Asubuhi ya saa 11, Andy akawa amewasili na yeye hapo nyumbani kwao. Mzee Ruhinda akamfungulia na kumkaribisha. “Vipi Mina?” “Mama yenu alimpa dawa akamuacha amelala ila anawasiwasi sana na lile jicho. Sio zuri kabisa na pressure ilipanda sana. Tunafikiria leo kumrudisha hospitalini.” Akabaki amesimama akifikiria.

“Nenda kapumzike. Unaonekana hujalala.” “Sikukusudia kumuumiza Mina, baba!” Baba yake akabaki akimwangalia. “Na simchukii mtoto aliye beba.” “Nafikiri unaongea kitu sahihi lakini kwa mtu asiye sahihi.” “Nataka na wewe ujue!” “Itasaidia nini!?” “Nataka ujue tu.” “Acha nikwambie ukweli mgumu Andy.” Wakakaa ila alizungumza kwa sauti ya chini kama asiyetaka kusumbua waliolala.

“Nazungumza hili si kupuuza kilichokupata! Au kudharau maumivu yako! Hapana. Ila nataka kukwambia jambo ambalo najua mama yako alikwambia na dada yako. Ila mimi nitazungumza kwa upande wa hiki ulichotaka nikijue.”

“Wakati Pius anatunza familia yako, tokea mtoto wako ni mdogo kabisa, hakuwahi kumwambia mtu kama anampenda Ayan au Mina. Kwa hakika, mwanzo alianza kama Pius, jukumu la kaka kwenye hii familia, mpaka ungemuhurumia jinsi alivyokuwa akihangaika na mwanao, ili tu kuwasaidia wewe na Mina ambaye bila sisi kuingilia kati, ile shule ingemshinda. Pius alihangaika na Ayan kama mtoto wake huku mazingira ya nyumbani kwake hayaruhusu kabisa, wewe unamjua Raza.”

“Mtoto wako alipokuwa hapa, tena bila mama yake kuwepo au mimi na mama yako, alikuwa akijua ameachwa hapa na msichana wa kazi, basi hata mida ya mchana atatoka kazi na kuja hapa anashinda naye na kucheza, ilimradi tu Ayan asikue bila aina ya baba. Alimpenda Ayan kama wake! Mchana na usiku, kwa uzima na maradhi, alisaidia familia yako nafikiri huko ndiko shetani alipomjaribu. Huko sitataka kwenda.”

“Lakini ninachotaka kukwambia ni hivi, tafadhali sana, MATENDO yako yazungumze bila maneno. Ni hilo tu.” Andy akabaki ameinama, macho mekundu. “Nenda kapumzike. Tutazungumza baadaye.” Akanyanyuka na kupandisha ngazi akielekea chumba alichoambiwa amelala Mina na mtoto wake.

~~~~~~~~~~~~~~~~~

Kufungua mlango, patupu. Na utupu ule ni kama mtu amekimbia. Baadhi ya nguo zilikuwa zimezagaa mpaka sakafuni. Akakimbilia chooni. Hakuwepo Mina wala Ayan. Akakimbilia chumbani kwa wazazi. Akagonga na kuuliza hata kabla hajakaribishwa. “Mina na mwanangu wamekuaga wanakwenda wapi?” Swali hilo akawa anamuuliza mama yake. “Umeangalia chumbani? Watakua bado wamelala.”

Akatoka hapo akikimbia ikabidi baba yake amfuate nyuma, mpaka getini kwa walinzi ambako alipita bila salamu. Alifunguliwa geti na kuingia kama chooni. “Mlimuona mke wangu na mtoto wakitoka hapa?” “Usiku aliniomba nikamtafutie taksii. Ikaja nikamsaidia kubeba mizigo. Alionekana mgonjwa, yupo dhaifu na anatumia jicho moja. Ila nikihakikisha yupo salama na mtoto.” Andy akajikuta akilia hawezi kumlaumu huyo mlinzi kwani alifanya kwa sehemu yake na anaonyesha alifanya zaidi kumsaidia. Mina si mtoto na hakuonekana ameruka ukuta, ametokea mlangoni kufika hapo getini akiwa na mwanae na mizigo yake. Si kosa la mlinzi. Hawawezi kumlaumu. Historia ya Mina mtoro ikamjia Andy.

“Ilikuwa saa ngapi?” Mzee Ruhinda akauliza. “Kwenye saa tano usiku hivi kwenda saa sita.” “Unamjua mwenye taksii?” “Hapana. Nilibahatisha tu, alikuwa akipita.” Mzee akarudi ndani akikimbia.

Kila Mtu Ana Mwisho Wake.

Naye Andy akamfuata bila kujua anakimbilia wapi. “Naomba mpigie simu mama Roni kujua kama Mina yuko huko.” Akashituka mama Ruhinda ila akapiga simu.”

“Samahani nakusumbua alfajiri hii.” “Hamna shida. Kwema?” “Nataka kujua kama Mina yuko huko?” “Ashawatoroka?” Akauliza bila wasiwasi, ikamfanya mama Ruhinda atulie kidogo na kuuliza. “Wewe unajua alipo?” “Mimi nilijua tu, hizo fujo za kwenu huko, hawezi kukaa. Namjua Mina. Na akiamua kuondoka, hamtampata mpaka aamue kurudi mwenyewe.” “Sasa atafanyaje na ni mgonjwa, mjamzito na ana mtoto mdogo?” “Hayo umeyakumbuka kwa kuchelewa sana mama Ruhinda.” Wote kimya wakisikiliza.

Ticha akaanza kutoa somo. “Nilimwambia Roni, kama angekuwepo macho sasahivi angekwambia. Nilikuwa nikimuhesabia masaa. Na hata hivyo amejikaza, kwamba kuna alipokuwa ameweka tumaini, ameona na hapo halipo ndio maana ameondoka. Hizo fujo zenu, Mina haziwezi. Na hivi ana wanae wote, hapo mtafute mahali, msubiri, na kumuombea. Hata mtume jeshi, Mina akikuponyoka, humpati ng’o. Anaweza akawa anaishi chini ya pua yako na usimpate.” Wote kimya wakisikiliza.

“Hata hivyo, muacheni apumzike.” “Mbona unazungumza hivyo, mama Roni?!” “Waswahili tuna usemi wetu unasema hivi, ukimchunguza sana bata, hutakaa ukamla. Mina alitulia na kujirudi haswa. Vijana wenu wakaanza kumchanganga hapo. Halafu binti zenu wanazunguka kwa watoto wa dada zangu kusaka habari mbaya za Mina.” “Ni mke wa Pius, tena ni sababu ya hasira tu.” “Basi una mambo mengi ya ndani kwako, yanakupita.” Mama Ruhinda akakunja sura na kumuangalia mumewe. Akaendelea.

“Si huyo mke mwenzie tu, hata wifi yake huyo Paulina anahangaika na Mina! Tena yeye anatafuta mpaka mganga wake. Eti kwamba mwanangu mshirikina, anawaloga. Nikanyamaza tu, nikiwaangalia, ila nilikuwa nikiwahesabia siku zenu.”

“Mama Ruhinda, 40 yenu imefika. Sasa hemeni. Mlicho kuwa mkikichokonoa, mmekipata.” “Tutamtafuta tu, na tutampata.” Akajibu kwa uhakika. “Sawa.” Na yeye mama Roni wala hakutaka kumbishia. Akamkubalia kiurahisi tu. “Najua ni mchanganyiko wa hapa katikati lakini patatulia.” “Kwako kunabadilika majina tu mama Ruhinda, lakini michanganyiko haiishi. Mlimkataa akiwa hajaolewa. Mkasema hajasoma, na katoka kwenye familia duni. Haya, kijana wako akahangaika wee, akamtoa hapa kwangu mnapopaona ni duni, lakini alikuwa ametulia, akampeleka kwenye mafleti pale katikati ya jiji, kisha akamtelekeza baada ya kumzalisha.” Akaendelea. Andy macho mekundi, hajiwezi.

“Mina akahangaika wee. Analea mtoto wenu, huku anasoma shule ngumu zinazofanana na nyinyi wasomi. Akawa hajulikani kama ameolewa au kaachika. Kijana wenu mara yupo mkoa huu, mara nchi hii. Mkaona havinogi, mkambebesha mtoto wa pili. Mkampiga mwanangu, ndio sasa, eti Andy aliyekuwa busy sana, gafla eti ndio akapata muda wa kurudi na kunirudishia mwanangu kama mzigo! Asimrudishe akiwa mzima, akaja kumtupa hapa mtoto wangu, anatapika, hajiwezi.”

“Tena akamuacha kama hawara tu, aliyekuwa amekutana naye barabarani wakati na nyumba alikuwa akisaidia ujenzi. Mkatumia ujinga wake. Mkamsainisha makaratasi asije wadai mali. Mkambwaga hapa, sikuwaona nyinyi wala mjukuu tuliyekuwa tukisaidia na sisi kulea wakati baba yake akiwa busy na anayoyajua yeye. Mkadharau hata juhudi ya Ron ambaye na yeye alikuwa na kazi kama ya Andy tu, lakini yeye aliweza kumlea Ayan bila kulalamika tena mpaka ofisini alikuwa naye. Ila mkaondoka na mjukuu pia mkatunyima hata kuja kusalimia.”

“Mkatupokonya mjukuu, na Mina mkamfukuza kama paka mwizi. Na yeye hakuwa na mengi, akaenda kutulia kimya. Halafu mlivyo majasiri nyinyi, na mwanae aliyekuwa akihangaika naye, akitangatanga naye hapa mjini kama kuku mwenye kifaranga asiye na banda, wakati baba yake anakula UJANA, pia MKAMPOKONYA. Sikusema kitu, nikawaacha tu.”

“Mkaenda kumtoa alikokuwa ametulia, mkamrudisha kwenu, mkaanza kumfanyia tena fujo. Amejaa mitandaoni, ndugu na wanao mfahamu wote wanatucheka, wanasema utabiri wao umetimia. Mina malaya, kashachanganya ndugu.”

“Mkaona na safari hii msimuache mzima, mumuweke kilema chakudumu, ndio aondoke kwenu. Na picha zake akiwa ameumizwa yupo hospitalini, pia zipo mtandaoni, kila mtu anaona na kujua, kasoro mimi mama yake mnayenidharau, mlishindwa hata kuniambia kwamba mwanangu yu mgonjwa, amelazwa. Mkaona mniweke pembeni, nyinyi ndio muendelee na mtoto niliyehangaika naye.” Walishituka hao kina Ruhinda, hawakujua kama kuna mtu alimpiga picha Mina akiwa hospitalini maana alilala usiku mmoja tu, tena chumba cha kulipia cha peke yake! Hawakujua kama watu walijua kama alilazwa akiwa ameumizwa.

 “Mina anapendwa sana hapa kwetu, hajafukuzwa.” “Basi hiyo njia yenu mnayotumia kuonyesha huo upendo wenu kwa Mina, imemuacha UCHI, hadharani. Tena si yeye tu. Mimi na kaka yake wote ni kama mmetuvua nguo kwenye ukoo na jamii nzima inayotufahamu.”

“Andy alimtoa kwangu akiwa ametulia. Mwanangu amejirudi, akaenda kumchanganya. Sasa, sasahivi ndio unasemaje tena!?” Mama Ruhinda hoi. Kila mtu hapo anamsikiliza huyo mama, Ticha, tena anaongea taratibu kama aliyekuwa akiwasubiria.

“Sikukupigia kukuudhi mama Roni. Samahani.” Akamsikia akicheka kwa kuguna. “Bora ungekuwa umeniudhi. Hilo mbona si tatizo? Wewe na hiyo familia yako, mnabaki na amani, mtarudisha umoja wenu, lakini mimi masikini, utajiri wangu ni wanangu. Sina mali, sina mume, mmeniingilia kwangu na kunipokonya kitu kimoja tu nilichokuwa nimeshikilia kwa maombi ya mchana na usiku, nikimlilia Mungu.”

“Mmesambaratisha kwangu, sasa mtulie. Mwambie Paulina na mwenzie Raza, mimi mganga wangu Yesu. Wasinitafute huko kwa wachawi na washirikina. Sijaloga mtu, wala sijawahi kumpeleka Mina kwa mganga aloge yeyote kati yenu. Ila namlilia Mungu wangu. Naamini ipo siku atanijibu tu. Sina chenu,  mwanangu kaondoka kwenu, naomba waambie familia yako, inatosha. Washatuvuruga hapa vya kutosha. Washatuchafua kwa ndugu zangu, INATOSHA. Sasa BASI. Furahieni huo utajiri wenu kwa amani.” Simu ikakatwa. Sebule nzima ikapoa kama wamepigwa kibao cha uso.

