Ni Wangu! - Sehemu ya 16.

Ilikuwa bado ni mapema wakati Nanaa alipokuwa akiuacha mji wa Kilimanjaro. Kila mtu bado alikuwa amelala. James na yeye akarudi chumbani kwake. Alikuwa amelala chumba kimoja na Zinda. Akakuta bado anakoroma. Akapanda kitandani kwake na yeye akalala. Alikuja kushituka tena saa sita mchana. Watu wakiwa wameshaamka wapo tu, wamekaa nje wakizungumza. Baada ya kujisafi, akatoka kuungana nao. Hata Zinda alikuwa ameshaamka.

Alifika pale akaangaza macho, akamuona Geb amekaa na Liz, ila Danny na familia yake hawapo. Akawasogelea na kuwasalimia. “Tunaweza kuzungumza hapo pembeni?” James akiwa anamwangalia Geb. “Ni nini hicho ambacho hamtaki mimi nikisikie?” Liz akadakia. Kama kitu kikampanda James. Hasira ikawaka moyoni. Alimwangalia Liz, Geb akasimama. “Hee! Yaani wewe umetukuta tumekaa hapa na Geb, unamchukua mpenzi wangu unataka kwenda kuzungumza naye bila mimi! Kivipi?” “Ni nini Liz!?” Geb akamuuliza kwa kushangaa. “Unashangaa nini na wewe? Tupo hapa mapumzikoni. Tulikubaliana tuje hapa kama couple ili kupumzika. Mambo yenu ya siri na biashara, yasubiri mkirudi Dar. Acha kuharibu mapumziko yetu James. Kama huwezi kuzungumza hapa, basi naomba uondoke usitake kubugudhi watu. Huo ni ustaarabu tu ambao kila mtu anatakiwa awe nao.” Kidogo James alianza kuelewa kile Nanaa alichokuwa akikipitia akiwa na Liz. Alimtizama kidogo tu, akaondoka.

~~~~~~~~~~~~~

Sababu ya hasira, akaamua kutoka kabisa pale. Zinda aliona akiondoka, akamuwahi. Akamuita kwa sauti. “Wapi tena James?” “Nafika mara moja Moshi mjini. Naenda kumuona baba.” “Acha na mimi niunge msafara.” “Na mimi.” “Hata sisi tunataka tukazurule mjini leo.” Kila mtu alitaka kuongozana na James. “Ndio vizuri chakula cha mchana, tukakile mjini. Kuna mahali nitawapeleka, wanapika kitimoto hiyo! Dar nzima hamna kitu nzuri kama hiyo.” “Acha hizo James.” Baada ya ubishi wa muda, wakitajiana sehemu ambazo walishakula kitimoto ya nguvu jijini Dar, huku wengine wakikataa na kutoleana kasoro ya hizo sehemu, James akabakia mshindi kuwa, anako wapeleka ni bora zaidi. “Mtu kwao bwana!” Wakakubaliana watoke kwa pamoja, kasoro Geb na Liz walibaki kimya wamekaa tu.

Wakati wanasubiriana sehemu ya kuegeshea magari, wakaona Danny na familia yake wanaingia. James akawasogelea mpaka pale kwenye gari. Akamsalimia mama yao bado wakiwa mlemle ndani ya gari. James alikuwa upande wa dereva ambaye alikuwa Danny kwa wakati huo, ila gari la Geb. Geb naye aliyekuwa akizungumza na simu na mama yake, walipofika pale, akakata simu na kusogelea gari. Liz akabaki amekaa pale pale.

James Awajia Juu Kina Magesa

“Afadhali wote mpo hapa. Nataka kuzungumza na nyinyi.” James alianza. Walio kwenye gari wakashuka ili kumsikiliza James. “Kwema James? Halafu mbona naona watu wengi halafu mwanangu Nanaa simuoni?” “Hilo ndilo nililotaka tulizungumze.” “Vipi tena!?” Danny akauliza. “Nimemsafirisha Nanaa leo asubuhi kurudi Dar. Nimeamua hivyo. Ameondoka na basi la saa 11 asubuhi. Mungu akipenda kwenye mida ya saa 5 hivi atakuwa amefika Dar. Funguo zenu za chumba hizi hapa.” Kama waliomwagiwa maji, wakabaki wametoa macho.

“Kwa nini umefanya hivyo James? Tena bila kutuambia!” Aliuliza Geb, huku akilaumu. “Unafikiri hapa nafanya nini?” James alijibu kwa hasira, na wote wakajua. Ule muonekano wa jana aliorudi nao baada ya kuzungumza na dada yake, wakajua ulibeba hasira. “Hapa ndio nawaambia! Ulitaka nifanye nini wakati kila nikitaka kuzungumza na wewe, mwanamke wako amekukaba huwezi kufanya chochote?” “Sio kweli James. Nim..” Geb alitaka kujitetea lakini James akamuwahi. “Nisikilize Geb.” James akajiweka sawa, uso ukiwa mwekundu. Wakajua tayari za kichaga zimepanda. Masikio na macho yalishakuwa mekundu haswa.

“Mimi na wewe tumetoka mbali sana. Tokea tupo tunakunywa uji wa shule na kusubiria ugali na maharage. Tokea hujaanza kushika pesa, mimi nilikuwepo. Tokea hata hujaanza kuendesha hayo magari ya thamani, mimi na wewe tumekuwa marafiki. Marafiki wa katika shida na raha. Tatizo lako ni langu, langu ni lako. Tokea tunakuwa, sisi ni marafiki tuliogeuka tukawa kama ndugu. Na tunaheshimiana sana. Hatujawahi kupishana hata mara moja. Hujui ninakuwa vipi linapokuja swala la Nanaa. Umenielewa Geb?” James alikuwa mkali. Alibadilika kama sio yeye. 

