Chezo alimuacha Pius haamini. Alijuta hata kwa nini alimtafuta. Akabaki amevurugikiwa hajui hata awaze kipi! Ujumbe wa Raza nao ukaingia na kumtoa kwenye mawazo ya Chezo. ‘Kama majukumu yamekubana, usiwe nawasiwasi, naweza tu agiza matunda, nitakula vizuri nyumbani, nikitoka.’ “Mimi ndio nionekane sijali!” A kajiwazisha Pius na kurudisha ujumbe. ‘Nakuja sasahivi.’ Ndipo akatoka. Nakumfuata tena mpaka ofisini kwake na kumchukua.

Raza alimuona wazi amebadilika tokea anaingia ofisini kwake. Kikamnyima raha. Akahisi anaanza kulemewa kutoka naye kwa chakula cha mchana kila siku. “Si unajua mimi nitakuwa sawa tu hata ukishindwa kuja kula na mimi mchana? Usilazimishe kuja kama umebanwa na majukumu kazini. Huna sababu ya kufanya hivyo.” Ikabidi amwambie kabla hajaondoa gari. Kimya. Huku akijiambia mbona Chezo yeye alikuwa akikutana na mkewe kila siku mchana! “Wasinichezee akili. Hata mimi naweza.” Akajiambia lakini ukweli wawili hawa si sawa. Pius anamajukumu mazito sana ya kiofisi. Hapo amevurugwa tu, hawezi kufikiria sawasawa.

“Mimi naweza kurudi tu ofisini nikaagiza waniletee matunda ofisini.” Raza akaweka msisitizo. “Nataka twende ukanionyeshe hiyo nyumba mnayojenga, maana jioni ya leo tunamiahadi na huyo contractor.” Raza akatulia baada ya kusikia, ‘mnayojenga’, halafu na sura ambayo kama imejaa hasira! Akatulia na kumpa maelekezo ya awali. Akatoa gari, Raza kimya ametulia kitini.

“Najiuliza, hivi ikitokea nafukuzwa kazi sasahivi. Biashara zote zinakufa, bado utabaki na mimi?” Raza akashangaa sana hayo yanatoka wapi ila akajikaza na kumjibu. “Nilifikiri tumekubaliana kuanza upya! Na kwamba sasahivi tumebaki mimi na wewe kama ulivyosema! Kwani kuna nini tena?!” “Kwamba tunabaki wote kwa sababu tumejikuta tu pamoja, kosa la ndoa lilishatokea, inatubidi kubaki tu, au kwa sababu kuna mapenzi?” Akamuona anaanza kupandisha hasira.

“Maana unaweza kuta hata hii ndoa inageuka kuwa mzigo! Mwanaume siye uliyekuwa ukimtaka. Nikimaanisha si mwanaume wa ndoto zako. Umekwama kwenye ndoa, ishatoa matokeo ya watoto, na pengine kuna maslahi mengine yanayo kubakisha.” “Ukimaanisha nabakizwa kwako na pesa zako?!” Raza akamuuliza kwa kumshangaa sana, asijue mwenzie anajifananisha na Chezo vile alivyo, na maneno machungu aliyompa.

~~~~~~~~~~~~~~

Pius japokuwa anapesa na alikuwa kwenye ofisi nzuri wakati akikutana na Chezo lakini Chezo alimtisha. Alikuwa na umbile la kiume japo urefu hawakupishana. Amejazia hata kwenye shati alilokuwa amevaa alionyesha amejenga misuli. Safi utafikiri ni mkurugenzi aliyekuwa ameacha koti la suti kwenye gari na kwenda kukutana na Pius. Halafu akajibeba vizuri kwelikweli! Bila paniki wala hofu na kuweza kumuachia maneno yaliyobaki yakimsumbua Pius.

Mwizi akamtisha mwenye mali mwenyewe, Pius akajiona kipanzi. Kwamba Raza kurudi kwake ni kama anamuhurumia tu. Akamuona Chezo ni bora kuliko yeye! Japokuwa mwishoni alitumia ubabe lakini wazi kwa hoja alimshinda.

~~~~~~~~~~~~~~

“Ni nini tena, Pius?! Mbona mwanzo uliosema ni kama tena unaanza na manyanyaso?” Kidogo akashituka na kujua amepitiliza. “Si kwamba nakunyanyasa, ni kutaka kujua kwa ajili yako wewe mwenyewe. Sitaki uje uache maisha yako huko, unakuja kujipunja kwangu.” “Maisha niliyoishi hayakuwa sahihi mbele za Mungu, Pius! Nimebadilika kwa kupenda kwangu nikitaka kuishi maisha matakatifu nikimtegemea Mungu. Ya kale yamepita, Mungu ameniahidia mapya. Tafadhali naomba na wewe unisaidie sio kunirudisha kwenye maisha ya nyuma.”

“Chochote nilichokuwa nikifanya zamani, nimekusudia kubadilika! Nimeacha ushirikina na mengine yote.” Asijue wala tatizo sio uchawi ni Chezo aliyekwenda kumtafuta yeye mwenyewe.

“Sasahivi nina amani na utulivu nafsi kwangu.” “Huna majuto?” Raza akashangaa sana. “Najutia nini!?” Pius akababaika haswa ila akionekana ameshapoa kama aliyejishitukia kwamba amempandishia hasira mtu ambaye hata hakuwa na wazo!

“Sitaki uishi na mimi kwa kunivumilia tu.” “Kuna tatizo gani nikikuvumilia wewe mume wangu!?” Akamuuliza vizuri tu na kumfunga mdomo. “Maana ni kama ulisema sasahivi tumebaki mimi na wewe! Sasa kama tumebaki wawili, si ndio tunabebana katika kila hali!”

“Na tafadhali swala la nyumba yangu lisikunyime raha Pius. Nimejitahidi kwa juhudi zangu nimefika hapo nilipofika.” “Sema juhudi zenu!” Raza akatulia. Pakatulia kwa muda akiendelea kuendesha. Kimya.

“Hapa niende wapi?” “Naomba nirudishe tu kazini, Pius. Hili jambo nafikiri litatukosanisha.” “Kwa hiyo hutaki niingilie kumbukumbu yenu? Unaona kama mimi nitakuwa mvurugaji tu?” Raza hakujibu kwenye hilo, akamuelekeza mpaka wakafika.

~~~~~~~~~~~~~~

Wakashuka garini, akaanza kuzunguka akishika kila mahali. Kimyakimya Raza akifuata nyuma. Akazunguka mpaka akamaliza. Wakarudi garini.

~~~~~~~~~~~~~~

“Kwanza nakupongeza. Umejitahidi sana.” Raza kimya. Akamuita. “Raza, nimekupongeza!” “Asante.” “Lakini nimeshika ukuta, wazi unaonekana mchanga ni mwingi kuliko cement.” Akaanza kukosoa. Raza kimya huku wakirudi ofisini, maana muda ulishaisha hawakuweza kupita kula.

Akalalamikia ujenzi wa hiyo nyumba kuanzia msingi mpaka ilipofikia, utafikiri anayo shahada ya fundi nyumba! Raza kimya ila akihisi tatizo ni Chezo tu kuhusika kwenye hiyo nyumba. Kimya hakumjibu mpaka anamshusha ofisini. Ule moto wa kuanza upya ukawa umeshamwagikiwa na tui la nazi jikoni, na kuzimisha. Wakapoa tena kama waliopoteza dira.

~~~~~~~~~~~~~~

Alirudi nyumbani usiku akamkuta Raza jikoni akimalizia kusafisha. Kwa asili Raza alikuwa msafi sana. Huacha jiko safi ndio anakwenda kulala. “Nimemchelewa Polla?” “Muda si mrefu. Pole na kazi.” “Na wewe. Vipi hapa?” Akauliza huku akitafutia samaki nafasi kwenye friji.

“Ni nini hicho?” “Samaki, alileta Chezo ofisini kwangu.” Alishituka Raza karibu aangushe sahani, ila akaidaka ikimponyoka mara kadhaa mikononi mwake. Tumbo likaanza kuvuruga. Pius akajua kabisa ameshituka, akatoka hapo kwenda mezani alijua chakula kinamsubiria. “Nashukuru kwa chakula.” Akamsikia akishukuru huko mezani. Lakini alishindwa hata kujibu! Akaweka sawa hapo jikoni, akapitiliza juu chumbani kwenda kuoga.

Akiwa bafuni ndio kama akili ikaanza kumjia kuwa mumewe amekutana na Chezo, ndio maana alitibuka mchana. Wasiwasi walichozungumza ukamuingia, ila hana wakumuuliza. Chezo asingethubutu, na mumewe hivyohivyo.

Nyumba ile ikaanza kuwa tatizo. Akajua itabaki kuwa tatizo kwa sababu imebeba kumbukumbu za Chezo. Akabaki akiwaza hajui chakufanya. Ni jasho lake na kweli alitaka angalau awe na kitu chake kinachotokana na jasho lake. Lakini napo akakumbuka jinsi mumewe alivyokuwa akiikosoa! Ikakosa raha kabisa.

~~~~~~~~~~~~~~

Wakati akijipaka mafuta Pius naye akaingia kuoga. Raza hakumsemesha hapo kwenye chumba cha bafu. Akavaa na kutoka akajiwahi kitandani. Pius naye hakukawia kama aliyekuwa akimuwahi. Alipojiweka tu kitandani, Raza akamgeukia.

“Naona tu niuze kile kiwanja na ile nyumba ilipofikia, nikaanze kujenga upya kwingine. Hata hivyo kama ulivyosema, mchanga ni mwingi kuliko simenti.” “Nilikuwa na contactor huko jioni hii ndio maana nimechelewa. Hata yeye ameona jinsi ilivyojengwa vibaya. Hata msingi wenyewe unaonekana haupo imara.” Akaanza kukosoa tena. Raza kimya akisubiri hitimisho.

“Kwahiyo kesho wanaanza kuibomoa.” Raza akashituka akahisi roho inataka kutoka. Akakaa kwa mshituko bila kutarajia. “Yote!?” Akauliza kwa mshangao wa wazi kabisa. “Mpaka msingi. Kwanza pale ilipo tumeona sio sehemu nzuri. Ataisogeza kabisa wajenge sehemu nzuri ili kuwepo na bustani nzuri na ya kueleweka. Nafikiria mpaka kupata uwanja mzuri kuja kuweka bwawa. Hata yeye ameona ni wazo zuri, ipo karibu na bahari, uchimbaji wa pool hautakuwa shida. Tutapata maji kwa rahisi.” Raza kimya mapigo ya moyo yakiendelea kwenda sivyo.

“Wanaanza kazi mara moja, wameniahidi ndani ya miezi 6 itakuwa tayari hata kuhamia. Au kuna kumbukumbu unatunza pale?” “Ni jasho langu ndio maana nimeshituka Pius! Lakini nashukuru kwa kunihangaikia.” Akarudi kujilaza akiwa amenyongea moyoni. Hakutaka hata kuzungumza jingine akaona alale tu.