~~~~~~~~~~~~~~~~~

Wakamuona mzee anapiga simu. “Naomba uje hapa nyumbani, sasahivi.” Simu ikakatwa. Akapiga tena ya pili. Akatoa maagizo hayohayo. Kisha akaanza kuondoka. “Akija Pius na Paulina naomba muwaambie wasubiri, nakwenda kuoga nitoe hizi nguo za kulalia.” Mzee akapandisha ngazi na kupotelea chumbani. Akabaki Andy na mama yake, kimya kama msibani.

Akatulia kwa muda akamgeukia mama yake. “Kwani kilitokea nini tena?! Mbona kama Mina alikubali kuja kuishi hapa!” “Hilo swali uje kuliuliza wote tukiwepo hapa. Subiri.” Na yeye akaondoka. Akabakia Andy peke yake.

~~~~~~~~~~~~~~~~~

Baada ya muda akaanza kuingia Pius. “Baba amesema tumsubirie hapa.” Akamaliza hivyo na kurudi kuinama. Mara Paulina naye akaingia. “Kwema?” “Mzee amesema tumsubirie.” Pius ndio akajibu. Wakakaa ila Paulina akaanza kuita. “Mama Ruhinda?” “Tunakuja sasahivi.” Wakasikia akijibu. Kimya.

~~~~~~~~~~~~~~~~~

Baada ya muda mzee akashuka akionekana msafi. Akakaa kwenye kochi lake akamsubiria mpaka mkewe akaja. “Safari hii nimewaita nyinyi watatu tu, watoto wangu mliopo hapa. Nataka kuzungumza na nyinyi, ila sitaki UGOMVI hapa ndani kwangu. Nikimalizana na nyinyi, mnaruhusiwa kwenda popote mkaanze kupigana tena.” Mzee akaanza.

“Baada ya kuja na Mina hapa nyumbani jana, alikusudia kuishi hapa. Ninavyofikiria, sijazungumza naye, ila nafikiri maneno ya Raza, yalimuingia.” “Wala si kufikiri, Ruhinda. Alizungumza na mimi kabisa, akasema amemsikiliza Raza, yupo sahihi. Sio sawa kuishi hapa kwa sababu ni kama nyumbani kwa kina Raza na wanae pia.” “Raza alisema nini?” “Atakusimulia kaka yako, mkitoka hapa na kwenda mtakapochagua kwenda kuzungumza na kupigana. Ruhinda endelea.”

“Kwa hiyo ndio tumepata uhakika, sababu ya kuondoka kwa Mina na mtoto ndio hiyo.” “Eti nini!?” Pius akashituka sana. “Mina ameondoka usiku na Ayan, hajulikani alipo.” “Bora kutulie.” Akaongea Paulina bila hofu na kushangaza wote.

“Umesemaje Paulina!?” Baba yake akamuuliza kwa kushangaa sana ndio kama akili ikamrudia Paulina. “Nazungumzia kwa muda huu kama kuwapa nafasi hawa, kufikiria chakufanya na mchanganyiko huo wa watoto kwa mwanamke mmoja.” “Umechanganyikiwa wewe Paulina!” “Wewe na mwenzio ndio mmechanganyikiwa wala si mimi. Mmejaa mtandaoni, wanaume wazima hamna aibu!” Akaongea kama jambo la kawaida kabisa.

“Paulina, wale watoto ni wajukuu ZANGU mimi! Kwako wanaweza wasiwahi kuleta maana, lakini si kwangu. Umesikia Paulina?” Mzee akauliza kwa ukali haswa. “Ile ni damu yangu mimi. Nianze na wewe maana tuna ujumbe wako kutoka kwa mama Roni. Paulina, wewe umechangia kwa asilimia za kutosha kumfikisha Mina alipo. Na usijibu.” Paulina akanyamaza.

“Ulikuwa ukimtafuta nini uchawi mke wa kaka yako?” “Mimi sijamtafuta Mina uchawi.” “Hukwenda kwa ndugu wa Mina kutaka kujua habari zake?” “Wao ndio walinitafuta wakitaka kujua huku anaendeleaje! Na hiki kilichotokea pia walikitabiri kabla. Wakasema atatuchanganya, mpaka tujisahau tulipokuwa tumesimamia kabla hajaingia kwenye maisha yetu. Kama waliongopa, tujiangalie tulipo leo, na yeye yuko wapi.” Akaendelea Paulina na yeye bila jazba.

“Kwa maneno yao wala si yangu, walisema Mina ana majini…” “Nyamaza Paulina.” Pius akamkatisha. “Nyamaza kabisa na nisikusikie unarudia kusema tena.” “Wewe vipi Pius?! Sio maneno yangu, ni ya ndugu zake.” “Na ibakie hivyo. Na nakuonya Paulina na sitarudia kukuonya tena. Nitakupiga mpaka nikuumize, kama unadhani nakutania, rudia tena.” Pius akawa mkali kama yeye ndio Andy.

“Koma kusaka habari za Mina, na koma kupokea habari zake. Wakikuletea, zikimbie kama ukoma. Unanielewa Paulina? Hayajawahi kukuhusu na hayakuhusu. Maana hata Ayan alipokuwa na mama yake hapa akisoma, hukuhusika kwa karibu kwa lolote zaidi ya kusambaza chuki ya maneno. Nakuonya, kama nilivyomuonya Raza. Kaa mbali na Mina. Kwa maneno na vitendo. Sitarudia tena kukupa hili onyo. Kama huna neno zuri la kuzungumza juu yake, ikitokea anatajwa na wewe upo hiyo sehemu, nyamaza.” Akamgeukia baba yake.

“Samahani baba. Mina yuko wapi?” “Ametoroka.” Mama yake akamjibu yeye. “Wakati mkeo anatukana hapa chini, kumbe alikuwa akisikiliza huko juu. Akaniambia hataweza kuishi hapa, si sawa. Nikajaribu kuzungumza naye, nikadhani ameelewa. Jicho lilikuwa linatisha na pressure ikapanda gafla, ikawa juu sana. Nikampa dawa na kumwambia alale ili leo tumpeleke hospitalini. Ndio usiku huohuo akaita taksii akaondoka na mwanae.” Pius akaanza kulia mpaka akawashangaza. Alilia. Akalia sana.

“Ni mkosi gani huu jamani!  Imekua kama mfalme Daudi na adhabu aliyopewa na Mungu alipomuua Uria, akazaa na mkewe! Mwanangu anakwenda kufa hivihivi! Bora Mungu angeniadhibu kivingine lakini si kumgusa kijana wangu jamani!” “Sasa huo uchuro.” “Umemuona Mina, mama? Mina hana nguvu ya kuzaa, nakulea akiwa kwenye hali ile! Alitakiwa mapumziko kabisa kabla ya shuguli ya kujifungua!”