“Huwa ninamlinda Nanaa na yeyote yule anayetaka kumuumiza. Hata ikibidi kumlinda na mikono ya mama yangu mimi mzazi, huwa nafanya hivyo. Hakuna mwanadamu anaweza kumnyanyasa Nanaa mbele yangu, nikatulia. Jana mnamuacha Nanaa anadhalilishwa pale mbele za watu sababu ya sweta!? Nyinyi wote watatu! Danny, Grace na Geb mmenyamaza kimya mnaacha dada yangu anadhalilika sababu ya sweta tu!? Sasa hivi kila mtu anajua kuwa Nanaa amefukuzwa kwangu, mnamsaidia nyinyi! Ameenda kulala, baada ya manyanyaso yote yale na kumtangaza kuwa anashida, wewe Grace ulijisumbua hata kidogo kwenda kumtizama amelalaje?” Kimya.

Akamgeukia Geb. “Na wewe Geb umekaa umemkumbatia mwanamke wako pale, umejali hisia za Nanaa baada ya maneno yako na mwanamke wako? Leo asubuhi nakuita kiustarabu tu, nataka tuzungumze, mwanamke wako anakukataza na wewe umekaa pale kimya! Sasa hivi ni saa saba mchana. Ukiwa umetangaza kuwa Nanaa ni jukumu lenu au lako, sijui! Umehangaika hata kujua Nanaa alipo? Umemuona akiwa anapata hata kifungua kinywa? Eti sasa hivi nawaambia Nanaa amerudi Dar, ndio unajidai kuniambia kuwa sikufanya vizuri! Mlitaka abaki hapa ili iweje? Muendelee kumnyanyasa dada yangu kwa sweta!? Sijaona hata anayemjali Nanaa hapa kati yenu. Na kwa majibu aliyonijibu mimi Liz sasa hivi, na wewe Geb kubaki kimya kama fala, inawezekana unafanya hivyo hivyo kwa dada yangu.” Watu walishakusanyika kusikiliza.

“Acha kutukana James!” Geb alijaribu kumuonya. “Nimekutukana Geb. Fanya unachotaka.” James akamsogelea karibu kishari. “Huwezi kuendeshwa na Liz, mwanamke aliyetukuta sisi tokea wadogo, na atakuacha tu wewe kama hujui. Anakung’ang’ania sasa hivi kwa ajili ya hayo magari yakifahari unayobadilisha sasa hivi. Akiona hapati anachotaka atakuacha kama hakujui. Unashindwa kutumia akili kwenye mambo ya msingi ya maisha kama haya!? Umekuwa kama mjinga!” James akaendelea.

“Wewe ndio wakuamuliwa na Liz uzungumze na mimi niliyekuwepo kwenye maisha yako wakati hata yeye pia alikuwepo lakini alikuwa kama hakuoni! Kama kweli anakupenda, kwa nini asingekutongoza wakati ule tupo wote pale chuo kikuu cha Mlimani wakati sisi tunakula kwa mama lishe, yeye anaendesha gari kwenda kula kwenye mahoteli ya nje? Liz si alikuwepo kipindi hicho!? Kwa nini sasa hivi ndio anakutongoza na kukung’ang’ania kama anakupenda kweli? Sisi wote tumekuwa na wewe Geb, hatujawahi kutengana. Hata ulipokuwa nje ya nchi, bado tulibaki kama familia moja. Leo Liz ndio anakuamulia uzungumze na mimi au la! Kama sio amekugeuza kuwa fala ni nini?” James alikuwa amekasirika anatamani kurusha ngumi.

“Naomba usiniingize kwenye mazungumzo yenu James. Niache. Mahusiano yangu mimi na Geb hayakuhusu.” “Nitakupasua huo mdomo Liz wewe! Usithubutu kunijibu hata kidogo. Kaa mbali na mimi kabisa. Maskini wa nafsi wewe.” “Maskini mimi au wewe James?  Sijawahi kuwa na shida na wala sina shida. Wewe ndio unahangaika. Na kwa taarifa yako kama mlikuwa mkisubiri Geb aniache, mtasubiri sana.” “Nani akusubiri wewe? Huwezi wala hutakaa kuwa kwenye maisha ya mtanzania yeyote hapa Tanzania. Labda ubadilike.” James akamgeukia vizuri Liz.

“Umekuja unabinua midomo kama unaingia chooni! Kila kitu unakilalamikia! Kila mtu anashangaa kwa nini umekuja kama hukuwa unataka kuja. Unamkera kila mtu Liz. Na usifikiri ulimdhalilisha dada yangu kwa sweta. Ulijidhalilisha wewe mwenyewe na hii familia yako ya kina Magesa. Mpumbavu tu wewe. Wivu tu.” “Sina wivu na wala sio mpumbavu.” James aliruka akataka kumkamata Liz, Liz akakimbia kwa haraka. Danny akamshika James alipotaka kumkimbiza.

“Nitampasua mdomo mimi!” Zinda akasogea. “Naomba tuondoke James. Tafadhali.” James alikuwa anawaka kama moto. “Sitaki mtu anishike. Niache Danny, tafadhali. Nyinyi si mmekuwa mamilionea? Wengine wote tunashida tu. Tunategemea rehema zenu? Usiniguse Danny. Watu wanawasema pembeni kwa kuwa wanawaogopa kuwaambia kwa sababu ya vijisenti mlivyopata juzi wakati sisi tunawaona hapa! Mimi siangalii pesa Geb na Danny. Mnanijua. Utu kwanza.” Akajitoa mikononi kwa Danny kwa nguvu.