“Hela nzima ya ujenzi nitaihamishia kwenye akaunti yako, tutakuwa tukimlipa kwa awamu. Nitakuonyesha mkataba wake na hiyo ramani mpya. Na hii sio ya kwenda kusimamia kila siku. Ndio uzuri wa contractor.” Hapo kidogo akatulia. Kuna leo na kesho. Akianguka na kufa Pius gafla na nyumba kambomolea! Hapo kidogo akaona bora pesa itakuwepo, tena kwenye akaunti yake. Mapigo ya moyo yakaanza kutulia. “Nashukuru. Asante.” Akajua wazi amepoa.

~~~~~~~~~~~~~~

“Nimezungumza na Andy, ijumaa hii tukitoka kazini, tunaelekea Dodoma, nyumbani kwao. Tulimalize hili kabla hawajarudi hapa Dar. Au unampango mwingine?” “Hamna. Nashukuru kunisindikiza.” “Pia itatupa mapumziko mengine. Nilipata wakati mzuri na wewe tulipokuwa Mauritius. Natamani tuwe tunajitengenezea mazingira kama yale mara kwa mara. Ikawa sasa kama anayempuliza baada ya kumng’ata.

Raza akatulia akiwa na mengi yanayoendelea kichwani mwake akijaribu kurudisha mudi. Kubomolewa nyumba aliyohangaikia kwa kiasi kile! Bado alikuwa akijaribu kuingiza akilini, huku akijilaumu kumwambia kama na Chezo alikuwa akisimamia.

“Au unataka  twende na kugeuza?” “Ningependa wakati mwingine mzuri. Tunakwenda na watoto?” “Inabidi na wao wakamuone kaka yao. Si ni sawa?” “Hamna shida. Nashukuru.”

Wakapanga tena mipango wa hiyo safari ya Dodoma. Siku ya kwanza ilikuwa ni ya kwenda kuomba msamaha kwanza, wawaache watoto hotelini. Ndipo siku ya jumamosi waende na watoto wao hapo kwa kina Andy. Hilo likakaa sawa.

Lakini kulikuwa na uzito usiku huo, hakuna hata aliyekuwa na hamu ya mapenzi. Walilala kila mtu akiwaza lake. Kale kahali kafungate, upepo ukakapitia, wakarudi kulala kama wanandoa wa kongwe, kavukavu bila hata kugusana.

~~~~~~~~~~~~~~

Asubuhi ndipo akasikia chuchu zinashikwa taratibu. Akiwa usingizini hakujua kama ni mumewe, akageuka upande wa pili akidhania ni ndoto. “Usinichukie Raza, na kunikataa. Nia yangu ni kujenga chetu, tena kizuri chenye hadhi.” Ndio Raza kutoka usingizini sasa baada ya hayo malalamiko. “Pole, nilikuwa nimelala nikadhania ni ndoto.” Akageuka vizuri.

“Na sijakuchukia.” “Unauhakika?” “Sema nikushituka tu. Ile nyumba nimehangaikia Pius! Nishaiona ikiwa imeshaisha kabisa. Kusikia inabomolewa si kitu kidogo!”

“Sasa tutakuaje na kitu chetu, au mwanzo wetu na Chezo katikati yetu?” Hapo la moyoni likawa bayana. “Umeichukulia vibaya tu. Chezo alifanya kama mfanyakazi tu. Kusimamia. Hajaweka pale hata shilingi yake!” “Kuna kujenga kwa kujitolea kwa hali na mali. Yeye amejitoa kwa hali, wewe mali. Sasa mimi hapo nipo wapi?”

“Na ndio maana wewe unajeuri hata na hii nyumba Raza. Umenikuta nikijenga. Tulikuwa tukija wote hapa kipindi ikijengwa. Maua yote kwenye hii nyumba na ukoka ni wewe ndiye uliyekuwa ukileta hapa hata kabla ya ndoa yetu. Unahaki na jeuri ya kusema hapa ni kwako pia hata kama hukuwekeza pesa ya ujenzi wa hii nyumba kama jengo, lakini unamchango wako hapa. Lakini Kule itabakia ni wewe na Chezo daima! Ila kama itakuumiza, basi, nipo tayari niache nisikuingilie.” Asubuhi hiyo alionekana mnyenyekevu kama si yeye!