“Nisikilize Pius. Tupo hapa tulipo kwa sababu yenu nyinyi wote watatu. Sisi tumekuja kuingilia, tukiwa tumeshachelewa. Kama kweli uliyajua hayo yanayo kuliza juu ya mtoto wako, ungetafuta amani!” “Ni Andy, baba. Andy ana…” “Hutanizungusha kwa maneno ya lawama. Nilikuwa nimekaa hapahapa nikizungumza na wewe ukiwa unakwenda Dodoma. Sikukusihi uende ukatafute amani?” Wakashangaa Andy ameinama kimya. Hajachangia wala kukana!

“Eti Pius?” “Mimi nilikwenda kwa amani, Andy aka..” “Jamani, mama Roni na nyinyi wote mpo sahihi. Mimi ndio chanzo cha matatizo yote. Kweli nilimtoa Mina kwao kwa ahadi ya kumtunza, lakini…” Akasita.

“Mimi ndio nimekosea. Wote tupo hapa tulipo, kama mama alivyosema, kwa sababu yangu MIMI. Leo mtu kama Paulina anaweza kunitusi mimi na mke wangu, kiurahisi kabisa, ni kwa sababu mimi mwenyewe nimeweka mazingira ya kudharaulika. Nimempoteza Mina aliyekuwa tayari ametulia, anataka tu ndoa na mimi. Katika yote niliyomfanyia, Mina alinisamehe na alikuwa tayari tuendelee. Lakini nimekosa mke na mtoto wangu, sababu...” Akaona abadili alichokuwa akizungumza. Akamgeukia kaka yake.

“Pius umenikosea sana. Sana. Lakini najua sasahivi haisaidii tena.” Akanyamaza kidogo, kisha akaendelea. “Sijui nitampata vipi Mina, lakini nitamtafuta bila kukata tamaa.” “Tafadhali popote utakapomsikia hata kwa fununua na mimi naomba unitaarifu Andy. Tafadhali sana. Mtoto aliyebeba Mina si takataka, na hana hatia. Nililea mtoto wako bila kuchoka na si kwa ajili ya Mina, ila nilithamini ile ya kujua sisi wote hata tukiondoka, Ayana atabaki kubeba ukoo.” İkamgusa sana mzee Ruhinda na mkewe.

“Nilimpenda Ayana na kumlinda, nikiiangalia kesho yetu sisi sote. Mungu ni shahidi, na naomba alikumbuke hili hata huko mwanangu alipo. Hakika sikufanya kwa hila, ila upendo usio na hila hata kidogo. Nilimpenda Ayan. Ninachokuomba ni na wewe kumbuka fadhila. Ukisikia fununu au Mina akikutafuta, tafadhali nijulishe.” “Nitafanya hivyo.” Wote wakashangaa, Andy akasimama.

“Kama mtaniruhusu, naomba nipumzike kidogo, ndio niondoke.” Akaongea akimtizama baba yake. “Kwa namna hiyo, hapo hamna shida Andy. Ninachotaka ni amani. Ila mjue mmenipokonya wajukuu, waendeleza ukoo wangu. Roho inaniuma, najutia mengi sana.” “Tutawapata Ruhinda. Usikate tamaa.” “Acha na mimi nikaanze kufuatilia taksii iliyomtoa hapa.

~~~~~~~~~~~~~~~~~

Kazi ya kumsaka Mina ikaanza kwa kasi kubwa mno. Pius alikuwa kama amechanganyikiwa. Alitumia pesa akitafuta hata fununu tu kujua alipo, bila mafanikio. Walimsaka Mina mpaka wakanyanyua mikono.

Andy alikuwa na hukumu, akajifungia Dodoma. Ikawa kazi, mazoezini. Wanaume hao wakabakiwa na kazi ya kuweka pesa kwenye akaunti ya Mina. Andy kwa matunzo ya mtoto ila Pius ndio alikuwa nusunusu. Hakuwa na uhakika kama huyo mtoto atazaliwa. Mina aliondoka mgonjwa. Pressure ilikuwa juu, hatari ya kupoteza mtoto! Alikuwa dhaifu na jicho linalotisha hata kutizamika.

Huku Kwa Mina.

Kumbe huku kwa Mina alitoka pale, akaomba apelekwe kituo kikuu cha mabasi akitaka kutoka jijini kwa haraka sana kabla hapaja pambazuka na kina Ruhinda kumuwahi. Alifika pale akiwa ndani ya hiyo taksii, wakata tiketi wakaanza kukimbilia taksii aliyopanda na mwanae, wakitaka kumuuzia tiketi. Kila mkoa waliotaja, ulisikika wazi sana, akajua lazima watampata tu. Aliposikia wakiuza tiketi ya kwenda Lindi, mkoa ambao hata hakuwahi kuufikiria, akafurahi sana. Akachukua tiketi yake. Basi lilikuwa likiondoka alfajiri sana. Akaamua kwenda kusubiria kwenye basi na mwanae. Hakuchukua muda, baada ya kumuweka mwanae sawa, na yeye akalala mpaka asubuhi mwanae alipotaka kutumia choo.

Akamsafi kabisa ndipo safari ya Lindi ikaanza. Alipofika Lindi, bado akaona yupo hadharani, wanaweza kumpata. Akachukua pesa ya kutosha akaamua kwenda Nachingwea kabisa. Maamuzi hayo anafanya kwa kusikiliza hisia zake na vile anavyohisi watafutaji wake wangefanya kumtafuta. Akajua huko hata hawatapawazia. Safari ya Nachingwea ikaanza. Bado yupo na mwanae na tumbo lake. Alipofika huko akaangalia mazingira, akaridhika. 803034

Akafanya kama alivyofanya alipokimbilia Iringa. Akatafuta nyumba ya kulala wageni akatulia hapo kwanza kujiuguza mpaka apone kabisa, zaidi jicho. Na akajua kwa kuwa na Ayan tu pale, hata pressure itatulia. Pili aliona hapo ni sehemu nzuri itakayomsaidia kusoma mazingira. Ili kujua ni wapi aishi na hao watoto wake.

~~~~~~~~~~~~~~~~~

Akatulia hapo na mwanae kwa juma zima. Kula, kulala. Bila dawa za ziada mbali na alizofika nazo hapo, jicho lenyewe likapona. Akajisikia na nguvu akajua hata pressure imejirekebisha. Ayan yeye hana neno na mtu. Bora maziwa na mama yake awepo. Basi. Mina akapata utulivu na kufurahia kutoroka kwake. Pesa ipo na alikuwa na uhakika lazima Pius atamtunza tu. Alimtunza akiwa na mtoto wa Andy, akajua itakua zaidi akiwa na mtoto wake. Hakuwa na wasiwasi.

~~~~~~~~~~~~~~~~~

Taratibu akaanza kutafuta msichana wa kazi na nyumba ya kupanga. Alijua kwa hakika hataendelea kuishi huko, ila alitaka akae hata akitoka huko kurudi Dar ambako ndiko alijiambia angerudi kuishi huko na wanae maana hakuwa na uhakika tena na ndoa yake, iwe angalau Ayvin anaweza kutembea. Hana mshauri, linalopita kichwani kwake basi ndio hilohilo, kazi ikabaki pakuishi mpaka akapapata.

Mwenye nyumba alikuwa mama mfanyabiashara. Ana maduka hapo mjini akitoa vitu jijini Dar. Kwa hiyo akampangisha nyumba ilikuwa ndogo tu ila nzuri na inajitegemea japo inapakana na mwenye nyumba. Na pakawa na uwanja mkubwa tu aliosakafia kuzunguka nyumba zote, kisha hizo nyumba zikawa ndani ya ukuta na geti zuri tu. Pazuri na ilionekana bado ni nyumba mpya. Na hivi pesa ipo, akalipia ya mwaka mzima bila kujifikiria mara mbili na kuzidi kumfurahisha huyo mama.

Akamtafutia na msichana wa kazi kabisa, basi maisha ya Mina yakazidi kukaa sawa. Hanaga mawazo mazito. Hapo alishasamehe kila mtu, akaacha wanao mchukia, hakutaka hata kujisumbua kuwafikiria. Akaanza kuongeza mwili. Furaha na mwanae. Akitaka vitu, anamuagiza mama mwenye nyumba wake, akienda Dar, anamletea. Mina na mwanae wakawa wa kula kulala. Wana kila kitu wanachokitaka. Mtoto msafi muda wote na nguo za maana. Amani tele.

~~~~~~~~~~~~~~~~~

Ni Nini Kitaendelea?

Siku moja kabla ya safari. Mida ya saa nne dereva akawa ameshawasili. Shema alikuwa anakuja kuchukuliwa na baba yake mida ya mchana. Alikuwa anamuacha hapo akimsubiria baba yake. Dereva akagonga na kuingia ndani.

“Nimeambiwa nikukabidhi na hii bahasha. Nitakuwa hapo nje nikisubiria. Utakapokuwa tayari, utanikuta hapo nje.” Pam akapokea. Alipotoka tu akafungua akijua ni pesa. “Sasa pesa yote hii ya nini!” Akashangaa. Mara mama Batuli akagonga.

“Tunaweza kuzungumza?” “Karibu japo natoka.” “Sitakuweka.” Akaingia na kukaa kabisa. “Kaa nikwambie kitu.” Pam akakaa akiwa amekunja uso. “Hili tulikuwa tukiliongea na mama Pili. Nikasema nitakwambia.” Pam kimya akimsikiliza.

“Pam wewe ni mdogo na ni mzuri mdogo wangu. Ila umeshazalishwa na baba Shema. Matunzo unayoyapata sasahivi, ni kwa sababu hana anayemshika mkono. Akija pata mwanamke mwenye roho mbaya, hata kama nia ya kumtunza mwanae ipo, mwanamke akamkoleza vizuri, mengi unaweza usiyaone kwa wingi huu.”

“Ukishikwa mdogo wangu, shikamana. Makosa yanaweza tokea, lakini kama mwenzio amejirudi, samehe. Najua mpo kwenye mahusiano na Mgaya. Wewe unataka ukaanze upya? Baba Shema lishakuwa jini likujuwalo. Halikuli likakwisha. Endeleza hapohapo.” Kimya.