 “Mmepata pesa, mkaanza kujifanya mmekuwa wazungu nyinyi! Mmesahau tulikuwa tunalala chini pamoja, tunasubiri mama G, atupikie chai ya rangi tuwahi mitihani chuoni? Mmesahau tulipotoka nyinyi!? Mnamnyanyasa Nanaa, mtoto yatima? Kama nyinyi mmetoka kimaisha, atashindwa vipi kutoka Nanaa? Acheni dharau na manyanyaso ya waziwazi jamani! Mnacheza na Mungu nyinyi. Mungu ni baba wa yatima. Aliyewapa nyinyi, ndio aliyetunyima sisi. Lakini hatujui kesho ya Nanaa. Acheni .”

“James! James! Niangalie mimi.” Malii akamuita. James akageuka. “Kilichotuleta sio hiki bwana. Tumekuja kuchukua mke, turudi zetu mjini. Naomba yaishe. Twende zetu tukapige maji ya mjini. Tuwanyweshe washikaji mbege halisi ya JIJI letu. Tukirudi, tunalala mpaka kesho tuchukue mke, jumapili tunarudi mjini. Tutapata muda wa kuzungumza na Nanaa, tutamuomba radhi. Wote tuliona alivyodhalilishwa jana. Lakini Nanaa ni familia, kaka. Wakati wote mambo ya familia ni magumu, ila hatujawahi kushindwa kuyamaliza. Tupo wote miaka na miaka. Tumefanya mengi pamoja. Naamini hatutashindwa kumchukua Mmarangu wangu kesho, tumuhamishie mjini kwenye makochi masafi na kumbi nzuri kama alivyosema Liz. Tuvumiliane tu. Mapenzi hayachagui. Unaweza kupenda mjini na kijijini.” Malii akaongeza.

“Ila naomba ombi moja Geb.” Malii akamgeukia Geb, baada yakuona James ametulia. “Kama Liz hapafurahii hapa atusaidie hivi, aondoke. Au ajitahidi kuficha hisia zake. Kila mtu ana macho na kila mtu anahisia zake. Tafadhali sana, tunaomba kwa heshima zote, asikanyage hisia za wengine. Naona kila mtu yupo nafuraha hapa. Hata hawa wake zetu tulio oa pwani na kule bara ndani ndani, wamepafurahia hapa Marangu. Basi, ni hilo tu kaka. Amani na tujali hisia za kila mmoja wetu."

"Safari bado ndefu sana hii. Wengi wenu hapa bado hamjaoa. Leo ni mimi tupo hapa Marangu, kesho ni mwingine. Weza kuta itakuja kutulazimu kwa wengine kwenda hata na mtumbwi huko ukweni. Lakini kwa kuwa sisi ni ndugu, mama yetu mmoja. Huyo hapo Mama G, amehangaika kutukusanya tokea watoto. Basi naomba amani idumu.” “Samahani sana Malii. Samahani kaka.” James alishatulia. “Naelewa kaka. Ila naomba kikao kihamie mjini basi. Kwenye kiti moto ya dunia.” Kidogo pakatulia.

“Mama pole na safari. Nimefurahi sana kukuona huku milimani.” Malii akamsogelea na kumkumbatia mama G. Kila mtu akampa mkono Mama G, aliyekuwa amenyamaza kimya muda wote akisikiliza. “Sasa wewe nenda kapumzike. Jioni tukirudi, utupe neno la busara.” “Msilewe sasa. Hasa wewe Malii. Kesho ni siku muhimu sana kwako.” “Na umuhimu huo ni wewe kuwepo hapa. Ukishuhudia na mimi mwanao napata mke. Unakumbuka ulivyokuwa unatutengenezea kahawa usiku ili tusome kipindi cha mitihani? Sasa shule imeisha, shuhudia nachukua jiko.” Mama G, akacheka kidogo. 

“Haya. Njooni wote tushikane mikono tuombe. Hili jambo ni la baraka sana. Tusikubali shetani aliharibu.” Wakakusanyika wote, wakatengeneza duara kubwa, wakashikana mikono. Mama G akaanza kuomba. Aliomba toba kwa watoto wake hao wote. Akawatakasa kila mmoja, huku akimsihi Mungu awasamehe. Akamshukuru Mungu kwa ulinzi wake juu ya vijana wake hao, na mke mtarajiwa wa Malii, kijana wake. Akaomba amani na ulinzi kati yao, huku akisihi Mungu amlinde Nanaa popote alipo na amfanikishe. Akamaliza.

Mpaka anasema amina, kila mtu akawa ametulia. Wakaanza kupiga makofi. “Afadhali umekuja mama.” Kila mtu alirudi kumpa mkono mama G. “Haya. Na mimi nimefurahi kuwaona. Ila nataka muwahi kurudi na muwe waangalifu huko mabarabarani. Madereva wote msinywe. Mtakuja kunywa hapa mkirudi. Umenisikia James? Wewe unayewapeleka wenzako usiweke pombe mdomoni.” “Nimeelewa mama. Saa 12 jioni nawarudisha. Ngoja nikamsalimie Mzee.” “Haya. Fikisha salamu zetu. Tafadhali macho yako yote yawe kwa Malii. Arudi akiwa na meno yake yote.” Wote wakacheka. Wakaingia kwenye gari, wakaondoka. 