Lakini Raza alijua wazi, akitaka amani humo ndani na mengine yaendelee vizuri, hiyo nyumba kubomolewa ndio itakuwa garama ya kulipa. Akamua anyamaze.

~~~~~~~~~~~~~~

Muda wake ulikuwa umeshaisha, alamu iliita ikabidi kukurupuka na kwenda kusamdia Polla, awahi shule na kuandaa kifungua kinywa cha mumewe. Pius akaachwa bilabila hapo kitandani. Huyo Raza akawa hagawanyiki na hesabu ikakaa sawa. Kazini anahitajika kwa asilimia zote, nyumbani mambo yote yanamtizama yeye, na kitandani! Hapo ikabidi Pius awe mpole. Akajituliza kwa kujipoteza mawazo kwenye hili na lile akisubiria na yeye alamu yake, atoke kitandani, siku ianze.

Kila ‘Samahani’, Hubeba Gharama.

Kuomba msamaha si maneno matupu. Ni sadaka ya moyo inayotolewa kwa unyenyekevu. Ni safari ya kuvuka daraja la kiburi, ukiachilia mizigo ya hasira ili kubeba uzito wa ukweli. Walifika Dodoma jioni mapema tu kabla giza halijafukuza mwanga, maana waliwahi kutoka ofisini. Wakaelekea hotelini kuacha watoto wao ndipo wakaenda kwa Andy.

Wakakuta wameandaliwa vilivyo. “Sisi tulijua mnakuja na watoto kama Pius alivyosema! Mpaka pakulala tumewaandalia nyinyi na watoto.” “Tumekuja nao ila tumewaacha hotelini. Tuliona tuje sisi kwanza, tuzungumze.” “Karibuni.” Wakaingia ndani maana Andy ndiye aliyekwenda kuwafungulia mlango baada ya kusikia geti linafunguliwa akiwa amembeba Ayvin. Walituma dereva wao kwenda kuwapokea.

“Nipe huyo nimsalimie.” Ayvin akamkataa kabisa baba yake akabaki amejificha begani kwa Andy akimng’ang’ania. “Hapo ndio ujanja wote humuisha. Ila kwa kuwa hajiwezi kwa utundu, mkikaa kidogo ataanza kuwachungulia mwishoe atashuka tu hapa yeye mwenyewe aanze kuzunguka. Mpeni muda. Karibuni ndani.” Wakaelekea mpaka sebuleni alipokuwa amekaa Mina na Ayan.

Mina alikuwa ametulia kimya walipoingia, akasimama na kuwapa mkono akiwakaribisha. “Meza imejaa vyakula tukijua mnakuja na watoto!” “Tumekuja nao ila tumewaacha hotelini, ili sisi kwanza tuzungumze.” Andy akakaa na Ayvin begani ametulia kama sio yeye.

“Mbona huyo kwenye video anaonekana mtundu sana?” Pius akauliza akionyesha wazi anatamani kumshika mwanae. “Ujanja wake unaisha akishasikia hodi. Anatulia kama si yeye mpaka mgeni aondoke. Eti Ayvin?” Andy akamchungulia pale alipojificha. Akazidi kumng’ang’ania. Mina kimya kama Raza.

“Basi wewe Ayan njoo uchukue zawadi yako. Dady amesema unapenda vitabu, si ndio?” Akakubali akitingisha kichwa. “Basi Poliny amekutafutia vitabu vizuri sana, utapenda. Njoo.” Akawa anasita huku akimtizama mama yake kwa hofu. “Huyo, hapo hawezi sogea. Anamuogopa sana Raza.” Mina akaongea maana walishangaa Ayan ameshindwa kabisa kusogea japo alionekana amependa zawadi.

“Raza alikuwa akimpiga sana Ayan ndio maana anamuogopa.” Mina akaongea kwa jazba. “Sio sana!” “Unabisha nini wakati hata Polla aliniambia na kumwambia babu yake kuwa ulikuwa ukimchapa na kumnyima maziwa? Labda useme kama Polla ni muongo ila na Mamu naye pia alishasema unamchukia mwanangu na unampiga SANA japo mtoto mwenyewe ni mkimya.” Mina akaongeza kwa hasira.

“Ndio maana nimekuja kuomba msamaha.” “Wakutaka kumuua, sawa. Lakini jua ashajua humpendi, anakuogopa.” Kidogo pakatibuka kama maziwa yaliyokuwa yakichemka taratibu gafla kumwagika na kutibua jivu. “Itachukua zaidi ya vitabu kuwaamini nyinyi wote wawili maana wakati mwingine na wewe Pius ulikuwepo wakati mkeo akimpiga mwanangu.” “Hajawahi mpiga mbele yangu.” “Basi jua Ayan anajua kama na wewe ulikuwa ukijua kama mkeo alikuwa akimtesa na hukumtetea. Ndio maana kama umegundua alikuwa akikupenda sana zamani. Akaja kukubadilikia. Siku hizi akikuona mahali anakukwepa kwa hofu, hakukimbilii kama zamani alipodhania ulikuwa kimbilio lake.” Mina akawa ameshapandisha.

“Ayan nenda kasome vitabu vyako ndani.” Baba yake akamtoa hapo. Hakuchukua hata sekunde, mtoto akakimbilia ndani kama mshale. Gafla pakapoa hapo, wakawa kama wamepoteza dira. Kimya. Andy akajisogeza nyuma na mtoto begani, akajiegemeza kwenye kochi, akatulia. Kimya kwa muda.

Ukifunika Kosa Leo, Kesho Litakuja Kama Dhoruba Kali

Ni kweli siri ya makosa ni kama tu. Mwishoe hutoka hata ukiziba kila ufa. Muda mfupi uliopita, kabla na hata walipokaribishwa ndani ni kama kulionekana maisha yaliweza kuendelea. Lakini kumbe ndani bado kulikuwa na madonda mabichi yaliyokuwa yamefunikwa na ngozi kavu kama kovu.

Pakatibuka kwa machungu ya dhambi ya nyuma ambayo ilionekana ndogo na kushindwa kutubiwa. Walikuja na la uuwaji, kumbe kuna mengine alifanyiwa mnyonge Ayan sirini, Mungu akaona na hilo liwekwe mwangani.

 Pius alikusudia watoke hapo wakiwa wameyamaliza. Akaangalia ile hali, akaona yeye ndio aanze maana ni kama Raza alinyong’onyea, akashindwa jinsi ya kuendelea kuanzia hapo.

“Kuna makosa mengi yametokea, naomba nianze na kubwa na la kwanza, swala la mtoto. Ukiangalia kwa makini na kufikiria tokea mwanzo, mimi ndiye niliyekosea tokea mwanzo.” Akaanza Pius. “Mimi ndiye niliyekosea kuanzia kutungwa mimba yake mpaka anarudishwa baada ya kuzaliwa. Kosa moja ni lakuficha ukweli wa mambo, ilimgarimu Mina na Andy.” “Umeruka Pius. Tafadhali kama umekusudia kuomba msamaha, omba ueleweke.” Akaingilia Andy.

“Ushikwaji wa mimba ulitokea wapi?” Akamuuliza na yeye kaka yake kwa ukali. “Ni kweli.” Pius akakubali kwa kujishusha. “Tokea mwanzo kumpa Mina pombe.” “Na kuingia kwenye chumba changu na kulala kwenye kitanda changu cha ndoa, tena takatifu! Uliwezaje Pius?!” Hapo na Raza naye akamgeukia mumewe vizuri. Makosa yasiyoelezwa hukua kama kivuli kinachokuandama hata jua likiwaka. Pius alishindwa kuepuka huo ukweli.

“Nimekosa Andy na naomba tu niwe muwazi. Tulijenga ukaribu na Mina nafikiri hapo ndipo nilipopitiliza. Nimekosa Andy, naomba msamaha.” Ungemuona Pius huyu mpaka akawashangaza na wao.

“Na katika hili hata Raza narudia kukuomba msamaha. Nimekosa mke wangu, naomba na wewe unisamehe. Kuanzia kabla na baada ya mimba, jamani, sikufanya vizuri. Ningefanya vizuri hata baada ya kujulikana kama mtoto ni wangu, nina uhakika wote nyinyi, mpaka wazazi, Raza zaidi, asingefika alipofika.”

“Mimi ndiye niliyemtia hofu Raza. Nikampuuza mpaka akatishika na kufanya aliyoyafanya.” “Sema kutaka kuua watoto wangu. Kama kweli mmekuja kuomba msamaha, ombeni mueleweke msiweke kificho na hapo ndipo kupona kwa kila mtu. Msiweke lugha ya mafumbo wakati kila mtu anajua Raza alikusudia KUUA wanangu lakini akakutana na Mungu aliye HAI. Na kama isingekuwa nguvu za Mungu, inamaana pengine sasahivi nisingekuwa na mtoto hata mmoja!” Bwana wenye nyumba hao walikuwa wakali!

Raza akapiga magoti kwa haraka. “Nimekosa Mina. Nimekosa sana. Niliingiliwa na roho chafu na nakiri niliiruhusu mimi mwenyewe sababu ya wivu tokea mwanzo. Mtoto wa kiume nimemtafuta jamani, karibu kuchanganyikiwa. Na hapo ndipo lilipokuwa anguko langu. Nilifungulia milango mingi na shetani akajua udhaifu wangu, akanitumia.”

“Nisamehe Mina. Nimekosa na nimetubu. Nimempa maisha yangu Yesu, sasahivi naishi kwa kuongozwa na yeye.” “Hapo sasa ndio itakuwa pona yako. Maana hivihivi utajikuta kila mwaka mnarudi hapa kuomba msamaha. Shetani hanaga mpango wa kukamatwa na kumuachia mtu. Jua atakujaribu tena na tena maana naona na Mungu naye ameamua humu ndani kuzaliwe madume matupu. Sasa utashindana na Mungu mpaka lini?”

“Nimeacha kabisa Mina. Hata mambo ya waganga nimeacha kabisa. Na japokuwa bado watu hawajanisamehe, lakini moyoni nipo kama nimetua mzigo mzito. Kwanza mimi mwenyewe nilikuwa nikiteseka! Havina raha na wala havikuwahi nisaidia. Nimekosa Mina. Nimekosa hata kumchapa Ayan.”

“Sasa hilo ndio kosa lililokuwa likiniuma sana, Raza. Kumchapa mwanangu asiye na hatia kabisa! Ulimuonea mwanangu bila sababu! Ukatumia upweke na unyonge wake kumuadhibu mwanangu. Mtoto aliyekuwa ametelekezwa na wazazi wake! Mnyonge asiyeweza kujitetea wala kukushitaki kwa mtu, ukamchagua kumtesa yeye, sababu tu, eti amezaliwa wakiume!”

“Halafu kwa utajiri wote mliojaliwa nyinyi wawili, kweli kumpa mwanangu maziwa ukawa unaona shida! Mnamnyima mwanangu chakula kilichojaa ndani kwenu mpaka kuharibika na kutupwa! Roho mbaya gani hiyo Raza wewe!? Chakula tu!?” Mina akawa ameshakuwa juu haswa. Hasira.

“Hakika hapo ndipo uliponiumiza na kunikosea Raza. Lakini huko kumuua mimi sikujali kwa kuwa nilijua HUTAWEZA, hata uende kwa shetani mwenyewe, huwawezi wanangu.” Mina akakaa sawa akiwa bado na hasira, Raza kapiga magoti mbele yake.

“Hakuna mchawi atagusa mwanangu, akafanikiwa. Ndio maana waliposema wanakufunga kwa uchawi wakutaka kuua wanangu, nikasema hapo wala sioni kosa. Ila kuchukia wanangu, ukiwaonea na kuwanyanyasa, halafu na kusambaza maneno mpaka kumchanganya mama yangu ukimuabisha! Hapo HAPANA Raza. Bora ukaloge utakavyo ila usimuuwe mama yangu kwa fedheha.”

“Wala na hilo usiwe na wasiwasi nalo. Watu wananikimbia sasahivi. Huyo Mamu ndio utafikiri ametumwa kunitesa! Ananitangaza ubaya kwa kila mtu! Mwenzio nimegeuka kichekesho kwa watu, mpaka ndugu! Ananitangaza ubaya mpaka kwa wafanyakazi wangu, kwamba mimi nawaloga ndio maana wanakaa pale muda mrefu. Eti nimewafanya kama msukule. Msichana wa kazi aliyekaa na mimi zaidi ya miaka 10, ameondoka sababu ya Mamu! Watu wananikimbia Mina! Mimi mbaya.” Raza akazidi kutokwa na machozi.

“Sasa na wewe usikubali kujisemea mabaya. Wewe si umempa Yesu maisha?” Akakubali akitingisha kichwa mumewe akamsaidia kumfuta machozi. “Wewe ni mbarikiwa sio mbaya. Yakale yote yamepita, wewe sasahivi umekua mpya.” “Kwahiyo sasa umenisamehe?” Mpaka Mina akacheka.

“Si umesema mwenyewe yakale yamepita, nimesamehewa? Basi na wewe nisamehe Mina! Tulee wote watoto.” “Na uache kuwapiga wanangu.” “Hata wakikosa?” Raza akauliza akikaa na kujifuta machozi. “Basi hawaji huko kwenu.” “Nakutania bwana! Siwachapi tena. Wakija nitakuwa nawapa maziwa na nitakuwa mama mzuri kwao. Hakika nimebadilika Mina. Nilikuwa nimebeba chuki, sijui kwa nini!”

“Si hata Poliny mwenyewe alikuwa hawezi kuishi na mimi? Unakumbuka hata kwako alikuwa akikulalamikia?” “Nakumbuka.” “Sasahivi mpaka yeye anasema eti anakuwa na hamu na mimi!” Wakacheka. “Kila siku ananitafuta mwanangu na kunijulia hali kitu ambacho hakikuwepo kwake! Mpaka ananiomba mimi ushauri na kutaka niwe namuombea!”

“Nisamehe tu Mina. Nilijichanganya tokea nilipoanza kwenda kwa waganga. Huko ndipo nilipokwenda kubeba maroho mengine ya ajabu yakawa yakinipelekesha mpaka kudhuru watu.” “Yameisha. Na kama una shida na msichana wa kazi wewe niambie. Kuna mtu anatafuta kazi. Alikuwa akitusaidia hapa kabla sijatoroka na wanangu, sasa nimerudi na huyu, amezoea wanangu na naona wenyewe tunaelewana kwa kusukumana hivyohivyo, sitaki kumbadilisha.”

“Sasa yule wa kwanza amerudi na anashida sana. Ni mdada mzuri, anamcha Mungu na ndiye aliyenisaidia kunihimiza kuzungumza na Andy kipindi kabla sijajua mumeo ndio baba mtoto.” Akamtizama Pius kwa hasira.

“Nilikosea Mina, ila ujue nilipanga nije kukwambia.” “Wewe ni mbaya Pius. Uliniacha nadhalilika, ukabaki kimya!” “Na hilo natubia. Tafadhalini naomba mnisamehe. Andy, tafadhali nisamehe. Kwa yote. Kuanzia Mina mwenyewe mpaka kuzaa naye. Si sawa. Nimekosa.” “Hilo ndilo nilitaka kukusikia.” “Nimekosa. Na nilikosea tokea mwanzo. Tafadhali naomba unisamehe.” “Naona na kosa lenyewe limekuja kuwa baraka kwangu.” Akamchungulia Ayvin pale alipojilaza begani kwake. Alishalala.

Pale Mungu Anapobadilisha Ubaya Kuwa Wema.

“Ayvin ni mtoto mzuri sana. Hata wewe Raza, ukimfungulia moyo kwa ukweli, utagundua Mungu ameleta faraja kwetu SISI WOTE. Amekuwa mpaka dawa kwa mzee Ruhinda bwana! Yaani mzee Ruhinda anafanya mambo ambayo hata mama anasema hakuwa akiyafanya kwetu! Na ili usipatwe wivu, jua ni Ayvin tu wala si watoto wa kiume maana Ayan mwenyewe hamchangamshi babu yake kama huyu.”

“Ayvin ni faraja na kicheko mpaka kwa Ayan mwenyewe. Kwa hiyo mpe nafasi bila kujali jinsia yake, kwa hakika utamfurahia. Na hata hili nilimwambia Mina. Kama tutamkuza hivihivi kwa upendo, kusiwekwe hofu kama mlivyofanya kwa Ayan. Mkimnyanyasa bila hatia, mkamuingizia hofu kijana wangu. Mkiepuka hilo kwa Ayvin. Akapewa uhuru wa kuwa vile Mungu alivyomuumba, basi mjue familia ya Ruhinda kila mmoja atamfurahia. Ni mtoto mzuri sana. Na si mchoyo hata kidogo.”

“Kwa udogo wake huyu, ukimpa kitu kizuri, akakipenda. Hata ukimuwekea mdomoni, atatoa na kumpa Ayan.” “Aisee kweli! Kumbe na wewe umemuona?” Mina akaingilia hakuwa amejua kama mumewe amegundua. “Kabisa. Mpaka mimi ananishangaza! Huna kitu ukampa yeye, kaka yake na yeye asipate. Sasa hebu niambie afundishwe hivyo kuwa dada zake woote, aambiwe nao ni ndugu zake. Halafu akafanikiwa kwenye maisha. Baada ya miaka 50 kuanzia sasa sisi tukiwa hatupo hapa, si tutakuwa tunauhakika tumeacha watoto wote kwenye uangalizi mzuri?” Mpaka Pius akashangaa na kujikuta akitokwa na machozi. Akayafuta kwa haraka sana.

“Nakushuru Andy. Aisee asante sana. Nashukuru.” Pius akajikuta akisema hivyo. “Haiba yake si yakuficha huyu. Ngoja awazoee, halafu akue kidogo muone jinsi tutakavyokuwa tukinyang’anyana. Ila tu isitokee wakumuharibu akili. Na haya mambo ya MALI hili hata Mina nimemwambia. Na wewe Raza nakuomba. Acha kufundisha vijana wangu maswala ya mali zetu. Waache wakue, wajue mali ni za baba na mama, wao watafute ZAO!” “Nashukuru Andy.” Pius akaongeza.

“Hakika tutawadumaza. Utakuja kuta tunakua na vijana wasio pambana kwenye maisha, wanasubiria mali ambazo kwanza si zao na wanaweza hata wasije kurithi mpaka wanakuwa watu wazima, wanasubiria tu! Tuangalie sisi vijana wa Ruhinda. Hakuna aliyerithishwa, lakini wote tunapambana. Na tulipofika hapa, hebu niambie mzee Ruhinda atatupa nini ambacho sisi hatuna?”

“Hata Pius ameniambia hivyohivyo! Ni uelewa mbaya shemeji yangu. Nimekoma, naomba na wewe unisamehe!” “Aisee kwa huyu nitakuwa mkali hata kwa baba yake. Naomba tusije mchanganya. Ni mtoto mzuri sana. Hajijui jinsia yake ila anajua watu wanao mzunguka na kuwapenda sana. Hakika sitaruhusu mtu amchanganye.” Hata Mina ilimgusa. Hakutegemea kwa umbali huo aliokuwa akiusema. Andy alionekana kumaanisha kutoka ndani.

“Tafadhali naomba nimshike akiwa hivyohivyo amelala!” Andy akaenda kumpa. “Nimepitwa na mengi sana.” Pius akaongea kwa kulalamika akimwangalia kijana wake. “Sio sana. Kuanzia wanarudi mpaka sasa, nimechukua kumbukumbu zake nyingi sana ili asije bisha baadaye. Ayvin ni mtundu sana aisee.” Wakacheka vile Andy alivyoongea ila kwa kuvutiwa sio kwa ubaya.

“Mpaka siku ya kwanza anaanza kutambaa kabisa. Nilikuwa naye, na nilifanikiwa kumpata vizuri sana kwenye video.” Andy akaongeza. “Tafadhali nitumie kila kitu.” Pius alikuwa akimtizama huyo mtoto kama asiyeamini, kama ameokota alumasi!

 “Aisee amekua! Halafu anamwili!” “Mlaji mzuri. Hasumbui kula labda akimuona mama yake, napo namuona kama ameanza kubadilika sio kama zamani akimuona mama yake, hataki kula kabisa anataka kunyonya tu.” “Itakua kukua.” Pius akaongeza. “Na michezo mingi. Wakati mwingine anakuwa amezidiwa michezo hata hajui kama nipo mahali. Na Andy akiwepo ndio kabisa! Akili zinakuwa kwa Andy tu. Anajua yeye ndio anampatiliza.” Mina akaongeza. Pius akamuweka kifuani vizuri akaanza kumpapasa.