 “Watu wa baya Pam wewe! Eza pata mwanamke akampeleka kwa wataalamu, wakamfunga akili huyo, asikae akakukumbuka tena. Lakini ukikaa mwenyewe jikoni, unayo jeuri ya kupakua utakavyo! Ni hilo tu. Akili kumkichwa. Mjini hapa!” Alizungumza na lafudhi yake laini ya pwani. Akaondoka bila ya kujibiwa, ila akamuacha ametulia akifikiria.

~~~~~~~~~~~~~~

Alishampa Mill maneno machungu kwa hasira. Mill ameyatunza moyoni na yeye ni kama hataki tena. Anajirudije kwa Mill anayeondoka nchini!? Akawaza na kuamua kuyaacha tu. Akaondoka kwenda kufanya manunuzi, kijana akimsaidia kama aliyeambiwa ahakikishe asinyanyue kitu.

Alinunua vyakula vya kutosha ili huyo mtoto wa Mill asiende shinda njaa huko kwao kama mwenyewe Mill alivyosema. Akanunua zawadi mpaka kwa babu yake! Pesa si ipo! Yale mahitaji ya muhimu aliyojua kwao wanahitaji lakini hakuwa na uwezo, safari hiyo alifanya. Kuja kumaliza, gari nyuma imejaa. Anapangaje kwenye masanduku kusafirisha kwa basi! Akawa amekwama.

~~~~~~~~~~~~~~

Wakati wanarudi ilishakuwa jioni kama ya saa 10 hivi. Foleni na manunuzi mengi wakajikuta wanafika Tandika mida hiyo. Akakuta gari ya Mill imeegeshwa pembeni kidogo ya nyumba. Akajua yupo hapo anamsubiria. Akashuka garini, akaenda kwenye gari yake.

“Shema yuko wapi?” “Tumerudi hapa, nimekuta kundi la watoto wakimsubiria. Ameingia ndani kubadili nguo, ameondoka muda si mrefu.” “Yaani Shema na mpira jamani! Hachoki!” “Na wanampenda kweli wenzie! Wakimuona ndio kama siku imeanza.” Akacheka na kutulia.

“Nashukuru kwa msaada wa pesa.” “Umepata kila kitu?” “Naona nimezidisha pia. Walikuwa na mahitaji huko nyumbani, ila uwezo ndio sikuwa nao. Nikawa nawaambia wanipe muda. Leo nimejibana mpaka nimewapatia kila mmoja mahitaji yake. Nashukuru, ila ujue naenda kuwaambia ni zawadi kutoka kwako.” “Haina maana Pam!” “Kwangu inamaana Mill! Unanijali mimi na Shema. Asante.” Mill akamwangalia kama hajamuelewa sawasawa. Kama aliyejirudi vile!

Pam akashindwa azungumze nini tena, ila kuaga. “Acha nikuache ukaendelee na shuguli zako.” Akabadili mazungumzo akiaga. “Nina wazo. Ila kuwa huru kukataa kama vitaingiliana na mipango yenu.” “Mill! Sina mpango na Mgaya! Na siendeshi maisha yangu kwa kupitia yeye! Ni uhusiano wa kawaida tu. Lakini si kama napanga naye mambo!” “Ingekuwa mimi nisingechukulia kawaida. Mtu anayekufaa kipindi cha ugonjwa! Uliyemchagua kuwa karibu yako kipindi cha uhitaji wako na yeye akatoa muda wake kwa ajili yako! Sidhani kama ni mahusiano ya kawaida.” Wivu tu.

“Lakini tuyaache hayo. Hayanihusu tena.” “Unamaanisha nini!?” “Mimi mbaya! Nina laana ya kwetu! Nipo kama baba yangu! Nataka kukufanya mama Kenny! Nakuona mjinga! Kweli kuna unalotaka kulisikia tena kutoka kwangu?” Pam akashindwa hata kumtizama, akainama hapo dirishani alipokuwa amekaa Mill.

“Huyu dereva ni mzuri sana. Mtu mzima na ametulia. Naweza kumuomba awasindikize mpaka nyumbani Lushoto, kisha kurudi kuja kuwachukua. Itasaidia kuwa na safari tulivu. Unaonaje?” “Nitashukuru.” Alijibu akiwa bado ameinama.

“Basi kesho mida ya saa moja asubuhi nitamwambia awe ameshafika, asaidie kumalizia kupandisha mizigo kwenye gari, muondoke.” “Asante. Nashukuru.” Akabaki ameinama. Mill anaona tu kichwa. Wakatulia kidogo, akaona aage. “Usiku mwema. Na mkisafiri muwe nasafari njema.” “Na nyinyi. Mwambie Shema anipigie mkiwa njiani. Na nitakuwa nikiwasiliana na dereva pia kumkumbusha awe makini huko barabarani.” “Sawa. Asante.” Pam akaondoka bila hata kumwangalia.

Barua Kwa Mill.

Maneno anayo rudiarudia Mill aliyomwambia akajua yamemuumiza sana. Na kadiri alivyokuwa akiyarudia kwake akayasikia machungu hata masikioni kwake yeye mwenyewe. Kumtafuta kwa simu, aibu. Alishamkatalia namba. Sasahivi amempa mtoto wake simu, anawasiliana na mtoto wake, hana tena shida na kumtafuta. Na maneno ya mama Batuli akajua yanaweza kuja tokea. Akamwandikia barua ili dereva akirudi aje ampe.

‘Mill, ni mengi yametokea katikati yetu. Nasikitika umerudi umekutana na Pam aliyejeruhiwa nafsi. Imejaa uchungu na kusalitiwa. Lakini sio sababu ya kukurushia maneno mabaya. Nimekosa, naomba unisamehe. Nisamehe kukufananisha na baba yako pamoja na babu yako.’

‘Huna laana, ila mimi nahisi ndiye mwenye laana kama mama yangu. Imekuwa ngumu kwetu kubahatika kama wanawake wengine. Tafadhali naomba nisamehe. Sitarudia kusema hivyo. Naamini Mungu atakusaidia kama unavyoomba kuja kuwa mume mzuri, kwani nimekuona jinsi ulivyo baba mzuri kwa Shema. Nashukuru. Asante.’

‘Swala la Mgaya nalo pia naomba unisamehe kwa mazingira uliyoyakuta siku ile. Nilishazungumza naye, na nimemuweka sawa. Ameelewa. Kwa hiyo ile hali haitajirudia tena. Tafadhali naomba unisamehe. Kwangu si dangulo. Na mimi namuheshimu sana Shema. Sijawahi fanya lolote la kumfedhehesha mwanangu.’

‘Naomba msamaha kwa yote niliyokuumiza. Nakuahidi kubadili maneno yangu ili yasiendelee kukuumiza. Samahani na asante kwa yote unayotufanyia mimi na Shema. Asante. Nakutakia kila la kheri kwenye maisha yako. Pam.’

Akaifunga vizuri na kuiweka. Mama Pili akaingia kumsaidia kufungasha, kisha akaja mama Batuli. Vicheko na mengi yakaendelea mpaka wakamaliza. Pam amekaa tu anawaelekeza. Akawashukuru kila mmoja akaenda kulala.

Safari ya Lushoto.

 Saa moja kamili dereva akawagongea. “Na baba Shema yupo nje. Na yeye amesema amekuja kuwaaga.” Shema alivyosikia tu hivyo, akatoka kwa haraka. Alipendeza huyo! Maana baba yake alimpeleka tena kwenda kunyoa. Mama yake alimuamsha siku hiyo alfajiri. Akaoga na kumpa track suite nyeusi alinunuliwa na baba yake na sneakers nyeusi zenye nyekundu kidogo. Akapendeza, ungejua ni mtoto wa Mill.

Pam akamkabidhi yule dereva vitu vyote kisha akatoka na kufunga mlango wake. Akakuta shoga zake wameshaamka wametoka kumuaga. “Utafikiri mwali! Umependeza sana mama Shema.” “Najitahidi kumtia moyo mama yangu. Akiniona, afurahi.” Wakataniana hapo kisha kuagana nao, ndipo wakatoka wakimsindikiza. Na wenyewe wakashangaa kumuona baba Shema hapo nje.

“Sasa huyu Shema anapanda gari gani?” Wakawa wanaulizana wakitamania maisha hayo mapya ya wenzao. “Anasalimia tu.” Mill akashuka garini alipowaona. Yeye Pam alivaa gauni zuri, ila refu juu mpaka chini. Japokuwa mwili uliisha, lakini lilimkaa mpaka mate yakamtoka Mill. Nywele alishasukwa rasta ndogondogo na mama Pili. Siku hiyo hakufunga kitambaa. Na hivi alisikia Mill yupo nje, akaziachia kusudi kumrusha roho. Akaweka na hereni na lipstick nyekundu. Bwana Pam alipendeza! Ungejua kuna neema.

“Umependeza sana Pam!” Mill kama kawaida yake, hajiwezi kwa huyo mrembo. Na kwa asili alipenda vitu nadhifu. Sasa siku hiyo Pam akajiweka sawa mpaka akakubali. Yaani tangia wanakutana baada ya kurudi nchini, siku hiyo ndio anamsifia mbele ya wenzie.

“Asante. Lakini usingedamka mapema hivi! Ungepumzika tu.” “Naona bora hivi nikishawaona mmepanda kwenye gari, nitaridhika. Umembembea huyu masweta yakumtosha?” “Nimebeba, na nishampa dereva amuwekee moja kwenye gari. Atakua sawa.” “Mnakwenda nyumbani, hakuna haraka. Tafadhali msisitize huyu, asije pata tamaa ya kuwahi kufika ili ageuze kwa haraka.” “Nimesikia. Na nitakuwa makini. Mbona tutafika tu salama, wala usiwe na wasiwasi.” Akajibu huyo dereva.