~~~~~~~~~~~~~

Alibaki Mama G na wanae. Akamwangalia Geb. “Mbona midomo imekukauka? Umekula wewe?” Akamuuliza Geb kisha akamgeukia Grace. “We Grace?” “Hajala tokea jana njiani alipopewa vitu vya kula na Nanaa. Korosho na soda tu.” Grace alijibu huku anarudi kwenye gari kuchukua mizigo ya mama yake. “Hata macho hayo yanaonekana hujalala vizuri. Twende ukale halafu ulale kidogo.” “Sisikii njaa mama. Kwanza pole na safari.” “Asante.” “Vipi magoti?” Geb akamuuliza mama yake, huku akimuangalia magotini. “Aaah, hivyo hivyo. Lakini usiwe na wasiwasi. Safari ilikuwa nzuri. Fupi. Hata lisaa halikuisha huko angani. Twendeni ndani nikainyooshe kidogo.” Wakaongozana mpaka kwenye chumba ambacho alitakiwa alale na Nanaa. 

Wakalikuta lile sweta kitandani. “Sweta lenyewe ndilo hili lililozua kizaizai!?” Mama G akalinyanyua akalitazama na kulitupa tena palepale kitandani. Kila mtu akanyamaza. “Kilichowashinda kumjulia hali Nanaa, nyinyi ni nini?” Mama G akauliza huku akikaa. “Usiku sisi tulikuwa tumechoka mama, na asubuhi tuliamka mapema ili tukuwahi wewe uwanja wa ndege.” Mama yao akamgeukia Geb aliyekuwa amenyamaza kimya. Akajua hataongea. “Njoo ujilaze hapa.” Bila aibu wala kubisha, Geb akapanda kwenye kilekile kitanda alichokuwa amekaa mama yake. Akajilaza vizuri pembeni yake na kugeukia ukutani. 

“Naomba hilo blangeti hapo.” Mama G alimtuma Danny. Danny akavuta blangeti kutoka kwenye kitanda kingine, akamkabidhi mama yao. Akamfunika vizuri Geb. “Hajala huyo mama. Tokea jana hajaweka kitu mdomoni.” Grace alimuwahi mama yake kabla hajamfunika vizuri. “Wewe unamjua Geb. Hawezi kula akiwa kwenye hali hiyo. Mwache alale kidogo. Akiamka ndio atakula.” Alimjibu Grace huku akiendelea kumfunika.

~~~~~~~~~~~~~

 “Nitolee simu yangu kwenye pochi nimpigie Nanaa.” Grace akatoa simu. Akamkabidhi mama yake baada ya kupiga simu ya Nanaa.  “Mama!” Nanaa akapokea. “Umefika salama?” “Ndiyo. Nashukuru Mungu nimefika salama. Pole na safari.” Nanaa akajibu. “Asante. Mbona nakusikia kama upo kwenye basi tena!?” Mama G, akauliza. “Nipo kwenye daladala mama yangu. Dalali ameniita nikaangalie chumba maeneo ya Mwananyamala. Ndio nipo njiani. Na simu inaishiwa chaji. Naomba mwambie kaka James nilifika salama, asiwe na wasiwasi. Nikirudi nyumbani nitaichaji kisha niwapigie tena, tuzungumze vizuri.” 

“Sasa utalala wapi na mimi nyumba nilifunga. Sikujua kama utarudi.” “Usiwe na wasiwasi mama yangu. Nitapata tu mahali pakulala. Naomba nikuage kwa sasa ili simu isiishe chaji kabisa nikashindwa kuwasiliana na dalali.” “Naomba usisahau kunipigia Nanaa. Sitalala mpaka nikusikie.” “Usiwe na wasiwasi mama!” “Hapana Nanaa. Nitataka kujua upo wapi, na unalala wapi. Kama ulikula na kama ulifanikiwa.” Wakamsikia Nanaa akicheka. “Haya mama yangu. Basi nitajitahidi tuwasiliane. Uwe na wakati mzuri. Nyoosha miguu upumzike kesho ukacheze kwenye harusi.” Mama G akacheka kidogo. “Asante mwanangu. Nasubiria simu yako.” “Usijali.” Nanaa akakata simu.