~~~~~~~~~~~~~~~

Alikuwa msafi, ananukia vizuri, utajua yupo na matunzo mazuri. Kwa asili Mina alipenda kuvalisha wanae mpaka walikuwa wakimsema hana akili ya matumizi ya pesa. Anamaliza pesa kwa kununulia mtoto nguo. Watoto wake wakati wote ni wasafi haswa, kama Andy baba yao. Wakabaki wakimwangalia.

~~~~~~~~~~~~~~~

“Akiamka hatalia?” “Anaweza asilie. Tutaona. Sio mida yake ya kulala sasahivi. Msingekuwa nyinyi kuwepo, angekuwa kila mahali hapa amezagaa na jina lake likitajwa kila kona na kila mtu, akikatazwa asifanye hiki au asishike kile. Hapo ni hofu tu inamlaza. Ataamka tu.” Raza akavuta pumzi kwa nguvu na kuzishusha taratibu akimtizama huyo mtoto.

“Amebeba damu nyingi ya Mina mpaka rangi si ya kina Ruhinda!” Raza akasifia na kufanya wote wamwangalie tena pale alipokuwa amewekwa kifuani na Pius. Wakatulia kwa muda.

“Msamaha Ni Upepo Unaofuta Vumbi, Ukiacha Njia Mpya Iangaze.”

“Jamani si mmetusamehe kabisa?” “Yameisha Raza. Kuwa na amani.” “Nashukuru Mina, lakini acha tuombe. Tumshukuru Mungu kwa kutusamehe mimi na familia yangu, na kuomba mwanzo mpya wenye msingi imara wa Yesu.” Wakaona si wazo baya. Wakataka yeye mwenyewe Raza ndio aombe. Bwana Raza aliomba mpaka akawashangaza!

Alianza kwa kutubu akimtubia kila mmoja wao hapo kama wazazi. Alitubu Raza mpaka kwa machozi akimsihi Mungu awasamehe pale walipokosea na kuzembea kwenye ndoa zao na malezi ya watoto wao.

Kisha akaja kutamka baraka kwa Mina na watoto wake mpaka Mina akafungua macho kumtizama asiamini kama ni yeye Raza. Akamuombea Ayan uponyaji wa nafsi na fikra akimsihi Mungu awasaidie, kumsaidia na yeye kuwa kile Mungu alichomkusudia. Akamuombea Andy na Pius. Akaomba hekima ya Mungu juu yao wao kama wazazi awasaidie kulea hao watoto wawe baraka kwao na kwenye jamii.

Aliomba Raza! Ungemsikia ungejua ipo nguvu ya msalaba na Mungu ni mwingi wa rehema, na hana upendeleo. Mpaka wanasema ‘Amen’, kila mmoja anajisikia vizuri. Na kujiona ni wazazi wenye jukumu moja.

~~~~~~~~~~~~~~~~

“Sasa watoto si mkawalete ili tule pamoja?” Andy akatoa wazo. “Na mnaweza kuwaacha hapa walale nyinyi mkaenda kupata muda wenu huko hotelini. Polla aje afanye fujo zake hapa, aungane na Ayvin kwa siku hizi mbili. Watuchangamshe ndio muondoke nao.” Mina akaongezea kwa mumewe. Pius na mkewe wakaona si wazo baya. Japo yeye Raza ndio alifurahi zaidi kuona Polla wake na yeye hapo anakaribishwa kwa upendo na si kama kwa shangazi yake alipofungiwa milango.

Wala hakufikiria mara mbili, Raza mwenyewe akarudi hotelini kwa binti zake. Pius alikuwa hataki hata kumuachia mwanae. Alibaki amemkumbatia, amejituliza kwenye kochi hataki hata kujitingisha akihofia asije muamsha, akaondoka hapo mikononi mwake.

~~~~~~~~~~~~~~~~

Lakini baada ya muda mfupu akaamka na kufungua macho akiwa amesimamisha kichwa. Pius akamtizama kwa upendo. Mina akamfanyia ishara Andy anyamaze kabisa kisha Mina akajifunika na mto hapohapo kwenye kochi. Akabaki akimtizama Pius kisha akageuka. Alipomuona Andy amekaa kochi la mbali kidogo akaanza kukunja kamdomo akionekana anataka kulia. Kisha akanyoosha mikono akitaka Andy amchukue. Pius aliumia sana mpaka alionyesha.

~~~~~~~~~~~~~~~~

Inaendelea….

“Ningefurahi Pius.” “Najua unahitaji mapumziko. Na Poliny nimemwambia umechoka, unahitaji kupumzika. Unatutumikia pale ndani bila kuchoka na ni kila siku! Nikamwambia ni lazima  atenge muda asaidie kukupa Off nyumbani. Ndio amekubali tuongozane. Kwamba atachukua vitabu vyake, twende na mwanao unayemdekeza. Anasema wakati anacheza game zake, yeye anasoma. Akianza fujo atatupigia chumbani kwetu, uje umtulize.” Raza alicheka sana.

“Hivi nyinyi mjue Polla ni mrahisi sana kuishi naye! Tatizo lenu wewe na Poliny hamjamjulia.” “Sasa yeye huwa anasoma saa ngapi? Mtoto asiyetaka kusoma hata kitabu cha hadithi jamani! Ukimwambia, ugomvi!” “Tatizo lenu nyinyi mnamuingilia katikati ya mambo yake. Polla hataki kuingiliwa. Wewe panga muda unaotaka asome, kisha ukimkuta katikati ya game yake, mwambia ile game kwa wakati huo ikifika mwisho, au hata kama haijafika mwisho, wenzie wakimtoa, ameshindwa hiyo game, afanye jambo unalomtaka afanye. Na unamwambia ukirudi kabla hajakufuata, unamzimia game nzima hata kama ndio ameanza au yupo katikati ya hiyo game nyingine. Sasa kwa kuwa hataki kuingiliwa katikati ya game zake, akifika tu mwisho tu kwenye game uliyomkuta nayo, anakufuata yeye mwenyewe mmalizane, ili aendelee na game zake.”

“Atafanya kila kitu tena kwa haraka na makini ili usimuweke. Na huwa ananijua, hawezi nidanganya maana namuuliza maswali kuhakikisha ameelewa. Basi atazingatia kwa makini ili kufupisha ule muda wako, awahi yake.”

“Tatizo lako wewe na mwanao Poliny, mnamuingilia. Halafu mnampa mambo asiyopenda. Wewe unajua kabisa hapendi kusoma vitabu vyenu hivyo ya historia za ulimwengu, halafu eti unaanza kumwambia aache game asome historia ya vita ya kwanza ya dunia! Polla!” Pius alicheka sana.

“Inamuhusu nini yeye vita ya kwanza ya dunia au uchumi wa ulimwengu?” “Ajue ulimwengu unavyoelekea!” “Hayo mambo ya mwanao Poliny. Sasa yeye akipewa vitabu na babu yake. Vikamsisimua yeye, anakuja mlazimisha mwanangu, kwa muda wake yeye, eti asome, kitabu ni kizuri. Polla akishakitizama na kile kichwa chake cha habari nzima ya hicho kitabu, anamuuliza kwa nini yeye asome!” Pius hana mbavu.

“Naye Poliny anaanza kumuelezea umuhimu wa kile kitabu, Polla hana muda wa kumsikiliza. Anataka amuache acheze game zake. Poliny anataka lazima asikilizwe, ndio ugomvi unapoanza, na kumsimanga mwanangu hapendi kusoma. Polla naye hataki kumsikiliza anamfukuza chumbani kwake. Ndipo ugomvi unapoanza.”

