie pale alipokaa.” “Ehee! Unakumbuka alivyotaka nisimamishe gari katikati ya barabara?” Geb akauliza. “Mimi mwenyewe niliogopa mama. Ilikuwa katikati ya barabara kubwa. Magari makubwa na madogo yanapita kwa kasi kweli!” Nanaa akaongeza.

“Basi pale nisingesimama hata dakika moja mbele, ungeshuhudia varangati yake. Ikifika swala la mkewe, Danny ubinadamu unamuisha.” “Yaani huyu, raha yake anione nimekaa hapa kama mjinga. Sijui yukoje Danny?” “Mimi nawafahamu wanaume wa mjini bwana. Hawakawii kunipora halafu maisha yote yakakosa ladha. Mwanangu akakua hana mama.” “Kwa nini uporwe bwana? Kwani mimi sina akili?” “Shetani yupo kama simba angurumae. Hachoki.” “Mimi nilijua akishanioa labda tutapumzika. Lakini naona ndio vinazidi.” Walizidi kucheka.

          Kabla Ya Ndoa Yao.

 “Danny!” Grace akamuita mumewe na kuanza kucheka. “Danny! Unakumbuka yule mwanaume wangu wakati tupo chuoni?” “Yupi?” Grace akazidi kucheka. “Yaani huwa nakaaga mwenyewe, nikimkumbuka Danny nacheka mwenyewe mpaka machozi. Yaani sijui huwa anafikiriaga nini huko kichwani mwake.” “Ilikuwaje?” Nanaa akauliza.

“Geb alipoondoka pale chuoni mwaka wa pili, akaniachia kina James na Danny kama kaka zangu. Danny akaanza taratibu kunifuata na kuniuliza naendeleaje na mambo mengine. Basi hapo na mimi nikawa nimepata mwanaume wangu. Alikuwa na kazi nzuri, na usafiri. Anakuja kunichukua jioni ananipeleka kula, halafu ananirudisha chuoni. Ananinunulia vinguo, na kunipa vihela vya matumizi, nikawa napendeza kweli. Sijui bwana Danny akatokea wapi? Sijui akaambiwa na nani!? Akaanza kuniambia niachane na yule mwanaume. Sasa nikamwambia, ni mpenzi wangu, hata mama anamfahamu.”

“Hapo ndipo nilipo haribu kabisa. Akaanza fujo. Sina raha. Kila mahali Danny ananifuata, mpaka darasani. Yaani upo kwenye kipindi, unashangaa Danny huyo. Basi wenzangu walikuwa wakimuona tu wanaanza kucheka, nikiona wanacheka tu, najua Danny yupo nje. Usipotoka kwenda kumsikiliza, anaingia yeye. Mbele ya Profeser na mbele ya wanafunzi wote. Nilikuwa nachukia jamani, natamani kulia. Na yeye hakomi Danny. Akikukosa kwenye kipindi, anakusaka kila mahali. Unamfukuza asubuhi, jioni amerudi.” Nanaa alikuwa anacheka mpaka machozi.

“Sasa siku hiyo natoka chumbani, yule mwanaume kaja kunichukua tunaenda kula. Nimependeza kweli kweli. Kila mtu ananisifia. Ile nafika kwenye gari tu, Danny naye akaja. Eti anamuuliza yule mwanaume, ‘unampeleka wapi mke wangu?’ Jamani nilitamani kukaa chini.” Kila mtu alianza kucheka upya.

“Yaani eti mimi ni mke wake sio hata mchumba, mkewe! Bwana Danny alifanya fujo hapo. Kina James, Zinda, Malii, Gozi na wale wenzake wote uliowaona tukiwa safarini kule Marangu, eti wako hapo wanamsubiria. Mimi nikamwambia yule mwanaume tuingie kwenye gari tuondoke. Tukaondoka. Njia nzima nina kazi yakujitetea kwa yule mwanaume. Namwambia simjui Danny, wala sina mahusiano naye. Tukafika hotelini. Tukaagiza chakula na vinywaji, hatujaanza hata kula, Danny tena huyu hapa.” Walizidi kucheka, bila kunyamaza.