~~~~~~~~~~~~~

 “Nanaa anamoyo mwepesi huyu mtoto!” Mama G, aliwaza kwa sauti. “Nimemsikia anacheka mwenyewe!” Grace akaongeza. “Anapenda kucheka kama nini sijui! Namtania namwambia ndio maana mashavu yake yamebonyea. Kila kitu yeye kucheka.” Kidogo walifarijika baada ya kuzungumza na Nanaa. 

“Ila niwaambie ukweli kabisa wanangu. Kama tukishindwa kumtunza Nanaa, mjue wazi tumeshindwa kutunza baraka za Mungu. Na hatutabaki kama hivi tulivyo. Wote mlikosea jana. Mlikosea sana. Lazima tukubali kosa na mjue James alikuwa sahihi japo aliongea kwa hasira. Baraka mlizonazo leo, hamjui mlizitoa wapi. Danny, uliweza kukusanya wale vijana wote wale, ukatuletea nyumbani. Yatima na walio na makwao palepale jijini, walipaita kwetu ni kwao. Ni nyinyi mliwafanya wanipende na kunithamini. Ni nyinyi ndio mliwageuza kutoka kuwa marafiki mpaka wakawa ndugu.”

“Kundi lote lile ni sisi tumelikusanya na kuwaunganisha. Wamekuwa kama kondoo wetu. Wewe Danny ndio wamekuchagua kama mwenyekiti wao. Umekuwa ni mchungaji wao, halafu gafla mnawaacha! Mnajitenga nyinyi wenyewe! Lazima kutatokea vurugu sana. Kuweni makini kwa kila jambo. Wanawaangalia kwa karibu sana. Na si kwa mabaya, ni kwa kuwa wanawapenda. Hakuna hata mmoja wao pale anayetaka kuwapoteza nyinyi. Ndio maana popote mlipo, au popote mnapoishi, wanawafuata. Na hawajihesabu ni wageni kwenu. Ndio maana wanaingia na kutoka pale nyumbani, watakavyo. Naombeni msijisahau sasa hivi.” Wote walikuwa wamenyamaza.

“Mmesikia?” Mama G akawauliza. “Binafsi nimeelewa mama. Na ninakiri ni hasira tu ndizo zilinifanya ninyamaze. Kama ningeendelea kuongea jana, au ningefungua mdomo wangu, ingekuwa mbaya zaidi mama yangu. Wewe unanijua. Usingekuta hii hali ya leo. Au haya yaliyotokea leo, ingekuwa mbaya zaidi yake. Kumbuka na mimi ni yatima kama Nanaa. Nilikuwa nikitangatanga kwenye majumba ya watu kama Nanaa. Mpaka mliponifungulia mlango kama hivi Nanaa. Kwa hiyo naelewa, na ninajua ugumu anaopambana nao Nanaa.” Danny aliongea kwa hisia zote.

“Mimi unanijua mama. Nikiongea sana kichwa kinauma au maneno yanakwama na ninaishia kulia kama mjinga. Nilifanya kwa sehemu niliyoweza mpaka tukafika hapa. Japo nahisi sijui sikusaidia sana au nilichelewa! Sijui. Lakini namuelewa Nanaa. Ni kweli alikuwa na wakati mgumu. Na niliumia sana jana usiku. Ni kweli alidhalilika. Nakiri tulikosea.” Grace aliongea upande wake. 

“Na kwa upande wa Geb, mimi namfahamu Geb. Heri mimi nikiwa na hasira huwa naweza hata kuongea kidogo. Geb alikuwa kwenye nafasi ambayo kunyamaza pekee ndio ilikuwa suluhisho sahihi. Sio kwamba namtetea. Jana angeongea zaidi, ingekuwa mbaya zaidi. Nilimsifu jinsi alivyoweza kunyamaza. Japo nilijua alikuwa anaumia sana moyoni. Hata kule kuongea pale mbele za watu na kutoa yale maelezo yote yale, ilimlazimu. Na nashukuru alijibu. Ingekuwa mbaya zaidi kama angenyamaza."

"Kwa kujibu kwake jana, Geb alituliza ugomvi mkubwa sana ambao Liz alikusudia kuzua chuki kubwa sana katikati ya hawa marafiki. Geb hakuwa amekusudia kumdhalilisha Nanaa. Wote tunajua jinsi anavyompenda Nanaa. Lakini mama, walimbana kwenye kona, ilikuwa hamna jinsi lazima ajieleze vile tu. Lasivyo wangemuona msaliti.” Kama kawaida ya Grace kumtetea mdogo wake.