“Namuuliza Poliny, dada mkubwa vile kupigana na mtoto mdogo, haoni aibu? Anasema namtetea Polla kila wakati wakati yeye anamsaidia. Polla naye anasema yeye hataki msaada wake. Basi eti mwanangu yeye mkorofi!” Pius akazidi kucheka maana ndio kama anapata picha kamili ya ugomvi wa wanae. Maana yeye humuamini sana Poliny bila kumsikiliza Polla.

“Ila Polla ni kweli mkorofi bwana! Akitaka jambo lake anataka libakie hivyohivyo!” “Sasa wewe jiulize watoto hao wawili wenye aina hiyo ya tabia, wameipata wapi? Kushikilia jambo, hawataki mabadiliko?” “Raza!” “Taratibu tu. Fikiria wanao na jinsi wewe ulivyo Pius.” “Lakini bora Poliny bwana!” “Kwa kuwa misimamo yake inaendana na matakwa yako. Ndio maana unamuona yeye kama malaika.”

“Halafu Pius, Polla huwa hafeli. Hapati 100, ila mara nyingi anapata A, akifeli sana mwanangu ni B. Maana anajua akishuka tu hapo, basi namnyima game.” “Kweli?!” “Muulize mwenyewe. Akileta ripoti mbaya, anapumzika game kwa muda mrefu tu, ndipo utakapomuona amejaa jikoni na kukufuata wewe mpaka chumbani akitaka hili na lile, na maswali kwako hayaishi. Basi jua hapo nimempumzisha game zake. Mpaka arudie ule mtihani, aufaulu tena, ndio anarudia game.” “Basi mfundishe kusoma vitabu bwana!” “Sasa hapo unamtaka Mungu maneno.” Pius alicheka sana.

“Sasa kwa hiyo tunakwenda nao wote?” “Poliny anakwenda ili kunisaidia Polla. Kulala kwa wakati na kuoga usiku tukiwa chumbani kwetu. Ila muda wa kula tutakuwa nao. Hivi nimemwambia awahi kurudi nyumbani amsaidie kufungasha vitu vyake ili tukirudi tu na sisi ni kujiandaa, tunakuja kuchukuliwa saa moja usiku, tunaondoka.”

“Sasa ili kila mtu apumzike huko, mwambie Poliny asianze kumfungashia vitabu tu. Atajaa kwenye kila chumba na ratiba za watu atamiliki yeye, maana hatakuwa na chakufanya ila kutaka kila mtu amfuatishe anachokitaka yeye.” “Hata kitabu kimoja jamani!?” “Kama mnataka kweli tukapumzike huko, mwambie amfungashie game zake na nguo za kuogelea kama tunakokwenda kutakuwa na pool. Kitabu hatasoma, na ndipo watakapoanza kupigana, tuitwe chumbani kwao.” Pius akatingisha kichwa kwa masikitiko.

“Na umsisitize Poliny anayependa kumkazania mtoto.” “Basi nitampigia nimpe hayo maagizo.”  “Nashukuru Pius. Nimefurahi SANA.” Furaha aliyokuwa nayo Raza, hakuna jinsi angeweza eleza mtu akaelewa. Kuna ambayo anajibiwa hata hakuwa akijua jinsi ya kuomba.

“Tunakwenda wapi?” “Surprise.” Akazidi kucheka kwa furaha. “Sasa nibebe nini?” “Mama wewe, surprise. Mbona hivyo! Unataka kunidodosa mpaka niseme! Lakini jua hati zenu za kusafiria zimehusika.” Akatoa tabasamu akijua wanatoka nje ya nchi, ila ndani ya Africa kwa kuwa hawajahusika kwenda kuomba Visa popote ila hati zao kwenda kugongwa tu. Na kwa kuwa ni Pius, akajua ni sehemu ya maana.

“Na ungekuwa unaweza kuomba ruhusa kazini kwako jumatatu usiende, tungeondoka leo, tukarudi jumatatu. Poliny yeye amesema hana vipindi siku ya jumatatu.” “Na wewe kazini?” “Kwangu hili jambo ni la muhimu Raza. Naweza nikachukua Off hiyo siku ya jumatatu.” “Kweli Pius?!” “Kabisa. Sikumbuki kuwa na muda na wewe mtulivu wa namna hii ninaotaka upate. Nahisi hata mwanzo wetu haukuwa mzuri.” Raza akatulia akikumbuka fungate yao.

~~~~~~~~~~~~~~

Ni kweli haikuwa hata romantic. Kwa Pius ilikuwa ni bora liende. Ikawa kama anatimiza wajibu tu. Na hawakwenda mbali. Hapohapo jijini. Kitu alichokuwa akifanya huyo Pius huko fungate ilikuwa ni kusoma vitabu na kusikiliza taarifa za habari za kila pande ya ulimwengu mpaka mwisho wa fungate.

Hata walipokuwa wapo mezani wakila wanandoa hao wapya huko fungate, basi atakuwa na kitabu chake. Anakula huku akisoma bila hata ya kuzungumza na mkewe.

Basi Raza akajikuta mpweke mbele ya mume huyo wa ndoa mpya. Atakula na kuamua kurudi chumbani. Ataangalia movie mpaka achoke na kupitiwa na usingizi hapo kitandani. Baadaye ndipo Pius atafika kitandani. Kama hataomba penzi, basi ujue asubuhi ni lazima. Atamuamsha huyo Raza kwa kumpapasa. Raza ataamka. Atajituma hapo kitandani. Akimaliza Pius, anarudi kulala. Raza anaendelea na yake, kwenye hoteli hiyo nzuri ya kifahari mpaka fungate ilipoisha.

Miaka ikaenda. Pius anakuja kukubaliana na uhalisia kuwa Irena hatarudi tena kwenye maisha yake, ameshazaa kabisa na ana watoto zaidi ya wawili, maisha ya ndoa yake yalishachukua picha kongwe. Raza akawa ameshajitengenezea marafiki wa nje. Ratiba yake ikawa nyumbani, kazini kisha baa.

Hamjui Pius romantic wala hajawahi kukutana naye. Anaye mjua yeye ni Pius wa kutumikiwa. Apewe penzi. Chakula kizuri kwa wakati. Nyumba safi kila wakati na nguo zake ziwe safi kama mpya kila akitaka kuvaa. Na Raza akayamudu yote hayo akigawa kazi kwa wasaidizi wake nyumbani, maisha yake yakaendelea bila ndoa ya kufuatana nyuma.

Pius anarudi kutaka wa kumkumbatia, mkewe hata hajui kama Pius ni kiumbe wa malove dove. Anajua ni mtu wa kuingia, piga bao, toka. Na yeye kazi yake ikawa ni kuomba pesa kisha kwenda kufanya yake na wengine.

Na yeye Pius akaanza upweke mpaka alipompata Mina mpenda mikono, na yupo wakati wote. Basi ndio akawa anatulia nyumbani kwa mdogo wake.

Raza akirudi nyumbani anajua Pius hatakuwepo, akifanya yake ya umama, anasambaa baa, kwa wenzie. Pius naye alishajua mkewe hayupo nyumbani, basi akawa akiwekeza muda wake zaidi kwenye biashara zake, wazazi, na ndio mpaka akaishia kwa mke wa mdogo wake.

Wawili hao walikuwa wakikutana, Raza analojua ni kukata mauno. Mumewe anapiga bao. Kazi kwisha. Lakini kila mtu alikuwa akienda kuliwazwa kwengine na watu wengine. Maisha yakaendelea mpaka hayo majanga yakawapata. Wamejikuta wamerudi kuwa wao wawili. Ndoa kongwe takatifu na binti wawili.

~~~~~~~~~~~~~~

Raza alikuwa amepotelea kwenye mawazo yaliyomrudisha mbali ila wazi yalionekana ni mawazo yaliyoweza kumtoa furaha yote na kumpa huzuni. Alibadilika mpaka usoni akanyongea. Ikawa kama aliyekumbushwa fedheha. Akapoa kabisa mpaka Pius alipomshitua kwa swali. “Unafikiri wewe na mwanao mnaweza chukua off hiyo siku ya jumatatu?” Raza akagutuka na kujaribu kurudisha mawazo pale.

“Jumatatu wanaweza kukupa off ofisini kwako?” Ikabidi mumewe arudie swali na kuongeza. “Mbona umepotea tena?” “Sijategemea kama unaweza kuja taka muda na mimi, Pius!” “Naamini sijachelewa. Eti Raza? Si tumekubaliana safari hii tunaanza upya na vizuri?” “Nitashukuru. Na kuhusu ofisini hakuna tatizo.” Raza hakuwa na neno, alipokea vile Mungu alivyombariki bila kinyongo.

Katika Majivu ya Machungu, Upendo Wazaliwa Upya

Dereva alikuja kuwachukua mapema bila ya kuchelewa. Safari ya uwanja wa ndege ikaanza Raza na wanae hawajui wanakoelekea. Polla akawa anaimba njia nzima, dada yake anamkosoa. Wakaanza kubishana. “Umeanza Poliny!” “Sasa huyo mwanao asirekebishwe!?” Baba mtu naye akadakia. Polla akaanza kulia.

“Kwani nyinyi kila kitu ni lazima mumkosoe?” “Hata kama maneno anakosea mama jamani!?” “Kwa hiyo hivyo anavyolia ndio unaona raha?” “Mimi nilikuwa nikimsaidia.” “Niache mwenyewe, sitaki kusaidiwa na wewe.”

“Nyamaza mwaya Polla mtoto mzuri. Imba vile unavyotaka. Kwanza sauti yako nzuri.” Acha Pius na Poliny waangue kicheko, mbavu hawana. Polla akazidi kulia.

“Hivi kwa nini mnafanya hivyo!?” Dereva kimya, familia hiyo wakizozana. Raza akaanza kumbembeleza mwanae, Pius na yeye anacheka kimyakimya.

“Na kwenye ndege sikai na wewe, nakaa na mama!” Hapo Pius akashituka. “Mimi ndio nakaa na mama yako.” “Mimi nimeshawahi.” “Sasa unawahi vipi kwenye mipango yangu wewe Polla!? Nishapanga kila mtu anakaa wapi!” “Lakini hakuna aliyekusikia ukiwahi. Mimi nishawahi na kila mtu amenisikia. Usifanye uonezi kama Poliny.” Akaanza kubishana sasa Polla na baba yake, wote wanataka kukaa na Raza, yeye kimya.

Mwishoe Poliny akamtetea baba yake. “Kwanza hii safari ni ya dad, wewe umekaribishwa tu. Huwezi jichagulia.” Wawili hao wakaanza kumchangia Polla mpaka akaanza kulia tena. Baba yake muonezi kama Poliny.