Akaenda kumtoa Shema garini. “Usiache kunipigia. Kila baada ya masaa…” “Mawili.” Akamalizia Shema akicheka. “Kumbe maagizo yote anayo!” Mama yake akasikia. “Nakumbuka kila kitu. Asante baba. Na wewe usafiri salama. Ningekuwepo ningekusindikiza.” Mill akacheka. “Tutapanga safari nyingine, tutakwenda wote. Na wewe ukapaone huko.” Akafurahi Shema. Baba yake akamkumbatia kwa muda na kumsindikiza garini.

“Funga mkanda wakati nakuona. Na huo mkanda usitoke hapo mpaka gari iwe imesimama, unashuka.” Pam akashangaa kuna mito na blangeti kabisa. “Hivi vyote ni vya humuhumu?” “Nimewanunulia ili mpate pakujiegemezea, mlale mkichoka.” “Nashukuru kujali Mill. Asante.” Shoga zake wakamuaga wakishangaa kwa kuchungulia mpaka ndani ya gari.

Akamsogelea Mill. “Hii ni barua yako.” Mill akamwangalia machoni na kuipokea akimuuliza. “Ndio talaka yangu rasmi?” “Utaisoma na nina maanisha kila neno.” “Sawa.” Akaiweka mfukoni. Kisha akampa mkono wala si kumkumbatia. Kiroho kikamuuma kidogo Pam, ila akampa na yeye mkono. “Muwe na safari nje, na mapumziko mema. Gari itakuwepo tu nyumbani. Ukihitaji kurudi, mpigie, atakuja kuwafuata.” “Nitafanya hivyo. Asante.” Pam na mwanae wakaondoka. Safari hii kwa heshima si kama safari nyingine.

~~~~~~~~~~~~~~

Picha ya Pam vile walivyoagana ikawa ikimsumbua. Ukweli Mill alimpenda sana Pam. Akakumbuka ile barua. Alipofika tu kwake hata ndani hakuingia. Akaanza kuisoma garini. Akarudia tena na tena. Hakupata dawa ya kile, kinachomsumbua rohoni.

“Inamaana hawa wawili wapo na mahusiano halisi!” Wivu ukazidi kumsumbua. Mgaya na Pam! Akazidi kuumia kwa wivu. Akabaki akiwaza garini. Shema akampigia. “Umefika salama nyumbani?” Akajisikia kufarijika, mwanae kumjali. “Nimefika salama. Na nyinyi?” “Tupo salama. Nataka kulala, ndio mama ameniambia nikupigie kwanza kabla sijalala, nijue kama umefika salama.” Akacheka aliposema ukweli.

“Haya nashukuru. Wewe lala. Utanipigia ukiamka. Na mwambie mama asante kwa kujali.” Angalau Pam akafurahia hilo ila kujiuliza kama alisoma barua yake. Wawili hao wakageuka wa miaka ya 90. Kwa wote kushindwa kujishusha. Pam aliombwa simu akakataa, baadaye akajuta, ila kushindwa kumpa tena. Mill naye alinyimwa mara moja, jeuri hataki kubabaishwa. Ila Pam anamtaka.

~~~~~~~~~~~~~~

Pam na mwanae wakafikishwa kijijini salama. Dereva aliposhusha vitu vyao vyote, yeye akageuza kurudi Dar. Huku nyuma Mill anawaza kurudi Marekani, kukaa muda wote huo, akisubiria majibu ya DNA, kisha tarehe ya mahakama! “Nitarudi Pam akiwa ameshaolewa, mwanangu alelewe na Mgaya.” Akaendelea kuwaza akikusanya vitu vya hao watoto akiwa hana uhakika kama atarudi nao au la. Kisheria walikuwa wake wakiwa wameandikishana mpaka mahakamani.

Lakini Mwanasheria alimpa moyo kwamba huo mkataba utakuwa void kwa sababu aliingia akijua watoto ni wake. Pam alishakataa kuwa mama Kenny. Inamaana hataki kuja kuwa mama wa hao watoto. Akazidi kuwaza Mill huku akijiandaa na safari.

Pam hakuwa akijua hapo anapopita Mill. Kubambikiziwa watoto wasio wake, na hata hao watoto hawakuwa wakijua linalowasubiria mbeleni au kwa nini wanarudi Marekani. Walijua ni kutembea tu. Jeuri, wanaishi na Mill akiwatetemekea, wasijue kama Mill amefika mwisho.

Kwa Mina.

Kitumbua Kishaingia Mchanga.

Mina akajua kwa hakika kitumbua kimeshaingia mchanga. Taratibu bila kutoa sauti, akarudi juu kwenye chumba alichokaribishwa. Akaingia bafuni akihema. Akaanza kufikiria kwa haraka. “Hapa hapatakalika tena.” Akawaza Mina. “Si sawa kwa Raza wala watoto wake. Itakua mimi nachukua nafasi yao hapa.” Mina akaendelea kuwaza akajisikia uchungu sana na kuanza kulia. Alilia sana akijutia maisha machafu aliyoishi zamani.

“Hakuna atakayeniamini tena, na utabiri wa wengi umetimia. Kweli nishachanganya wanaume na ndoa imeshindikana!” Akalia Mina akijilaumu sana. Mwishoe akasikia mlango wa chumbani unagongwa taratibu kama mtu anayetaka kujaribisha kama yupo macho au amelala asimsumbue.

~~~~~~~~~~~~~~

Akaosha uso kwa haraka na kutoka. Akafungua mlango. “Nilijua umelala! Nimekuletea chakula.” “Nilikuwa chooni mama. Ingia tu.” “Hili jicho ni lakuangaliwa tena na daktari wa macho. Sijalipenda linavyoendelea.” “Na linauma pia.” Mama Ruhinda akaliangalia tena. “Sio zuri kwakweli.” Akamfuta na tissue.

“Kula ulale. Tutazungumza. Kama twende kwa daktari leo au kesho.” “Lakini mama, naona mimi niondoke tu hapa.” Mama Ruhinda akashituka sana. “Kwa nini, na uende wapi!?”

“Sikuwa nimefikiria vizuri. Si sawa kwa Raza na watoto wake. Hapa ni nyumbani kwao. Kwa mimi kuwepo hapa ni kama nitawanyima uhuru. Mimi ninapo sehemu ya kuishi pamoja na watoto wangu, kwa muda mpaka wote tutakapojua chakufanya. Tafadhali mama yangu. Acha mimi niondoke ili kuleta amani. Ndoa yangu imeharibika, sitaki na ya Pius iharibike.”

“Nisikilize Mina, najua kuna uliyosikia, umeumia. Lakini ndoa ya huyo Pius ipo hivyohivyo tokea zamani. Inabadilika vijimambo tu. Wewe sie utahayesababisha lolote, na Raza si muondokaji kwa Pius. Hata iweje, ile ndoa si yakuvunjika. Atatulia tu.” Mama Ruhinda akamtuliza.

“Raza anapenda kuhamisha maneno na kila mtu anamjua, ndio maana hata mumewe hakutaka kumsikiliza.” “Lakini mama, kwa asilimia fulani alichozungumza Raza, hakukosea. Yupo sahihi.” Mama Ruhinda akashituka zaidi. Akidhani mtoto si wa Pius.

“Unamaanisha nini!?” “Kabla sijaolewa na Andy, ilibidi kumwambia historia yangu ya nyuma. Sikuwa nimetulia mama yangu. Nilikuwa mtoto mbaya, ndio maana nikashindwa hata kusoma. Lakini mama, nilitulia kabisa. Nikabadilika na tokea niwe na Andy, sijawahi kuwa na mahusiano na mwanaume yeyote yule, na Mungu wangu ni shahidi.” Akamuona mama Ruhinda amehema kwa nguvu.

“Ni maisha ya zamani mama yangu.” “Nisikilize Mina. Naomba utulie. Kama ni maisha ya zamani, na mumeo alijua na bado akakuamini kiasi cha kukuacha hapa mjini, inamaana alijiridhisha na tabia zako za sasa. Naomba utulie hapa. Kwanza hapa utakuwa na uangalizi mzuri, na wanao wapo kwenye mji wao. Ninachotaka kukwambia ni kuwa, haitakuwa rahisi hata kidogo. Na ninajua kwa sehemu unamfahamu Raza. Si ndio?” “Kwa kumsikia tu.” “Basi kama ulikuwa ukiomba, omba haswa. Huwa hajui kutania, na huwa hakubali hata iweje Pius akawa na mwanamke mwingine.” Mina akawa ameelewa kwa kiasi ila akataka uhakika.

“Nitakuja kukwambia habari za Raza na huyo Pius, acha niende nikamwangalie Ruhinda nijue anahali gani. Lakini usiondoke hapa hata iweje. Tulia tuli, jiuguze, uhudumiwe vizuri. Ruhinda si mnafiki. Akikupenda, amekupenda. Yeye ameruhusu uwe hapa, ujue atasimama na wewe kwa kuwa anakupenda. Tulia kabisa, na uwe na msimamo.” Mina akanyamaza akiwa hajaridhika kabisa moyoni. Bado akaona kuwepo pale si SAWA.