“Tukirudi nyumbani, tutapata muda na Nanaa. Tutazungumza naye. Ninamfahamu Nanaa. Ataelewa tu. Huwa hawezi kuweka kinyongo yule mtoto. Atasamehe tu.” Mama G, akamalizia. Wakatulia kidogo kila mtu akiwaza lake.

 “Basi kwa kuwa bibi amekuja, wewe kaa hapa na bibi. Sisi tunakuja sasa hivi.” “Namtaka mama.” “Kwani Fili vipi bwana!? Unataka kuharibu safari yangu nzima!” Mama yao alianza kucheka. “Kamganda mke wangu tokea jana! Sina raha!” “Muache mtoto Danny. Mimi namwambia labda sababu yupo kwenye mazingira mageni, halafu hakuna watoto wengine. Anaogopa.” “Sasa anachoogopa hapa ni nini wakati bibi yake huyu hapa? Yaani amepooza kabisa! Haongei, anamtaka mama yake amkumbatie wakati wote bwana! Sina raha na mke wangu!” “Mmemwangalia homa lakini?” Bibi yake akauliza.

 “Danny amempima, hana homa.” “Eti Fili. Unaumwa?” Bibi yake akamuuliza kwa upole. “Namtaka mama.” “Yaani hiyo sentensi inazidi kuniudhi! Ameikazania tokea jana! Kama ananikomoa vile!” Grace na mama yake wakaanza kucheka. “Si ukae hapo kidogo tu, tunakuja sasa hivi. Umesikia Fili mwanangu?” Danny aliendelea kubembeleza, lakini Fili akanyamaza. “Usiwe na wasiwasi Fili mwanangu. Ongea na bibi kidogo tu, tutakuja. Sawa? Mfundishe ule wimbo wako wa shule.” Fili alianza kutoa machozi. 

“Hii safari kweli imeingiwa mkosi.” “Usiseme hivyo bwana Danny! Hii sio kawaida ya Fili. Lazima kuna jambo tu. Ngoja nilale naye hapo kitanda cha pembeni. Akilala nitakufuata.” “Nasubiria hapahapa. Hukawii na wewe kulala kama jana usiku. Jana nimejikuta nimelala peke yangu usiku kucha! Fili kalala na mke wangu. Leo umuache hapo sisi twende.” Grace alianza tena kucheka. “Hata mimi nilikuwa nimechoka na safari, wala sio Fili peke yake.” Mama G alikuwa akicheka huku ameinamia simu yake. Danny akakaa. Grace na yeye akapanda kitandani akamkumbatia mwanae wakalala.

Nanaa huko Jijini.

Nanaa alikutana na dalali. Bei ikamshinda. Ilikuwa vyumba viwili na sebule. Inajitegemea jiko na kila kitu. Alimwambia yule dalali asingeweza. Bei nikubwa sana kwake. Na anatarajia kurudi chuoni baada ya muda mfupi. Asingependa sehemu itakayomlazimu kuchukua daladala mbili hasa kodi ikiwa juu kiasi kile. Nyumba ilikuwa nzuri ya kisasa. Isingeendana kabisa na hadhi ya Nanaa kwa wakati ule. 

Akakumbuka ofa ya Zinda. Kupewa gari na nyumba. Ndoa ya haraka. Au wawe wote kwa wakati huo. “Nikimkubali Zinda, sitahangaika tena!” Umasikini ukaanza kumsumbua Nanaa. “Nimejizubaisha kwa Jeff, mpaka akapata mwingine. Nina tatizo gani mimi!?” Nanaa akaanza kujichukia. “Lakini hapana. Acha nijikane, mpaka nione huo mwisho wangu.” Wakaagana na dalali kwa makubaliano ya kumtafutana tena pindi atakapo pata sehemu nyingine inayoendana na yeye.

Nanaa Nyumbani Kwa Antii.

Wapi pakwenda baada ya hapo ndio ukawa mtihani. Kama kawaida ya wachaga kusaidiana popote walipo. Nanaa akamkumbuka matroni wao wa pale chuoni. Alikuwa mama wa kichaga, aliyetokea kumpenda sana Nanaa. Japokuwa hakuwa akimjua baba yake, lakini alijua mama yake ni mchaga kwa hakika. Akajenga mazoea na yule mama akimtambua kama mchaga mwenzake. Kwa hiyo Nanaa hakuacha kuwa akipita hapo kila anapoelekea chumbani kwake na kumpa salamu. Jina la Antii likawa la kawaida kwao. Wakawa wanaitana Antii yeye na matroni. 

Nanaa akaona ndiye mtu wakumpigia. Japokuwa simu yake ilishaonyesha dalili zote za kuzimika, lakini hakupata shida wala kutumia muda mrefu wa kujieleza kuwa anatafuta mahali pakulala usiku huo. Akakaribishwa. Alifika nyumbani hapo. Antii alikuwa mzungumzaji, Nanaa mchekaji. Stori zikaanza, Nanaa kucheka tu wakati wote. Mpaka wanaagana kwenda kulala, hakuwa ameulizwa kulikoni japo alikwenda na begi lake. Mama huyu wa kichaga hakuwa ameolewa. Japo alikuwa na watoto wakiume wawili na wakike mmoja, ambaye alikuwa anasoma hapo hapo chuoni, lakini alikuwa likizo na kaka zake, huko migombani kwa bibi na babu yao. Nanaa akajikuta na yule mama tu mle ndani. 