Wakafika uwanja wa ndege wanabishana kwelikweli, Polla hataki kushindwa. Na anawamudu wote wawili kwa hoja. Anang’ang’ania yeye amewahi. Mwishoe akasema warushe moja ya kitufe chake. Kina pande mbili. Yeye akachagua upande wake. Baba yake akampa upande mwingine. Poliny akamuonya baba yake. “Usikubali dad. Huna game utamshinda Polla. Hapo anakutega tu, atakushinda.”

Wakabishana tena hapo nje ya uwanja wa ndege kila mmoja na mzigo wake mpaka Raza akamwambia Polla arushe. Ilipotua chini, Polla akashinda. Bwana alifurahi! Alishangilia hapo kila mtu akawageukia wao. “Raza, zungumza na mwanao. Mimi nishaweka mipango yangu.” “Kama sikai na mama, mimi siendi. Mwambie dereva arudi kunichukua, nitakaa mwenyewe nyumbani. Kwanza najua kupika kuliko Poliny, sina haja naye.” Polla akaweka ngumu hapo wanapita security point bado wanabishana.

Uzuri wote walikuwa wakikaa first class viti vinavyofuatana. Polla akaishia kukaa na mama yake mbele yao, Poliny na baba yake wamepoa. Vicheko vyote vimeisha. “Nilikwambia game yoyote anayokwambia mshindane Polla, usikubali.” “Halafu ananiita mimi muonezi wakati yeye anafanya maufilishi!” Raza hana mbavu amekaa na mwanae.

 ~~~~~~~~~~~~~~

Safari ya visiwa vya Mauritius ikaanza wote wamejawa hamasa ya kufika huko, maana ilikuwa mara yao ya kwanza. Kwa hakika waliandaliwa ipasavyo. Sekretari wa Pius aliandaa kana kwamba wawili hao wanakwenda fungate mpaka Raza akashangaa. Chumba chao kilitayarishwa kama wanaingia honeymoon!

“Au wametupa chumba sicho?” Raza akauliza akijaribu kutafuta pakukanyaga. Maana chumba kilijaa maua  ya roses nyekundu kila mahali mpaka kitandani!

 “Honeymoon yetu ya pili. Ya kwanza haikuwa imekaa vizuri.” Raza akamwangalia kwa mshangao. “Kumbe unajua! Sasa kwa nini ulikuwa ukinifanyia vile!?” “Achana nayo.” “Hapana Pius, nataka kujua. Maana ilikuwa kama umelazimishwa au unanifanyia kusudi! Tena ni kama kikatili kabisa! Ni kwa nini?!” Akauliza kwa kuumia kabisa.

“Raza, tumefanikiwa kumlaza Polla, acha tutumie muda huu vizuri. Achana na mambo ya zamani.” “Wewe umesema tunaanza upya. Mwanzo huu unaweza kuwa bora kuliko wa mwanzoni. Sasa kwa nini tunaanza kwa kufichana? Niambie tu nijue kilichokuwa kikiendelea.” Pius akafikiria, akaona amwambie ukweli ila kwa ufupi.

~~~~~~~~~~~~~~

“Nisikilize Raza, wewe hukuwa tatizo kabisa, ila ulinikuta nikiwa na mambo mengi, na uchungu, ndio nahisi nikakumalizia wewe hasira kwa sababu ndiye uliyekuwa karibu yangu.” Akaanza Pius. Akamsimulia habari za Irena tokea mwanzo mpaka mwisho.

“Yaani wewe umekuja kwenye maisha yangu umekutana na moyo uliokuwa na maumivu na sijui chakufanya. Ila kuoa ilikuwa ni lazima na mama naye akawa ananilazimisha. Siku tunafunga ndoa ndio ilikuwa mbaya zaidi maana kwa mara ya kwanza ndio Irena alinijibu baada ya muda mrefu. Akaniambia ni kweli aliolewa na alishapata mtoto wa pili na hana mpango wa kuja kurudi tena Uingereza. Kwa kifupi ndio alikuwa akiniaga ramsi. Nilikuwa na hali mbaya, na ndio nilikuwa nikijitayarisha kuja kanisani.”

“Kumbuka matarajio niliyokuwa nayo ni angalau angemaliza muda wa kutumikia serikali yake na kuamua tukaishi Uingereza. Nilifika mahali nilikuwa tayari nirudi nikaishi naye nchini Uingereza. Kufupisha habari, ile harusi ilikuwa natamani ufupishwe, nitoke mbele ya uso wa watu, nikajifungie mahali. Ila nikawa sina jinsi, wewe upo. Ndio nikawa nazika hisia zangu kwenye vitabu. Lakini wewe hukuwa tatizo.”

“Ila ninachoshukuru, ulinijulia aisee! Ule ukimya na kuniacha, ndio kitu pekee nilikuwa nikihitaji. Ukawa umenisoma kwa haraka. Ukanijulia.” “Kwa hiyo ndio msichana unayempenda mpaka leo?” Akauliza kwa wivu.

“Sasa acha nikwambie ukweli. Akili ilikuja kukubaliana na matokeo tukiwa tumeshapotezana. Kumbuka baada ya pale ni kama sikuwa nikikaa sana nyumbani. Safari za nje ya nchi zikawa nyingi. Nakuja kutulia na kujirudi kwako, nikawa nimeshachelewa.”

“Nikakukuta na wewe ni kama unamaisha yako, na watu wako na utaratibu uliojiwekea. Haupo tena nyumbani na tukawa tushajiwekea msingi fulani hivi tunao usimamia ikawa  ngumu sasa kuanza upya wakati tushakomaa kwenye maisha fulani. Ndio ikawa tunaishi bora siku zinaenda. Halafu tukawa hata hatujaweka msingi mzuri wa ndoa. Mahusiano yetu yakawa kama tuliokubaliana kuishi kwa mtindo fulani hivi! Basi.”

“Swala la mimi kutamani nje likawa gumu kwa sababu ulikuwa mke sahihi tokea mwanzo. Yaani una VIGEZO vyote, ndio maana hata mama aliposema nikuoe wewe, nikajiambia kama si Irena, basi yeyote. Ila sasa ukawa WEWE. Unanijulia kila mahali. Halafu umesoma. Unauelewa wa mambo. Msafi. Unanijulia chakula. Nyumba ukawa umeimudu mpaka wafanyakazi wa nje unawajulia. Hilo nikajiambia swala la mwanamke, nimemaliza.”

“Hata swala la mtoto wa kiume lilipoanza, nakwambia ukweli kabisa Raza, swala la kuzaa nje hata halikuwepo. Kwanza nikajihisi usumbufu. Nikajiambia akija ongezeka mwanamke mwingine hapa katikati yetu, atatuvurugia utaratibu wetu. Wewe unanijua jinsi nisivyopenda mabadiliko.” Raza akacheka. Maana alimjua Pius. Hata kochi ndani ya nyumba yake mwenyewe anataka akalie hilohilo kila siku.

“Natakaga mambo yangu yasibadilike. Sasa nikasema naweza pata mwanamke akatupa mtoto wa kiume, lakini akaja na usumbufu na vurugu zake kwenye maisha yetu. Nikajiambia bora Raza amenipa watoto wawili, inatosha. Hakika sikuwa nakulaumu wewe hata kidogo. Na swala la kujaribu nje hata kabla wengine hawajanishauri, mimi nilishapingana nalo. Najijua mimi, siwezi kuanzana na mwanamke yeyote yule. Kwanza SITAKI.”

“Unaweza usiamini hili Raza, lakini wewe unanijulia aisee. Naweza nikawa nje ya nchi, kwenye mahoteli yao hayo wanayo yasifia, hata wanipe nini, nakumbuka nyumbani. Nahesabu siku nirudi nyumbani nikijua nitakukuta na kila kitu changu kitakuwa sawa. Kuanzia chakula changu mpaka mavazi yangu. Naweza nikawa nimefikia kwenye five star hotel, wananifulia nguo zangu, siridhiki najiambia ningekuwa nyumbani, Raza angehakikisha sitoki hivi.” Raza hakuwa akiamini kwa furaha.

“Na ndio maana tokea zamani walipokuwa wakisema unaniloga, sikujali. Kumbuka nilishajiambia kama si Irena, ni yeyote. Sasa yeyote ukawa ndio wewe, na wewe unaniwezea. Kwangu ukaonekana hujali vile nilivyo, na maisha tunayoishi. Ukawa ni kama ulikuwa umejitosheleza.”

“Sikuwa na jinsi Pius. Kumbuka nilishaondoka nyumbani, nikalaaniwa kwa laana zote kwa ajili yako. Sina wazazi, sina ndugu kwa kukimbilia ndoa ya kanisani. Leo narudi wapi! Nasema nini! Ilibidi nipambane kwa kadiri ya uwezo wangu kuonyesha kila mtu nilichokimbilia sikukosea. Lakini haikuwa rahisi Pius! Hata kidogo!”

“Lakini kwangu ulionyesha hujali, bora yako yanakuendea sawa! Na acha nikwambie ukweli Raza, ulianza kwangu kimaslahi sana. Tuwe wakweli. Mimi nikajua njia pekee ya kukufurahisha ni pesa ambazo unaomba kila wakati. Ndio maana kama utagundua linapofika swala la pesa huwa sikuzungushi hata mara moja. Kwa mara ya kwanza nimekukatalia hivi majuzi. Si kweli?” “Sasa haimaanishi eti kwamba ndio kitu pekee kilichonifanya niolewe na wewe!” “Raza!” Pius akawa kama anayemsuta.

“Basi niseme ni moja ya sababu zilizonivutia.” Akajisalimisha. “Kwa kuwa sina nia ya kurudisha mambo ya nyuma wala kukuumiza, nipo hapa kujenga na sitaki kukuingiza dhambini, acha nisikuulize hili swali.” “Swali gani?” “Acha tu Raza. Mimi nimekubali kwa upande wangu. Nimekubali yote.” “Wewe niulize tu.” “Raza, binafsi nimekubali yaishe. Tafadhali yaishe.” “Nataka kujua hilo swali.” Pius akamtizama mwishoe akaamua kumwambia kwa staha tu maana Raza mwenyewe alionekana kutaka kujua.

“Umesema pesa peke yake si kilichokuvutia kwangu. Mimi ambaye hata sikukuonyesha upendo! Usinijibu, lakini kuwa mkweli nafsini kwako na ujijibu, ni kipi kingine kilikuvuta kwangu mbali na pesa ulizogundua nilikuwa nazo tokea mwanzo?” Akamuona ametulia.

“Basi mimi nakuwa mkweli. Mimi nilikusoma, nikajua shida ni pesa, na mimi nikavutiwa na unayonifanyia, nikasema kwa upande wa mke utanifaa maana hukuonyesha kuhangaika na mambo ya moyoni. Nikajificha kwenye aina hiyo ya ndoa, sikujali. Nimekuwa mkweli. Ila wewe usinijibu.” Raza akapoa kabisa.