~~~~~~~~~~~~~~

Akakumbuka jinsi Poliny alivyomfukuza baba yake. Na alijua huyo binti si kipenzi cha Pius tu, hata babu yake alimpenda sana. Alikuwa binti aliyetulia, haiba nzuri na hapo kwa babu yake alipapenda sana. Akakumbuka maisha aliyowakuta nayo hapo kabla hajaolewa. Kupika pamoja japo wote wanao wafanyakazi. Lakini mlo wa jumapili walifanya kama kijidesturi chao wao wanawake kupikia waume zao na familia, siku hiyo! Umoja waliokuwa nao. Utulivu wa aina yake! Akajua utabiri wa watu utazidi kutimia kuwa huwa akiingia mahali, lazima avuruge.

~~~~~~~~~~~~~~

Wakati kila mmoja anataka kwenda kulala, ili waimalize hiyo siku ndefu, mama Ruhinda akaingia chumbani kwa Mina kumuangalia. Hakumkuta vizuri. Kichwa bado kilikuwa kikimuuma japo alishampa dawa ya maumivu. Akaamua kumpima pressure, akaikuta ipo juu sana. Akaingiwa na wasiwasi, akajaribu kumtuliza kwa hili na lile baada ya kumpa dawa ya usingizi, akamuomba alale kabisa na kesho yake ndipo waende hospitalini kwa ajili ya hiyo pressure na jicho. Akamuacha ili alale.

Lakini alishindwa kulala usiku huo kwa mawazo. Alimwangalia mwanae jinsi alivyolala pale kitandani na yule wa tumboni, akabaki akiwaza.

Akakumbuka ushauri mgumu aliopewa na mama yake siku aliporudishwa na Andy akiwa ni mjauzito. Asisumbue watu, akaanze kambi yake na wanae wa baba tofautitofauti! Akaona huo ndio wakati mwafaka wa kuutendea kazi.

Maamuzi Magumu.

Alikaa akiwaza mpaka kama kwenye saa tano usiku bila ya kupata usingizi ila kukubaliana na wazo lake. Nyumba ilishatulia. Wazee hao hulala mapema, kwa hiyo walishalala. Akaenda getini na kuomba mlinzi amtafutie taksii na kumwambia isubiri hapohapo nje, wasiingie ndani, wasije kuamsha watu. Akaanza kutoa vitu vyake na mwanae taratibu tena kwa kunyata akitumia mlango wa jikoni. Jumba hilo ni la gorofa, vyumba vya kulala vipo juu. Mlinzi akamsaidia kupandisha kila kitu garini. Akambeba na mwanae, Mina akaondoka hapo bila wenye nyumba kujua.

~~~~~~~~~~~~~~~~~

Kila mtu Maji yamemfika shingoni. Itakuaje?

-          Mill atafanikiwa kushinda kesi na kumrudishia Kisha watoto wake?

-          Mgaya yupo pichani, ameshakuwa kizuizi kati yao. Watafanyaje?

-          Kwa Mina na wanae? Huku ametahadharishwa juu ya Raza kuwa ajipange haswa, hakubali mwanamke mwingine kwa Pius. Ki vipi!? Japo Pius anaonekana kummudu, Ila kwa aliyoyasikia, Raza si wakuchezea.

-          Je, Kwa Pius anayemtaka huyo mtoto? Aje asikie Mina ameondoka na mwanae hajulikani alipo!

-          Kwa Andy je?

Usikose Muendelezo.

Walipigana hao kaka wawili mbele ya wazazi wao kama mabondia ulingoni, mwishoe mzee Ruhinda akawaamulia kwa kuwachapa makofi kila mmoja kama watoto wadogo ndipo wakatulia, na ndipo wakafanikiwa kwenda kulala bila maelewano.

Asubuhi.

Mzee Ruhinda aliwakatalia kabisa Andy na Pius wasiongozane nao hospitalini, wabaki. Na mama yao akawaonyesha tena ile picha aliyompiga Mina usiku uliopita kama kuwakumbusha madhara waliyomuachia Mina. Wakatulia. Walifika hapo hospitalini, jicho la Mina lilikuwa limevimba haswa mpaka wakashangaa. Hakuwa akiweza kufungua tena. Lilijaa mpaka shavu lilivimba.

“Mungu wangu!”  Akasikika mama Ruhinda. Ikabidi mzee Ruhinda kuzungumza na daktari, akamwambia asubuhi hiyo Mina ameamka pressure ipo nzuri kabisa ni hilo jicho tu, nalo alimwambia walipe muda litakuja kurudia hali yake. Daktari akawatia moyo.

“Naomba niwaombe kitu wazazi wangu.” Mina akaanza taratibu wakiwa wanasubiria kuruhusiwa. “Karibu Mina, mama.” “Kwa sasa kama mnavyoona, hali sio nzuri. Naomba kama itawezekana, nije niishi kwenu kwa muda mpaka hii hali itakapotulia.” Akaona wanaangaliana.