“Sasa ulifanyaje?” “Nilitamani kuingia chini ya meza. Hapo amekasirika kweli kweli. Eti anamwambia alishamuonya akae mbali na mkewe lakini hasikii. Sijakaa sawa, sijui yule kaka alimtukana au alimwambia nini, Danny akarusha ngumi. Wakaanza kupigana. Danny akafanya fujo zakutosha huku anamtukana yule jamaa anamwambia yeye sio mwanaume, kama angekuwa ni mwanaume kweli angekuwa na uwezo wakutafuta mwanamke wake kuliko kung’ang’ania wake za watu.” “Jamani!” Nanaa akazidi kushangaa huku amejawa cheko.

“We acha tu. Basi, Danny akafanya fujo pale, tukafukuzwa sisi wote watatu, tukatolewa nje. Sasa mwenzetu akapanda kwenye gari lake akaondoka, katuacha mimi na Danny. Hapo mimi ninalia kweli kweli.” “Sasa yeye anasemaje?” “Ananibembeleza! Eti pole, lakini wanaume ndivyo walivyo ni wadanganyifu. Jamani Danny nyie! Nilikuwa natamani kummeza. Tubebaki tumesimama nje ya ile hoteli. Pesa hana hata yakunichukulia taksii kunirudisha chuoni. Ananiambia twende tukapande daladala. Yaani Danny!” Nanaa alizidi kucheka huku anashangaa.

“Yaani amekutoa kwenye gari, halafu anakupandisha kwenye daladala!?” Nanaa akauliza.  “Tena bila aibu. Huku ananiambia vumilia mpenzi wangu, Mungu atatujalia magari yetu.” “Haiwezekani!?” “Mimi nakwambia kichwa chake anakijua mwenyewe Danny. Hapo tupo kwenye daladala ananirudisha sasa chuoni. Mimi nalia na yeye ananibembeleza mpaka tunafika. Mchezo ukaendelea hivyo hivyo. Akisikia tu nasoma na mwanaume popote pale, na yeye anakuja kusoma hapohapo na kina James. Hata kama nichumbani kwa huyo mwanaume na wao wanakuja kusoma humo humo ndani. Akikataa kuwafungulia mlango, anaanza kufanya fujo. Ikifika siku za ijumaa narudi kwa mama, na yeye ananifuata.”  “Haiwezekani! Anakufuata mpaka tena kwa mama?” Nanaa hakuwa anaelewa.

“Hakuna asikofika Danny kama mkewe yupo.” Mama G akajibu yeye maana Grace aliishia kucheka. “Hivi unajua atakaa hapo kwa siku zile ambazo na mimi nakaa nyumbani?” “Kweli?” “Muulize mama. Yaani yeye ndio akawa kama Geb pale ndani. Haitaji kukaribishwa wala nini, analala kwenye makochi anaamka. Anasaidia usafi, nakuomba kupewa kazi za kutumwa na mama. Sasa arudi hapo nyumbani asinikute, hapatakalika. Mtaa mzima walikuwa wanatujua mimi na Danny. Wapangaji wote walikuwa wamemzoea, wanamwita mtoto wa Mama G.” Grace akaendelea.

“Basi mama ananiambia wewe si umkubali tu yaishe. Namwambia hana sifa hata moja yakuwa mume wangu. Namwambia namtaka mwanaume mrefu kama baba, sijui awe na gari, nyumba, basi sifa zote ambazo Danny hana ndizo namtajia mama ndio aina ya mwanaume ninayemtaka mimi. Akipata hela siku hiyo, mtamjua. Anaenda kuninunulia chips, kuku, mayai na soda. Anakuja navyo pale nyumbani ananiletea, kama ni chuoni, atakutafuta huku ameshika mifuko yake. Anaweza akakununulia losheni, dawa ya mswaki na mswaki mpya. Hebu niambie mtu ndio anavyohonga hivyo jamani! Yaani nilikuwa namwambia mama, sitaki kumsikia hata kidogo.” Walizidi kucheka.