Antii alikuwa ni matroni wa hosteli za wasichana palepale chuo kikuu cha Mlimani, lakini pia anabiashara zake zinazomwingizia pesa. Anasomesha watoto wake yeye mwenyewe na mkubwa alishaoa. Maisha yake yalikuwa yakuhangaika kuanzia saa 11 asubuhi yupo macho mpaka usiku anakimbizana na pesa ya jiji la Dar. Alishamwambia Nanaa asubuhi anawahi mahali, akiamka yeye ajitengenezee chakula na maisha yaendelee kama kawaida, asimsubiri. 

~~~~~~~~~~~~~

Usiku alijisahau kuchaji simu yake, sababu ya stori. Akalala akiwa hoi. Hata mama G, hakumtafuta tena. Asubuhi akiwa peke yake pale ndani ndipo akakumbuka anatakiwa kumtafuta kaka yake James na Mama G, kuwaambia alipo. Akawasha simu mara ilipojaa. Tayari ilikuwa saa tano. 

Wa kwanza kumpigia simu akawa kaka yake. “Mbona unanitia wasiwasi?” “Pole kaka. Nipo kwa Antii. Si unakumbuka nilikwambia alivyo muongeaji? Tulilala saa sita kwa stori.” “Na unavyopenda stori wewe!” “Kama ulikuwepo. Nilikuwa nina kazi ya kucheka tu.” “Lakini nimefurahi kama umepata wakati mzuri. Sasa umemwambia nini?” Nanaa akamuelezea kaka yake habari za chumba kwa ufupi. 

“Lakini Antii hata hajauliza. Yeye kafurahi kuniona tu. Akaanza stori zake. Lakini kaka, itabidi nizungumze naye atakaporudi. Ili aniweke mpaka nitakapopata chumba changu. Ni mama mzuri. Mtu wa nyumbani. Kama nilivyokwambia, ananipenda tokea zamani. Haachi kunitafuta na kunijulia hali na maendeleo yangu. Sidhani kama atajali nikijishikiza hapa kwa muda mpaka nitakapo pata chumba changu.” “Sawa kama atakubali kuishi na wewe. Itakua jambo zuri. Utanijulisha basi atakavyo kwambia.” “Haya kaka. Asante.” “Unasalimiwa na Mama G.” James akamuwahi kabla hajakata simu. “Mwambie nitampigia kwenye simu yake.” Nanaa akakata simu.

Akampigia mama G. “Pole mama yangu.” “Mmmh! Umeniweka roho juu wala sijalala.” “Mbona sauti yako nzuri kama uliyelala usingizi mzuri?” “Si ndio sauti yangu ilivyo!?” Nanaa akacheka sana. “Unavyojisifia!” “Kumbe. Hebu niambie kama ulifanikiwa.” “Vyumba ni ghali, mama! Sio kama nilivyojipanga. Nimepelekwa sehemu jana, pazuri, lakini pesa nyingi. Hata hivyo ni pakubwa sana. Mimi na mabegi yangu tu, mmh! Tutapwaya.” Wakacheka. 

“Sasa, sasa hivi uko wapi?” Mama G akauliza tena. “Nipo kwa mama mmoja amenihifadhi. Ni mama mzuri sana. Nimelala nacheka tu.” “Na unavyopenda stori wewe!” “Kama ulikuwepo! Nilikuwa na kazi yakucheka tu hapa. Ametoka muda si mrefu, tulikuwa tukicheka hapa. Haishiwi vituko.” “Nimefurahi kusikia una furaha Nanaa.” “Mimi mzimaa. Wewe furahia harusi. Nitakupigia ukirudi.” “Unanipigia au unarudi nyumbani?” “Naona nitaendelea kuishi na huyu mama tu. Ila mkirudi, naomba unijulishe ili nije kuchukua mizigo yangu.” Kimya. 

Nanaa akaangalia simu kujua kama ilikatwa. “Mama!” Akaita. “Nakusikiliza.” “Basi tutawasiliana. Nikuache ujumuike na wanao. Angalia tu Zinda asije kukupa pombe.” “Hapa nimeshaanza kulewa.” “Mama wewe!” Nanaa akashituka sana “Nakutania bwana!” “Haya mama yangu. Have fun. Baadaye.” “Sawa.” Mama G, alikata simu lakini kila mtu alimuona alivyobadilika sura. 

“Nanaa hajambo?” Grace aliyekaribu naye akauliza. “Mzima. Anacheka tu kama kawaida yake. Atakuja kuchukua mizigo yake tukirudi sisi nyumbani. Amepata sehemu nyingine yakuishi wakati anatafuta chumba chake. Analalamika vyumba ni garama. Nimeumia sana. Najiona kama sipo tayari kuachana na yule mtoto! Sijui nikumzoea sana!?” Grace akanyamaza, Danny hakuongeza neno. Geb naye alikuwa akisikia kila kitu kwani hakuwa mbali nao. Akanyamaza tu.