“Lakini kama haitakuwa sawa, nitakwenda kuishi kwangu mpaka nitakapojifungua.” “Hapana. Naona mawazo yako yamekuwa kama ya mama yako hapa. Alifikiria hivyo hivyo.” Angalau Mina akalifurahia hilo. “Lakini lazima nikazungumze na Andy. Nitaondoka na Ayan.” Hapo wakapoa. Wakaona wamuachie yeye mwenyewe.

~~~~~~~~~~~~~~

Walifika nyumbani kwa Andy wakamkuta na Pius yupo. Mina akashangaa, akajua lazima atakuwa ameambiwa na wazazi wake awepo hapo. Lakini hakuwa hata na hali ya kulifikiria hilo. Akaingia na kwenda kukaa moja kwa moja. Wote wakashituka sana kumuona vile. Alivimba uso, zaidi upande ule wa jicho lililoumia. Usingeweza kumtambua Mina vile alivyo. Alitisha sura na kuogopesha kumtizama.

          “Pole sana Mina.” Andy akamsogelea akataka kumshika, Mina akasogea kama kumkwepa. Wote wakaona. “Sikukusudia kukuumiza Mina! Samahani sana.” “Ulitafuta njia yakumlipa kisasi. Acha uongo.” “Tafadhali Pius, nyamaza.” “Sitaki amdanganye Mina, baba. Andy ni hatari. Amebeba chuki kwa Mina, anaweza kumdhuru yeye na mtoto wangu. Mwangalieni alivyo Mina sasa hivi. Halafu niambieni ni kwa jinsi gani mwanangu atapona kwenye mikono yake huyu! Kuweni wakweli na mniambie. Andy amejawa chuki, hawezi kujisaidia.” “Nakuonya Pius wewe!” “Utanipiga tena?” Pius akamuuliza Andy.

Mina akasimama kuelekea chumbani kwa mtoto wake. “Mina!” “Naona niondoke kwa muda Andy.” Andy naye akasimama na kumfuata nyuma. “Mbona nimekuomba msamaha!” Mina akasimama na kumgeukia wakiwa wamefika koridoni karibu na kuingia chumbani. Watu wa sebuleni hawawaoni lakini wanaweza kusikia.

“Mina?” “Sio hivyo tu Andy. Hii hali ni ngumu, mimi nakuelewa na wala sikulaumu. Nimeishi na wewe nimeona jinsi inavyokuwia ngumu Andy. Najua nia unayo, lakini uhalisia nao unakuvuta nyuma.” “Nakupenda Mina!” “Hilo nalijua. Najua unanipenda sana, mimi kama Mina. Lakini mambo yamebadilika Andy, tuwe tu wakweli. Sio kama zamani. Unaogopa hata kunikumbatia kama zamani ulivyokuwa ukitaka nilale mikononi mwako kipindi chote hata nilipokuwa mjamzito wa Ayan.” Mina akaendelea taratibu.

“Sasa sijui tatizo ni Ayvin au mimi kwa ujumla wake! Sijui..” “Nakup...” “Naomba nisubiri nimalize Andy. Umekuwa ukirusha ngumi na maneno makali kila wakati. Umejawa hasira huwezi, kujisaidia. Na huniamini tena Andy!” “Nakuamini.” Andy akajitetea.

“Hapana Andy. Tafadhali naomba nisikilize. Ugomvi wa jana umetokana na kile alichokifanya Pius, kwa kuwa wewe umeshindwa kabisa. Na umekataa hata kujaribu!” “Hunitendei haki Mina! Nimemkuta Pius akikushika.” Mina akashangaa.

“Kuwa mkweli Andy na tafadhali fikiria kabla hujajibu. Kama kweli mimi nilikuwa na nia mbaya, ningekuomba kweli unisindikize kliniki ili tuwe pamoja? Fikiria tu Andy. Nilikuomba kabisa nikitaka tuwe wote, lakini ulikataa mwenyewe ukaniambia upo na kazi nyingi kazini, na muda ni mbaya!” Mina akaendelea tu taratibu. “Na ndio kisingizio chake kila siku, KAZI.” Pius akadakia, wakajua wanasikilizwa. “Pius nyamaza.” Baba yao akasikika na sauti ya kuonya.

“Nakuomba pata muda wakufikiria Andy. Hii kitu sio rahisi kama tulivyodhani. Ayvin atakuwa kwenye maisha yangu daima. Sina jinsi yakumkimbia au kumuacha. Hawezi kulelewa na Pius, kwa hiyo nilazima awe kwangu. Pata muda wakufikiria kwa kina, bila mimi kuwepo na kuamsha hasira kila ukiniona na tumbo langu. Usifanye haraka na sitalaumu kwa maamuzi yeyote utakayoyachukua. Utanijulisha, na ninakuahidi, sitakudai hata shilingi moja.” “Unanifanyia hivyo kwa kuwa unajua unaye Pius!” Andy akalalamika kwa kuumia.

“Husemi kweli Andy! Mara ya kwanza ulinifukuza kwako kwa kunitaliki nikiwa mgonjwa bila hata pesa ya kwenda kumuona daktari! Mbona nilikutafuta kwa ajili ya mwanangu tu na wala si mali? Unafikiri sikuwa nikijua kuwa nilikuwa na haki yakudai mali kwa kuwa nilikuwa mke wako halali kwa miaka takribani minne! Lakini nilijiambia Mungu hataniacha. Kama anavyosema Pius, mimi sijui kwa nini Mungu ameruhusu mimba ya Ayvin itungwe. Sijui! Ila ninachojua mimi ni mama yake, na ninawajibika kwake kama kwa Ayan.” Mina akaendelea.

“Nitaondoka na Ayan pia.” “Mina!” Andy akashangaa. “Huwezi kumlea Ayan, Andy! Wewe ni shahidi. Huna huo muda. Hujawahi kuwa nao, na sidhani hata kama unao mpango wa kutenga muda kwa ajili ya mambo ya familia, Andy. Unakuwa kama unalazimishia tu! Nafikiri hata jana ulikuja hospitalini kwenye kliniki yangu si kwa ajili yangu, ila kufumania. Ukijua Pius yupo.” “Sio kweli Mina!” Andy akabisha.

“Mimi sitaki kubishana na wewe Andy. Nakuheshimu mume wangu. Lakini utagundua ninachosema ni kweli. Na ndio maana ulipofika pale ulikuja ukiwa umejawa na hasira. Na kwa haraka sana bila hata salamu, ukatafuta kosa. Ukanilaumu mimi kwanza na kuanza kurusha ngumi bila kujali aliyekuwepo mbele yako ni nani.” “Hapana Mina! Labda umetafasiri vibaya!” Akajaribu kujitetea Andy.

“Sasa ile hasira uliyokuja nayo na kuanza kumpiga Pius, ilikuwa ni ya nini Andy?” “Alikuwa amekushika Mina! Kweli ulitaka mimi nifurahie tu?” “Wewe ulifikiri ni nini kinaendelea pale mbele ya watu, tena hadharani kama si tayari moyo wako umeshachafuka juu yangu mimi na mtoto niliyebeba! Au niambie ukweli tu Andy, utakuwa na amani uje utukute mimi na Pius tu peke yetu tumekaa tu sehemu hivi?” Kimya.

“Najua ni ngumu na ndio maana kwa heshima yako Andy, na kwa kuwa nakupenda, nimeomba nikakae kwa wazazi kwa muda hata mpaka nitakapojifungua.” “Mina!” “Sina jinsi Andy! Mtakuja kuniua, niache watoto wangu bure! Acha kila mmoja wetu ajipange kwa upya. Ukija kunitafuta uwe umeamua kweli kuishi na Ayvin kama vile Ayan.” Wakamsikia Pius akicheka.

“Pius wewe, ujue unanitafuta Pius!” “Mimi nimefanya nini mama yangu!?” “Unachocheka hapo nini?!” “Mina anamtaka Andy awe baba kwa PJ wakati alishindwa kuwa baba hata kwa Ayan mwanae!” “Pius unakokwenda huko wewe utaharibu kabisa!” “Basi Mina, mama. Nimeongea tu nikikuhurumia wewe. Usitegemee kitu ambacho wazi unajua hutaweza kukipata. Sitaki uje uumie.” Pius akajaribu kumtahadharisha kwa upendo.

“Kwa hiyo yeye Pius ndiye anayeruhusiwa kuwa karibu na wewe?” “Hapana Andy. Na yeye lazima apate muda wakujifikiria ni jinsi gani ataishi na mimi akijua mimi ni mke wako, kama utaamua uwe na mimi. Lazima jukumu la kuandaa mazingira mazuri kwa mtoto wake liwe kwa Pius mwenyewe. Hawezi akaendelea kukukejeli wewe na kukujibu vile atakavyoweza na kupigana na wewe huku mtoto wake anakutizama wewe kama baba! Hilo haliwezekani.”

“Kama anataka mahusiano na mtoto, nilazima ajifunze kuwa baba, na garama pekee ninayotaka ailipe kwa Ayvin, iwe kukuheshimu na kukukubali wewe kwa namna yeyote ile ulivyo. Unaweza ukabaki kwenye maisha ya Ayvin kama baba atakayekuwa akikuona kila siku, KAMA narudia tena KAMA TUTAKUWA WOTE. Tusipokuwa wote kwenye ndoa, basi mimi na Pius, tukisaidiwa na wazazi, tutajipanga upya.” Pakazuka ukimya mkubwa sana.

“Yaani Mina, mama, hapo nakupongeza. Umeamua vizuri sana. Na naona wote umewagusa pabaya.” “Wala si pabaya mama.” Pius akabisha. “Mbona umepoa kama kweli ni rahisi kumuheshimu Andy na kukubali masharti yote Mina anayokupa?” “Kwa kuwa Andy mwenyewe hajui hata kuwa baba kwa mwanae, mama! Atawezaje kuwa mfano wa kuigwa kwa mwanangu?” “Ndio sasa umeambiwa utamkosa mtoto.” “Mimi na Mina hatujawahi kushindwana.” Mina akarudi pale sebuleni.

“Hutafika kuonana na mimi, kama baba na mama hawapo nyumbani Pius. Ili kumfanya Andy arudishe imani na wewe. Kuanzia leo, tafadhali anza kufikiria jinsi ya kumuheshimu Andy. Vile alivyo, ukijua ndiye atakayempa mwanao sehemu ya kuishi kama nitakuwa naye. Na wakati nyinyi wote mnajifikiria na kujipanga upya, jua ili kuniona mimi ni mpaka uzungumze na baba pamoja au na mama kwanza. Wakiwepo nyumbani, ndipo uje. Lasivyo itakuwa ni kutoniheshimu, na hapo utaniudhi. Nitaondoka na watoto wote, niende nikawawekee nyinyi wote restrain order msiwe karibu na wanangu kwa kuwa mtawadhuru kama mlivyonifanyia mimi jana.”

“Na ushahidi wa picha jinsi nilivyoumia kumbe kuna mtu alijiiba na kunipiga picha pale hospitalini, nesi aliyenisaidia asubuhi hii ameniambia, nasikia upo mtandaoni. Kila mtu ameona jinsi mlivyokuwa mkipigana, wakati mimi na mtoto tukiwa katikati yenu, wala hamkujali hilo. Mkaniumiza. Sitapata shida kuwawekea nyinyi wote wawili restrain order.” Wote wakashituka wasiamini kama Mina anayajua hayo yote. Wakapoa haswa.

“Niliwapa dhamana, nikiwaheshimu lakini naona mmeshindwa. Mmeishia kunidhuru na kubishana kusiko isha. Sasa ili wote muwe na mahusiano na watoto wenu, naomba nikaishi kwa wazazi kwa muda wakati nikijipanga na wote tukifikiria chakufanya sasa na baada ya mtoto kuzaliwa.”

“Majibu yangu kutoka kwa Andy na wewe Pius nitayapata kwa vile mtakavyofanya kuanzia sasa. Nawaahidi, sitafanya chochote bila kuwataarifu. Kama nikiwa naondoka kwa wazazi na kwenda kuanza maisha yangu, nitatafuta ushauri wa kisheria, wote mtawasiliana na huyo mwanasheria.” Pakawa kimya zaidi.

~~~~~~~~~~~~~~

Wakamuona mzee Ruhinda akicheka taratibu. Mina akasimama na kuelekea chumbani, akampita Andy pale alipokuwa amesimama. “Niliwaambia mimi! Tulieni ili mpange mambo kama watu wazima! Mmeona mambo yenu ya kitoto jinsi yalipowafikisha? Mmejiharibia sifa bila sababu!” “Mimi ninayo sababu baba. Pius amempa mimba mke wangu.” “Sasa kwa fujo mnazozifanya hizo, imebadilisha nini?”  Akauliza mama Ruhinda.

“Umeharibu sana Andy. Tena nilikwambia unayo nafasi nzuri yakuongoza haya mambo utakavyo, kwa sababu Mina alikuamini wewe. Ona ulipomfikisha huyu binti! Wote mmekuwa kama watoto wadogo! Wote mnakosa nafasi ya kuwa na watoto wenu!” “Ni kwa muda tu baba, naamini akipona atatulia.” “Nafikiri katika vitu ambavyo unatakiwa ujifunze Andy, kwa kipindi hichi ni juu ya mahusiano.” Akaanza mama Ruhinda.

“Acha nikwambie ukweli tu, pengine itakusaidia. Umeshindwa vikubwa mno. Tupo hapa sasa hivi, katika hili sababu yako WEWE Andy.” “Unampendelea Pius, mama. Kwa nini hum..” “Nisikilize kwanza Andy, kisha uwamue lolote utakalo. Useme nampendelea Pius au la, sitajali tena. Mimi ni mama yako, na nina jukumu la kukufundisha. Umekosea kwa Mina mara ya kwanza, ukapewa nafasi ya pili, UKAHARIBU kwa kumsikiliza Paulina, lakini napo ukifikiria kwa makini ni kwa kuwa HUJUI mahusiano Andy.” Mama Ruhinda akaendelea.

“Ukapewa dhamana nyingine na Mina, akakutanguliza huyu binti katika hili. Mbele ya kila mtu, Mina akakutangaza wewe ndio utakuwa kiongozi wa haya yote. Nishamsikia baba yako akizungumza na wewe kwenye simu, akikwambia ukitulia utaweza kuongoza hili jambo vizuri sana. Lakini hebu angalia hapa tulipo, jinsi ulivyoshindwa vibaya na kudhalilisha kila mtu mwenye jina la Ruhinda! Wote tupo kama uchi huko mtandaoni.”

“Usingekuwa kumtelekeza Mina, wala huyu mwenzio tamaa isingemwingia.” Mama Ruhinda akawa mkali kabisa. “Wewe unaacha mkeo analishwa, anauguzwa na kutunzwa na mwanaume mwingine! Eti wewe unazunguka kila mahali sababu ya kazi! Ulitegemea nini Andy? Tena ushukuru Mina alitulia, angekuwa malaya huyo, angekuua kwa maradhi kwa kubadili wanaume! Sasa badala utulie na kujirudi, unapigana kila mahali, na sijui kama hiyo kazi bado utakuwa nayo endapo viongozi wako wataona hiyo video.” Andy kimya.

“Huko unakojificha Andy, lazima utoke na ukubali kuwajibika kwa kuwa uliamua mwenyewe kuanzisha familia. Wote sisi tunazo kazi, lakini mbona bado tunakumbuka majumbani kwetu? Pius huyo ni shahidi. Ana kazi kubwa sana, lakini ameweza kumudu FAMILIA MBILI! Yake na yako.” “Na bado nyumbani amekuwa tegemezi.” Mzee Ruhinda akaongeza.