“Sasa Geb akarudi likizo. Akanikuta nipo kwenye heka heka ya Danny. Sina raha. Nikamuelezea matatizo yangu yote na Danny, nikamuomba azungumze naye.” Watu wote walianza kucheka mpaka Danny mwenyewe. “Bwana, nilimjia juu Geb, hatakaa akasahau.” Danny alifanya kila mtu acheke upya. “Yaani nilishindwa hata kujieleza, nikaishia kumwambia ‘lakini Grace anaomba umpe nafasi, Danny’. Danny alitaka kunipiga. Nikaamua kumuacha. Huwezi kumwingilia Danny, kwa Grace. Hana undugu wala urafiki. Hajali kama wewe ni kaka yake au mama yake Grace. Yeye anachotaka Grace tu. Na hataki ushauri.” Nanaa alihisi ni stori tu.

“Sasa ikawaje mkaona?” “Hiyo fujo ikaendelea mpaka namaliza chuo. Sina mwanaume yeyote, ni yeye tu yupo mgongoni kwangu. Mchana na usiku.” “Sasa ulipomaliza chuo si alichanganyikiwa?” Nanaa akauliza. “Achanganyikiwe kwani nyumbani hapafahamu? Yaani ndio akafurahi. Na yeye akahamia nyumbani rasmi. Anatoka asubuhi anakwenda chuo, jioni anarudi na kina James. Wanasomea hapo hapo nyumbani. Hajakaribishwa na mtu yeyote. Yaani kundi la marafiki wa Geb, likahamia hapo nyumbani. Chumba chenyewe ni kimoja, na sebule. Mwaka wake ule wa mwisho, alikuwa akiishi hapo hapo nyumbani. Siku za mwisho za mitihani, wote wakahamia kabisa hapohapo nyumbani wanasoma.”

“Kila nikijaribu kumshauri Danny, kuwa arudi  chuoni mpaka mitihani iishe, hataki. Anasema yeye anamjua shetani vizuri sana. Na usemi wake ni huo huo, shetani ni simba angurumaye, anazunguka kutafuta mtu amrarue. Mama naye akawa na kazi ya kuwapikia. Wamejaa humo ndani, sina raha.” Kila mtu alikuwa akicheka na kutingisha kichwa.

“Nikapata kijikazi, nako huko ilikuwa shida. Akaenda kujitambulisha kuwa yeye ndio mume wangu, na tunaishi pamoja.” “Jamani!” Nanaa akashangaa. “Hapo wala sijamkubalia. Kwa hiyo ofisini wote wakajua nimeolewa, naishi na mume wangu, Danny. Kukanusha tena huwezi, kwa kuwa ikifika jioni, giza limeingia hajaniona nyumbani, utamuona mwenyewe huyo amekuja kunichukua kazini. Utasikia mlinzi getini anatangaza kwenye kipaza sauti, Grace umekuja kufuatwa. Unaweza kudhani nimefuatwa na gari.” “Kumbe!?” Nanaa akauliza kwa mshangao.

“Alitoe wapi gari  huyo Danny!? Mnatembea kutafuta daladala. Siku za mvua ndio alikuwa anakuja mapema mwenyewe, ananisubiri mpaka nitoke naye. Eti nisitembee peke yangu kwenye mvua.” “Kumbe alikuwa anakujali!” “Sana. Wewe subiri usikie.” Grace alitaka kuendelea.

“Basi, kuna dada mmoja alikuwa sekretari wa kampuni, akawa ananiunganishia na wanaume. Ananiambi mdogo wangu, kiuno hicho, na tako hilo, ukichanganya na macho hayo, huyu ameahidi kukupa gari, yule nyumba. Kila siku anakuja na majina mapya ya wanaume na ahadi mpya.” “Sasa uliwakubalia?” “Hivi wewe Nanaa hujaelewa. Naanzia wapi? Danny alikuwa ananikaba mpaka kooni, sina pakuhemea. Si nyumbani, si kazini. Akiona mwanaume amekusogelea, anamuonya kwa maneno kwanza, kinachofuata ngumi. Mkali kwa mama, mkali kwa Geb. Anawaambia Grace ni jukumu lake, Mungu amempa.” Mama G, alikuwa anacheka tu. 