~~~~~~~~~~~~~

Kuanzia asikie Nanaa anahama nyumbani kwake, Geb hakutia hata maji mdomoni. Hata kwenye sherehe alikuwa kimya. Bila kula wala kunywa. Watu walisherehekea, lakini Geb alikuwa kimya. Grace akajaribu kumpa hata soda, lakini hakuinywa. Mama G alikuwa upande wa wazazi wa Malii wakiongea na kucheka mpaka sherehe ilipoisha.

Baada ya sherehe kuisha Grace akamuita mama yake pembeni, kabla hawajaingia kwenye gari kurudi hotelini. “Ujue tokea mtori uliomlazimisha Geb kula mchana, akala vijiko sijui vinne sijui vitano, ujue hajatia kitu kingine mdomoni?” “Haiwezekani! Hata kwenye sherehe!?” “Nimempa soda, akaipokea na kuiweka chini ya kiti. Mpaka tunatoka pale, hakuiweka hata tone mdomoni.” Mama G, akanyamaza. 

“Sasa na wewe kwa nini uliongea pale mbele yake kama Nanaa anahama nyumbani, mama jamani!? Si ungesubiri mpaka turudi nyumbani!” “Nahisi nikujisahau bwana! Nitazungumza naye tukifika hotelini.” “Sidhani kama kuna safari ya Arusha tena!” Grace akaongeza. “Atafia njiani kama asiporudi na kumuona Nanaa. Heri kesho alfajiri tugeuze.” Wakaingia kwenye gari. Geb alikuwa amembeba Fili muda wote wa sherehe, akawa ameshatangulia naye kwenye gari. Alikuwa amesinzia muda wote wakati amempakata.

Walifika wote ndani ya gari, Geb akawasha gari na kuondoka bila ya kuongea chochote. Danny na mama G wakaendeleza stori za kwenye sherehe. Walisimuliana vituko vilivyotokea kwenye shuguli nzima, wakawa wanacheka wao wawili tu. Geb na Grace wakiwa kimya. Walipofika hotelini kabla ya kushuka kwenye gari mama G, akaanza. “Nashauri Danny uwaage wenzenu usiku huuhuu, ili kesho alfajiri sisi tuondoke hapa turudi nyumbani.” “Wazo zuri mama.” Danny akaafiki. Akamchukua mtoto wake na mkewe, wakaondoka na kumuacha Geb na mama yake kwenye gari. 

~~~~~~~~~~~~~

 “Nitazungumza na Nanaa, ili asihame. Tuendelee kuishi naye.” Mama G akavunja ukimya wakiwa wamebaki wao wawili kwenye gari. Geb akamgeukia mama yake. “Unafikiri baada ya yote haya atakubali na wakati nimemsikia akisema amepata sehemu nyingine ya kuishi, na kaka yake ameshamkubalia?” Geb akauliza akionyesha kukata tamaa. “Wewe ushawahi kuona nimekuahidi kitu halafu nikashindwa kukutekelezea?” “Nahisi nimeingiwa na hofu mama. Hali haikuwa nzuri. Halafu siku..” Geb akakwama.  

“Grace na Danny wamenieleza kila kitu. Wewe usiwe na wasiwasi. Nataka utulize mawazo. Upate mapumziko mazuri. Kama hakuna jingine litakalozuka, ikawa ni haya tu yaliyotokea njiani na hapa hotelini, nakuhakikishia Nanaa atarudi nyumbani.”  Geb akavuta pumzi kwa nguvu, akazishusha taratibu kama kujituliza “Asante mama.” Geb akashukuru. 

“Twende chumbani kwangu ukanywe soda na karanga.” “Sijisikii kula mama. Naomba nilale tu.” “Basi kama ndio hivyo, mimi sitazungumza na Nanaa.” “Mama!!” Geb akamshangaa mama yake. “Sasa kwa nini huridhiki moyoni wakati nimekwambia kesho Nanaa atalala nyumbani?” “Sasa si mpaka akubali?” “Kwa hiyo huniamini?” Mama G akamuuliza. 

“Basi mama. Twende nikanywe hiyo soda.” “Nimesema na karanga.” “Tumbo limejaa mama yangu. Lipo kama lina gesi, acha nikanywe tu soda.” “Usinichezee akili Geb! Nimesema hilo ndilo sharti langu. Hutaki kula, basi.” Geb akacheka kidogo na kutingisha kichwa. “Unavyoninyanyasa mama wewe!” “Kumbe!” “Haya twende mama yangu.” Mama G aliwapenda wanae. Alitaka kuwapa chochote wanachotaka. Akishindwa, basi anakimbilia kufunga na kuomba. Atamlalamikia Mungu kwa machozi mpaka afanikishie wanae. Na watoto wake walimjua hivyo.  

~~~~~~~~~~~~~

Kwa shutuma zote zile, Nanaa atakubali kurudi kuishi nyumbani kwa Geb tena akiwa amepata sehemu nzuri na tulivu ya kuishi?

Usikose Sehemu ya 17.