Akaamua kwenda kuoga. “Usinikasirikie, mimi nimekuwa mkweli.” “Mimi sijakasirika, naenda kuoga.” “Sasa aina hii ya chumba na yote humu ndani ni madhari ya fungate. Hata huko bafuni wametayarisha kwa muundo wa wawili wapendanao. Si tumekubaliana kuanza upya?” Ikabidi ajirudi kwa kuanza kutulia maana ni kweli moyoni alishaanza kusumbuka.

“Tuanze tu. Najua ni maisha mageni. Lakini naamini hatutakosea. Kwanza umri umekwenda. Tumebaki sisi wenyewe. Acha tuanze fungate nyingine.” “Sasa unataka tufanyaje?” “Tuanzie kwenye hilo jaccuz humo ndani. Wewe ushawahi fanya mapenzi kenye jaccuz?” Raza alicheka sana.

“Kwa uchekaji huo, ni hujawahi. Sasa twende nikakuonyeshe penzi la majini.” Raza hakuwa akiamini. “Kumbe mambo unayajua!?” “Nishakwambia nilikuwa nimeumizwa. Na wewe ndiye uliyekuwa karibu ukamaliziwa hasira. Nikaja kujirudi wewe haupo. Sasa tulia upend we. Na uache kujivua.” “Navuliwa?” Raza anauliza hana mbavu kwa cheko.

“Mpaka sidiria. Na hivyo unavyonijulia mpaka kitandani! Acha ulipwe fadhila. Kaa mkao wa kupokea tu.” “Sawa Pius.” Kwa hakika walikuwa na wakati mzuri sana. Waliendelea na huo mwanzo mpya wakiwa wanajuana vilivyo na msingi wa kimungu katikati yao.

Kila Undani Una Mlango Wa Kushangaza Usiotarajiwa

Yapo mambo yapo sirini kwa sababu. Mengine ni bora kuacha kuyachambua chambua. Unaweza dharau ukidhani ni jivu tupu kumbe limefunika makaa yenye moto.   Walirudi nchini wawili hao ungejua wapo ukurasa mmoja. Hata Poliny aliona tofauti kwa baba yake jinsi anavyomchukulia mama yao, na yeye heshima ikaongezeka kwa mama yake.

Ila bado Chezo alikuwa akimsumbua Pius akili. Kwa hakika alitaka kumuona mwizi wa mkewe. Akajikuta anampenda Raza, hataki kuja kumchangia tena na mtu. ‘Huyu Chezo aliyefanikiwa kumtuliza Raza kwa muda wote huo, yukoje na ana nini cha ziada!’  Maana mkewe mzuri haswa! Halafu ni mtoto wa mjini! Kweli aje ashie na dereva asiye na hela wakati alimjua Raza nimpenda pesa kama benki! Yakawa ni maswali yanayomnyima raha Pius, hawezi tulia nafsi mwake. Kwa Raza alijidai yameisha. Sasa anarudije tena kumuulizia Chezo na wakati wameshakubaliana wanaanza upya!

~~~~~~~~~~~~~~

Akaona aanzie kwa bosi wake Chezo. Mzee R uhinda. “Vipi Chezo?” Akauliza swali kimtego baada ya salamu. “Tena naona safari hii mmewahi vizuri sana! Nimesikia safari hii mkewe ameleta  samaki wa ziwani mpema kweli! Hivi nilikuwa nimtume Chezo awasiliane na Raza, kama atahitaji ili awapelekee nyumbani.” Moyo ukapasuka paa! ‘Mzee anataka kumtuma fisi buchani tena!’ Ila akajikaza na kufikiria kwa haraka.

“Pale nyumbani kwa sasa hatuna msichana wa kazi. Mida ya jioni Polla anakuwepo nyumbani peke yake, haturuhusu mtu afike pale mpaka sisi wenyewe tuwepo. Sasa kwa kuwa leo nitawahi kutoka, mwambie aniletee hapa ofisini kwenye mida ya saa sita, ila awafunge vizuri.” “Nitatoa hayo maagizo hayo.” Angalau hilo likakaa sawa.

 “Pius!” “Bado nipo baba.” “Mbona siku hizi nyumbani umepotea na jumapili kama mbili tatu sijakuona kanisani.” “Raza amepata kanisa fulani hivi, naona huko wamempokea vizuri. Polla amepapenda na ashatengeneza marafiki hapo. Ndio na mimi pamoja na Polliny tukaona tuwe tunaongozana nao huko!” Mzee Ruhinda kwa hakika si jibu alilolitegemea hata kidogo! Pius! Mromani damu! Halafu kukawa na jumbe kwenye hilo jibu lake, akajua amekusudiwa kufikishiwa. ‘Raza kupokelewa vizuri, na Polla kutengeneza marafiki!’

“Halafu weekend hii mimi na watoto tulimpeleka Mauritius kwenda kupumzika. Amepitia kipindi kigumu sana, nikaona akapumzike huko. Ndio tumerudi. Msalimie mama, nikipata nafsi nitapita.” “Uwe na siku njema.” “Asante baba, na wewe.” Wakaagana lakini wakaachana kila mmoja na lake.

Kwa Pius akiwaza. “Kumbe ndivyo jinsi walivyokutana hawa!” Akabaki akiwaza akimsubiria mwizi wake.

“Mama Pius atachanganyikiwa akisikia haya!” Mzee Ruhinda akawa kwenye butwaa. “Pius amehama dhehebu kumfuata Raza!” Akasahau yeye Raza alihama DINI kumfuata kijana wake. Sasa safari hii kijana wake anahama DHEHEBU kumfuata Raza! Mzee Ruhinda hajui mlango wa kanisa lolote isipokuwa la RC.

Polliny ni kopi ya babu yake na baba yake. Mitazamo yao wote inaendana. Huyo Polliny ni kipenzi cha mzee Ruhinda. Ukiwakuta wakizungumza utafikiri mzee Ruhinda anazungumza na mwanauchumi au mwanasiasa wa ulimwengu anayejua sheria. Lugha imenyooka. Akili safi kama baba yake. Mzee alimpenda sana kati ya wajukuu zake wote. Sasa leo na yeye haonekaniki kanisani wala nyumbani! Pius kipenzi cha mama ameacha kupita nyumbani! Mzee akajua shilingi ishapinduka.

Mwana Kulitafuta…

Kwenye mida ya saa sita kasoro hivi sekretari wa Pius akamtaarifu anamgeni getini anamzigo wake, kama aache getini! Pius alikuwa na shauku ya kumuona mwizi wake, akataka kumchunguza bata! Akasema akaribishwe mpaka ofisini kwake.

Akajiweka sawa akimsubiria. Baada ya muda sekretari akafungua mlango na kumtaarifu kuwa mgeni amefika. Akamwambia amkaribishe ndani. Chezo aliyeingia hapo, alimuacha Pius na mshangao.

Kwanza alikuwa msafi, amevaa shati jeupe linawaka kama na yeye anapeleka nguo zake dry cleaner. Halafu mrefu aliyejazia kama mwana ndondi anayefanya juhudi za makusudi kujazia misuli!  Nywele na ndevu vimechongwa kama mwanamtindo ambaye kazi yake ni kuonyesha uzuri wakiume. Rangi ya maji ya kunde kwenda mweupe. Mzuri wa sura, wakuvutia.  Chezo alikuwa si mchezo!

Aliendana na Raza haswa. Yaani ukiwasimamisha wao wawili ungesema ni zile couple zakufunga karne. Muonekano ‘A' mpaka akamvuruga kabisa Pius. Maana yeye alijua ni Chezo dereva, choka mbaya. Anakuja kukutana na Chezo aliyemfanya mpaka ajiulize ni kipi Raza kinambakisha kwake!

“Habari?” Chezo akasalimia kiuungwana akiwa na mzigo mkononi. Akamuita sekretari wake akamwambia ampokee mzigo na kuuweka kwenye friji. Hapo hata hakuwa amejibu salamu ya Chezo wala kumkaribisha kiti, alibaki amesimama vilevile kama alivyoingia.

Sekretari alipotoka akamwambia akae na wala si kwa kumkaribisha bali kama amri. “Kaa.” Chezo akaangalia jinsi kulivyopangiliwa pale. Pasafi, kila kiti kimekaa kwa mpangilio. Halafu na kuna makochi pembeni yamekaa kama sebule ya mtu! Yamezunguka meza nzuri sana katikati.

Akaangaza macho akaangalia kile chumba jinsi kilivyo kikubwa! Akababaika kidogo ila akavuta kiti ambacho kipo mbele ya Pius kwa pembeni kidogo. Akakaa na kubaki akimtizama Pius kwa utulivu wala hakuonyesha hofu kitu kilichomkera Pius na kumpandisha hasira.

“Kwahiyo mkeo akikutuma uuze samaki ndio unaiba na wake za watu?” Chezo akatoa tabasamu tu, hakumjibu kama aliyemdharau. “Nakuuliza wewe? Unatumia biashara ya mkeo ya samaki na kuiba au kulaghai wake za watu?” “Sijawahi iba.” Chezo akamjibu  kwa utulivu tu na kusimama. “Uwe na siku njema.” “Sijakuruhusu uondoke.” “Binafsi naona tumemaliza.” “Ukiondoka kabla sijakuruhusu, jua umejiingiza matatizoni mwenyewe.” Chezo akabaki amesimama kama ambaye anajishauri aondoke au la.

Pius naye akabaki akimtizama kwa jeuri, ila wivu tu. “Kama hakuna jingine tafadhali naomba mimi niondoke niendelee na majukumu yangu mengine.” “Ambayo yanahusiana na kuvunja ndoa za watu?” “Huwezi vunja kitu ambacho hakikuwahi kujengwa.” Pius hakutegemea. Kabla taarifa hazijafika kichwani, Chezo akaongeza.

“Hukuwahi mpenda Raza, Pius. Nashangaa ni kwa nini sasahivi ndio unaanzisha fujo zisizo na sababu!” Hapo akamtibua Pius. “Unasemaje wewe?” “Mimi sitaki matatizo na wewe. Tafadhali naomba niondoke.” “Kitendo cha kuwa na mahusiano na mke wangu, ni kwamba tayari ulitafuta matatizo.” “Hayo umegundua lini Pius? Huyu Raza si alikuwepo miaka yote ukimdharau na kumpuuza tu!”

“Hivi unajua alipokuwa akiugua ni nani alikuwa akimuuguza? Unajua alipokuwa na matatizo nani alikuwa naye? Maana kwa hakika si wewe, japo ulikuwepo kwenye nyumba hiyohiyo ambayo Raza alikuwa akiteseka na maumivu makali sana ya tumbo kabla hajatolewa zile vimbe zilizokuwa sikimuandama kipindi cha hedhi zake! Leo unashindwa kujiangalia mwenyewe kwenye kioo na kujilaumu, unatafuta wakumtupia lawama!” Ya Andy yakamrudia yeye kama ilivyo! Asiamini.

“Na unachokifanya kwake sasahivi ni ubinafsi tu. Kumtenga na watu wanao simama naye kwenye upweke wake. Sasahivi unakumbuka shuka, na kumpa masharti Raza aliyekuwepo kwenye maisha yako karibia miaka 20! Ulikuwa wapi kipindi akidhalilika kwa kashfa yako ya kuzaa na mke wa mdogo wako? Sio wewe ulikuwa umejaa mitandaoni ukimpigania mke wa mdogo wako? Hukuwa umemkumbuka Raza? Hukujua kama na yeye ni binadamu na anayo nafsi kama binadamu wengine?” Kama alivyomjia juu Andy, ikawa kama Mungu amembananisha.

Pius alikuwa kwenye hali ngumu, gafla akakaukwa midomo. “Hivi unajua adha uliyompitisha lakini au ndio unatokea tu sasahivi na kuamua asitishe mawasiliano na kila mtu, ili umfungie ndani aendelee kukutumikia kama mtumwa wako, halafu wewe ukiendelea na maisha yako?” “Chezo…” Hakutaka kumsikiliza, akaendelea.

“Sasa kwa kuwa mimi simtumii Raza, na ninajali anachojisikia, nitaheshimu matakwa yake. Nitamuacha kabisa ili nisiendelee kumuumiza. Ila kuwa makini Pius. Takataka kwako, alumasi kwa wengine. Acheni kuchezea hisia za watu, mkiwafanya mateka sababu ya nafasi Mungu alizowapa. Uwe na siku njema.” Chezo akatoka kisha akarudi tena, kama aliyefunga mlango na kuufungua.

“Nina pesa ya Raza. Niliitumia kununulia baadhi ya vitu. Aliponipa maagizo yako, yakutowasiliana tena, nimerudisha kwa mwenye duka ambaye ni rafiki yangu. Kwa hiyo pesa yake ipo kama alivyonikabidhi mara ya mwisho. Naona kwa kuwa sasahivi wewe ndiye unayetoa muongozo wa nini kifanyike, ndio nauliza, pesa ya Raza itamfikia vipi?” “Lengo lako ni kumfikia tu mke wangu. Hatuna shida.” “Wewe ndio huna shida. Hili ni jasho lake. Anajinyima sana Raza kutafuta pesa. Kwa uzima na ugonjwa, huwa hakosi kazini. Wakati mwingine nilikuwa nikimpelekea dawa ofisini kwake ili kumsaidia kumaliza siku ya kazi, lakini si kulala nyumbani. Ni jasho lake, ni lazima limfikie. Acha kupuuza juhudi za Raza.” “Mpe mzee Ruhinda, atamfikishia.” Chezo akacheka kwa masikitiko na kutingisha kichwa.

“Wewe si unathamini sana jasho la mke wangu? Sasa mpe baba yake mkwe amfikishie. Na ole wako hata ukosee nije nikute simu yako au ujumbe kwenye simu ya Raza, ndipo utagundua aliyemfikisha Raza kanisani na kula naye kiapo ni mimi au wewe unayelilia mke wangu. Nitakuita mbele za mabosi zako, na kuhakikisha mkeo YUPO kwenye hicho kikao akusikie unavyomlilia mke wangu. Na nitahakikisha baada ya hapo, kila mwajiri hapa nchini anapata taarifa zako za kutokuwa mwaminifu.” Chezo alimtizama kwa sekunde kadhaa, bila hata ya kulipwa pesa yake au kuongeza neno jingine, akatoka.

Katikati ya Kungoja na Kutu.

Mill akashangaa Pam ametoka kitandani asubuhi na mapema. Akataka kuuliza ila akapitiwa na usingizi. Kuja kuamka akamkuta jikoni anakula ugali na kiporo cha nyama za jana yake, mboga za majani. Asubuhi! Akawa hajaelewa. “Leo tunaanzia ugali?!” “Wewe na mwanao mtakunywa chai. Ila acha nishibe kwanza. Nimeamka na njaa!” Akamuona anakazana kula, akahisi pengine ni mchezo mrefu wa usiku uliopita wakigeuzana kana kwamba hawajashikana miaka.

Akaangalia muda. “Huyu si atachelewa shule? Nisaidie nini?” “Kutengeneza kifungua kinywa chenu.” Akajibu na kuweka tonge zito tu na alionekana kweli ananjaa. Ikabidi sasa yeye asaidie mambo hapo, ndipo Shema akafanikiwa kutoka kwa wakati.

Mchana muda wa kula wakatoka. Akamuona anaagiza ugali wa muhogo, kuku wa makange na mtindi. Bwana Pam alikula! Akaomba afungiwe tena ugali mwingine na mboga kama vile. Mill kimya akishangaa nafsini mwake.