“Danny! Mimi sijawahi kuona jamani! Na hana aibu hata. Utamuona anaamka asubuhi, anakuomba nauli ya kwenda chuoni. Namwambia sasa Danny mwanangu, labda ungekaa tu chuoni kwa muda. Utamuona anavyobadilika. Hapo hapo anakasirika. Tena nilichompendea Danny, hakuwahi kuniona mimi ni mama mkwe wake au sijui mama yake Geb. Nakwambia alinimiliki kuliko hata Geb mwenyewe. Akipata tu pesa, zote anamnunulia vitu Grace. Namkumbusha, namwambia labda angehifadhi pesa baadhi zimsaidie nauli ya kwenda chuoni. Basi mwenyewe anakutolea kidaftari chake alichokuwa akiandika vitu vya kuja kumnunulia Grace.” Mama G akaendelea.

“Akimsikia tu analalamika anataka kitu fulani, anaandika chini, kila kitu anaandika. Hata kama akimsikia anahamu ya kula kitu fulani, hutamsikia akiongea kitu, anaandika chini. Sasa akilipwa huko chuoni, pesa yote itaisha siku hiyo hiyo. Utamuona anaingia humu ndani na mifuko yake. Atanunua chakula kidogo tu cha kula watu wote humo ndani, lakini pesa nyingine zote zinaishia kwa Grace. Yeye anasuruali zake mbili tu za jinsi, na tisheti 3. Namwambia labda ujiongezee tisheti, hapo tena ugomvi, Grace kwanza.” “Jamani! Kumbe alikuwa anampenda hivyo?” Nanaa akavutiwa. “Mpaka leo Danny yupo hivyo hivyo. Ni heri akose yeye, mimi nipate kwanza. Hakuna nitakachotaka kwa Danny asinipe. Mpaka wakati mwingine sipendi kulalamika mbele yake.” Grace akaongeza.

“Kwa hiyo ndio mkaoana?” “Hapana. Yaani yote hayo alikuwa ananifanyia nilikuwa wala sijamkubali. Wewe hujakutana na Grace wawakati huo. Nilikuwa gumzo kila mahali, halafu nije kuolewa na mtu kama Danny! Hana gari, nguo zake kila mtu anazifahamu! Sithubutu. Kila anayeniona anataka kunioa! Wanawake wananithaminisha, basi wananiambia yaani wewe Grace, hongo ya mwanaume anayekutaka wewe ni gari, huyo ni masikini, au Jumba. Ukiwa makini utapata vyote. Basi hapo kichwa kinazidi kuwa kikubwa, wala sioni anayonifanyia Danny. Yaani naona anajipotezea muda tu.”Grace akaendelea.

“Sasa yule dada wa ofisini kwetu, sekretari, alikuwa dada mtu mzima tu, akaniunganishia kwa kijana mmoja mfanyabiashara. Alikuwa anakujaga pale ofisini. Alikuwa na pesa kweli kweli. Nikaamua kuolewa naye bila hata kipingamizi, hapo yule dada ananishawishi kila akiniona, anamsifia huyo kaka. Ananiambia kama ni kuyapatia maisha, basi hapo nimeyapatia. Basi tukakubaliana na yule kaka, nikaamua kumuwahi kabisa. Nikamuelezea tabia zote za Danny. Nikamwandaa nakumwambia mambo yote ambayo Danny anaweza kumfanyia. Akaelewa kwa haraka sana. Maana na yeye alikuwa kama kachangayikiwa. Kila ninachomwambia anakubali, ilimradi tu anioe.”