“Haya, umemsikia baba yako! Hutamuita Pius, au kumtuma popote na chochote, akashindwa. Japokuwa wote mnasema nampendelea Pius, haya, umemsikia na baba yako? Ndiye mtoto anayepita nyumbani kutuona mara kwa mara na kutujulia hali kwa simu kila siku. Anajua habari zote za nyumbani. Sasa jiulize yeye anawezaje, tena bila kuchoka au kubadilika, na kazi nzito aliyo nayo! Na bado anazo biashara zake, halafu wewe mwenye kazi moja tu, huna hata biashara, mke mmoja, mtoto mmoja tu, unashindweje!?” Siku hiyo mama Ruhinda akawa amekusudia, bila kumuogopa tena.

“Na kama  alivyokwambia mkeo, mtafute baada ya kujifikiria. Ukishindwa, SEMA. Tena sema haraka uache kupotezea watu muda!   Wewe sio wakwanza kushindwa na mambo ya familia na wala hutakuwa wa mwisho. Sema mapema watu wajue moja. Twende Ruhinda tukajiandae, turudi kwetu.” Mama Ruhinda akasimama na kwenda kwenye chumba walicholala usiku huo, Mzee Ruhinda naye akafuata. Pakawa kimya.

Kuruka Moto, Kakanyaga Majivu.

Mina aliondoka kwake na Judy pia ili akamsaidie kazi nyumbani kwa wakweze.  Walifika mida ya jioni. Hata hawakujua Pius aliondokaje pale Dodoma, lakini mzee Ruhinda alimkataza kuongozana nao. Wakaondoka yeye, mkewe, Mina, Ayan na Judy. Moja kwa moja mama Ruhinda akampeleka Mina chumbani.

“Judy atalala na mwenzie.” “Nashukuru mama, labda nilale na Ayan chumba hiki. Asiwe peke yake.” “Sawa kabisa. Ila ujue vyumba vipo vingi tu, ukitaka tunaweza kumtayarishia chumba chake.” “Nashukuru mama yangu. Lakini acha nilale naye tu.” “Basi pumzika, chakula kikiwa tayari nitakuletea.” Mama Ruhinda akatoka.

~~~~~~~~~~~~~~

Wakati anapitiwa na usingizi baada ya kumeza dawa ya maumivu akasikia kilio sebuleni kama mtu aliyefiwa. Mina akashituka sana, akatoka chumbani. Kadiri alipokuwa akishuka ngazi kutoka chumbani kuelekea sebuleni, akagundua ni sauti ya Raza. Mina akasimama kusikiliza.

 “Nafikiri pata muda na Pius, atakueleza vizuri.” “Pius ananidharau baba! Tangia anikatie simu jana, hapokei simu zangu. Hajarudi nyumbani na wala hajanipigia mpaka sasa!” “Ni kweli tulikuwa naye Dodoma, nafikiri leo atakuwa nyumbani.” Mzee Ruhinda akajaribu kumtuliza kwa kuzungumza naye taratibu.

“Kwa hiyo nyinyi wazazi mpo na mume wangu, na baba wa watoto ambao hawana hatia kuzaliwa wakike, mnamuuza mtoto wenu kwa mwanamke mwingine!?” “Najua upo kwenye mshituko Raza, lakini angalia usivuke mipaka.” Akazungumza mama Ruhinda kwa kumtahadharisha.

“Najua hamnipendi na mnanilaumu kwa kumzalia Pius watoto wa kike, lakini mkumbuke mwenye uwezo wa kutoa mtoto wa kiume ni mwanaume wala si mwanamke. Nyinyi mmesoma, mnawezaje kunilaumu mimi na si mtoto wenu!” Raza akaendelea kulalamika huku akilia.

Mama Ruhinda akachukua simu na kumpigia Pius. “Uko wapi?” “Njiani naelekea nyumbani.” Pius akajibu. “Pitia hapa nyumbani haraka.” “Kuna nini tena!?” Pius akauliza. “Wewe husikii sauti ya mkeo bwana! Hebu njoo hapa.” Mina akabaki akitetemeka amesimama kwenye ngazi za kushukia.

 “Namjua Mina ndani na nje. Nimepata leo habari zake zote kutoka kwa mtoto wa mama yake mkubwa! Mina ni malaya na...” “Raza! Raza!” Mzee Ruhinda akamuita haraka. “Tafadhali sana.” “Mimi nawaambia ukweli ili mumjue Mina. Mina ni...” “Najua upo kwenye mshituko, kuwa mwangalifu sana, haswa kwenye kipindi hiki.” “Mina ndivyo alivyo hivyo. Yupo kama na jini fulani lakuvuta watu upande wake, Pius na Andy sio wakwanza.” Mara Pius akaingia kama aliyekuwa akipita hapo nje nyumbani kwao, hakuwa mbali. Bado mkewe alikuwa akiongea.

“Huyu Mina alishatembea na mtu na rafiki yake kipenzi. Akatembea na bosi wao pia. Mina ni malaya asiyeweza kujisaidia.” “Unaongea nini hapa kwa wazazi wangu Raza!? Umechanganyikiwa wewe!?” Pius akashituka sana kusikia maneno anayoongea mkewe wakati akiingia ndani.

“Nakuokoa Pius, usifikiri wewe ndio mwanaume wa kwanza kwa Mina.” “Hujui ni nini unaongea hata kidogo. Nyamaza na usimame haraka kabla HUJAJUTA, vibaya sana!” “Kwa nini nijute wakati mimi naongea tu?” “Unanijua jinsi ninavyochukia maneno ya uzushi. Na nilikuonya usifike kwa wazazi wangu na maneno ya uzushi.” “Huu sio uzushi Pius, ni ukweli kabisa kutoka kwa ndugu yake Mina, wa damu! Mina alichowafanyia wewe na Andy sio kigeni. Ni mchezo..” “SIMAMA Raza!” Pius akaamrisha.

“Pius!” “Kabla hujaniudhi zaidi, kwanza funga mdomo wako, na utoke hapa ndani kimyakimya.” Mina akamsikia Pius ambaye hajawahi kumsikia kabla. Anaunguruma kama simba. Akabaki amesimama kwenye ngazi, miguu ikitetemeka. Raza akabaki amekaa kochini akilia.

“RAZA!” Pius akaita kwa ukali mpaka Mina akakaa kwenye ngazi. Raza akasimama kwa haraka. “Mimi ni mkeo Pius na nina haki.” “Haki yako unaipoteza kwa kuja hapa na kumwaga sumu. Hujui chochote kinachoendelea, unazunguka kutafuta habari za Mina na kuja hapa na kuanza kuongea kama mwehu!” “Nitajua vipi wakati wewe na wazazi wako mnanificha? Ulishindwa vipi kuniambia ukweli?” “Jana uliponitumia ile video na kunipigia simu, nilikwambia nini?” Raza kimya.

“Nakuuliza wewe? Nilikwambia nini?” “Sasa kwa nini mpaka leo hujanitafuta na jana hukulala nyumbani!?” “Wewe mara ya mwisho kuzungumza na mimi nilikwambia nini? Mbona unakataa kujibu?” Kimya. “Sikukwambia nipo Dodoma, nipo kwenye wakati mgumu sana, ila nikirudi nyumbani tutazungumza? Sikukwambia hivyo wewe?” “Kwa hiyo ni sawa mimi kujua mambo mtandaoni?”

 “Na kama wewe na wazazi wako mnanilaumu mimi kuzaa watoto wa kike, nawashauri mjifikirie kwa upya. Kosa ni lako. Na kama unafikiri mtoto aliyembemba Mina ni wako, unajidanganya. Unaambiwa Mina hana uwezo wa kukaa na mwanaume mmoja. Kama alikudanganya kipindi mumewe amemtelekeza, ukadhani upo naye wewe tu, basi ujue mlikuwa wanaume wengi tu.” Mina alisikia sauti kubwa kama mtu amechapwa kofi. Alishituka mpaka akajishika tumbo.

Raza alilia kama amepasuliwa. “Toka Raza.” “Unanifukuza mimi mkeo, unamuacha malaya huyo ndani!” “Nitakuumiza Raza, toka.” “Na nyinyi wazazi mpo hapa mnaacha nadhalilika mimi sababu ya malaya huyo! Mnadhani atawaletea mtoto wa kiume mwingine! Kama amewaambia ana mimba ya mtoto wa kiume ili mumpende, basi mjue Mina ni tapeli. Na kwa kuwa mmekubali nifukuzwe hapa, basi mjue na watoto wangu hawatakaa wakakanyaga hapa.” “Ona unavyo jidhalilisha! Nani amekwambia watoto wangu huwa wanakuja hapa kwa sababu wewe unafika hapa?” Pius akaenda kumvuta na kumtoa nje, Raza akilia. Pakatulia kimya. Wakasikia magari nje yanaondoka. Mzee Ruhinda na mkewe wakabakia hapo kama wamepigwa ganzi.

~~~~~~~~~~~~~~

Kila Mahali Moto & Sintofahamu Ya Hali Ya Juu.

Baba Wa Watoto Wote Wamekuja Juu Wanamtaka Mina Aliyebeba Suluhu Ya Watoto Wao.

Ndio Raza Na Andy Wanakumbuka Shuka, Kushakuchwa.

Maji Yashamwagika.

Ayvin YUPO Mzima Wa Afya Njema, Tumboni Kwa Mama Yake Na ANAKUJA. Ready Or Not, Ayvin Muda Wake Utakapowadia Atakuja Tu Kwenye Ulimwengu Huohuo Wa Wazazi Wake Na Wanao Wazunguka.

Kuna Garama Ya Kulipa Ambayo Pesa Na Elimu Yao Vinashindwa Kuwasaidia.

Nini Kitaendelea?