~~~~~~~~~~~~~~

Hayo maisha yakaendelea. Njaa ya Pam inatibiwa kwa ugali. Kila anachopika kikawa ugali mpaka Shema akaanza kulalamika kwamba amechoka ugali. Ndio Mill naye akaponea hapohapo lakini hakubadilika. Ugali kwenda mbele na halalamiki kama wao wanajinunulia kitu chao, basi ujue ndio amepata kifungua kinywa cha asubuhi. Chai, ugali na mboga walizokataa kula wao usiku, basi Pam atakula kwa furaha zote ndipo waende kazini.

~~~~~~~~~~~~~~

Mama yake alishaanza kazi hapo kwenye kitendo cha vipimo. Pam akipita mara kwa mara kuhakikisha yupo sawa na hakosei kazi ya watu.  Siku hiyo akatoka benki akaenda kwa mama yake na ugali alionunua, nyama choma na mtindi. Akaanza kula kama ametoka shamba na hajala siku nzima. Mama yake akamwangalia, akajua tayari.

“Njaa hiyo ni ya tokea lini?” Pam akacheka akiendelea kula kwa shangwe. Akala hapo huku akizungumza na mama yake. Simu ya Mill ikaingia. “Twende tukale.” “Hapa nakula. Ila nahisi wamenipunja. Kaugali kadogo!” “Kwamba ulishanunua ugali mapema hii!?” “Mbona kama swala la upunjwaji wangu huzungumzii?!” “Haya twende ukale ugali wa mtama, huwa unasema angalau huo unashika tumbo.” Akanyanyuka hapo haraka kama ambaye hakuwa akila.

~~~~~~~~~~~~~~

Aliporudi mama yake akamuita. “Mara ya mwisho kupata siku zako ilikuwa lini?” Pam akashituka na kubaki akipiga mahesabu, hayaji. Akatoka hapo bila ya kuaga wala kutoa jibu mpaka ofisini kwa Mill. Akamuuliza sekretari kama anamgeni, akaambiwa hana. Akaingia.

~~~~~~~~~~~~~~

Aliingia bila hodi mpaka Mill akashituka. “Twende.” “Wapi!?” Mill akauliza kwa kushangaa. “Mahakamani, tukafunge ndoa.” Kwa sekunde kadhaa Mill akawa kama hajaelewa. Pam akabaki amesimama, anamsubiria aamke kitini. Mill akaona aulize tu.

“Kwamba tunakwenda kufunga ndoa sasahivi?!” “Halafu ile mipango yako ambayo haikamiliki, itafuata baada ya sisi kufunga ndoa kisheria. LEO. Nikimaanisha hivi, hapa ninapozungumza, sasahivi, tunakwenda kufunga ndoa. Halafu mipango yako na watu wako itakapokamilika, tutaendelea. Lakini tusiendelee kuishi hivi bila ndoa.” Pam akaweka kituo, akimtizama machoni.

“Hatuwezi kufanya mambo kwa kukurupuka Pam! Na hatuwezi kwenda sisi wenyewe bila watu wetu wa karibu!” “Mimi nakutaka wewe uwepo. Basi. Wengine wote wanaweza kusubiria mipango yako. Huu ni wangu.” “Bado naona tufanye kwa utaratibu mzuri.” “Sawa.” Akajibu hivyo na kutoka.

Akamuacha Mill kama hajaelewa vizuri. ‘Sawa’ hii mbona imekubalika kirahisi hivi! Pam alivyombishi! Kengele ikagonga kichwani akajua hii sawa si sawasawa. Akasimama kwa haraka na kumfuata.

Alimkuta amesharudi mezani kwake amekaa. “Pam!” Akamgeukia. “Ila si umenielewa nilichomaanisha?” Akauliza kwa kujihami sana mbele ya wafanyakazi wengine. Hapo Mill mpole, mnyenyekevu, akimjua Pam, dakika 5 mbele.

“Ndiyo.” Pam akamjibu tena kwa ufupi ila kwa ufasaha haswa. Mill akasimama kwa sekunde kadhaa kama ambaye hajaridhika. Akabaki akimtizama, naye Pam akimtizama kama anayesubiria la nyongeza. Mill akameza mate kwa wasiwasi huku wakiangaliana kwa sekunde kadhaa, Pam alipoona hana la nyongeza, akarudisha macho kwenye kompyuta yake na kuendelea na kazi. Mill akasimama hapo kwa sekunde kadhaa mbele huku amepewa mgongo, wafanyakazi wengine wakiendelea na kazi, kimya, akaona aondoke pengine watazungumza vizuri baadaye.

~~~~~~~~~~~~~~

Miaka ikizidi kwenda kama mawimbi yanayogusa mwamba bila kuchoka.

Moyo ulijenga uvumilivu kama mti wa nyikani. Ukikua polepole, lakini ukiamini kesho itatoa maua. Ilikuwa kabla ya Shema. Akaja Shema, akapita Kisha na wanae, bado moyo wake ulikuwa na tumaini na yeye zamu yake itakujafika.

Mtoto wa pili anakuja, bado hamna ndoa! Akataka hata ya mahakamani, lakini Mill wa mipango. Sasa, safari hii mipango ya Mill imekutana na Sawa Ya Pam.

Ni nini kitaendelea?

Pius amechokonoa mpaka amekutana na Penzi la nje la mkewe Lililokuwa Limekomaa Mpaka Kuota Mizizi. Kumbe Kuna historia nzito katikati YAO. Ipo thamani kubwa iliyokwisha jengwa kwa mkewe. Yapo MAISHA ya undani kabisa yaliyokuwa yakiendelea, yeye hana habari! Hawa wawili walikuwa katika uzima na furaha, zaidi yake yeye na mkewe! Tena si kwa muda mfupi! Ni miaka!

Gafla yeye anaonekana muingiliaji na mvurugaji!

Chezo si Mchezo. Alichokitafuta, hatimaye amekipata. Amemchuguza bata yeye mwenyewe, ataendelea kumla? Chezo amemfanya ajione kama kipanzi!

Kama vile Raza si size yake!

Usipitwe.