“Basi wakati huo mama ananiambia nizunguke kila ninakotaka, lakini kulala na mwanaume mwiko. Hapo mama akawa mkali kweli kweli, hanichekei. Kila wakati swali ni hilo hilo, sina raha. Hata ukipata mwanaume, huwezi kulala naye! Sasa yule mwanaume akawa anataka sana tulale naye. Kila akiniona ananibembelezea mapenzi. Mimi nikamwambia mama yangu ameniambia ni marufuku kulala na mwanaume asiye mme wangu. Bila kufikiria, akatangaza ndoa. Akasema nakuoa. Akanipeleka kwao, wakanipokea. Ndugu zake wote wakamsifia kapata mke mzuri. Sasa na yeye akawa anataka aje amuone mama, wapange siku ya kulipa mahari.” Grace akatulia kidogo.

 “Nakumbuka siku niliyompeleka kwa mama, Danny alikuwepo. Nikamtambulisha. Alikuwa kijana mtanashati, pesa ipo, anajielewa, sio kama Danny. Sitasahu sura ya Danny aliyoniangalia siku ile wakati nimemleta yule kijana. Danny aliumia mpaka mama alimuhurumia. Sasa hapo mama mapenzi yashakuwa kwa Danny. Anampenda Danny kama mwanae Geb. Huna utakachomwambia mama tena juu ya Danny akakuelewa. Kamaliza chuo, eti mama anamwambia aendelee kusoma. Nikaona hapa nikucheleweshana. Mtu hana pesa, amemaliza chuo, badala atafute kazi, apate pesa kama wenzake kina James, eti anarudi tena chuo! Nikaamua niolewe, niendelee na maisha yangu.” “Ehe!” Nanaa alitaka aendelee.

“Basi, mama akamkarimu huyo mchumba mtu. Baada ya chakula mimi na yule kijana tukaondoka. Nikashangaa siku ile Danny hakuzungumza neno hata moja wala hakufanya fujo kama nilivyotarajia. Alinyamaza kimya akisikiliza mipango mizito ya yule kijana ya kulipa mahari. Kijana alijigamba pale siku ile, si mchezo. Basi  kama unavyomuona mama pale, ndio alikuwa vilevile siku ile katulia kimya anamsikiliza kijana akitoa mikakati yake. Sasa najiuliza mbona mama mwenyewe hafurahii. Maana tulipewa ahadi chungu mzima, ikiwemo yakuhamishwa pale kwenye chumba cha kupanga, kupelekwa kwenye nyumba. Tena akasema kwa haraka kabla ya hiyo siku ya mahari, kwa kuwa siku hiyo atakuja na marafiki zake wengi sana, magari yatakuwa mengi, hapatakuwa na sehemu ya kuegesha magari pale uswahilini tulipokuwa tukiishi.”

“Nakwambia kijana ametoa mikakati kibao. Mama, mtoto wa mjini katulia kimya yeye na Danny wake wanamsikiliza. Basi mimi cheko limenijaa. Furaha tele. Napewa nyumba na gari! Basi hapo huna utakaloniambia nikaelewa juu ya kuyapatia maisha. Basi, baada ya kujigamba pale tukaondoka na yule kijana, hapo alikuwa ameleta vyakula kibao, akamuachia mama pesa za matumizi.” Grace akatulia.

“Sasa akanirudisha usiku mwenyewe nimejawa furaha, nimehongwa pesa, nina ahadi ya kuolewa na kwenda kuishi kwenye jumba la kifahari, akasema ataninunulia gari ili nisipate shida ya usafiri. Nimeingia pale ndani, Danny hayupo sehemu aliyokuwa akilala. Alikuwa akilala kwenye makochi sebuleni, mimi na mama chumbani. Mama akasema aliondoka mara tu tulivyotoka. Usiku ukapita, Danny hajarudi. Usiku wa pili tena, Danny hajarudi. Nikaanza kukosa raha.”

~~~~~~~~~~~

Usikose Kufuatilia Mkasa Wa Grace Na Danny. Nini Kilitokea Mara Baada Ya Danny Kuondoka? Ilikuaje Mpaka Kijana Huyo Asiye Na Kitu, Akaishia Kummiliki Grace, Msichana Aliyesumbua Wengi Wenye Pesa Zao?

Endelea Kufuatilia.....